1. Die verbetering van Grondslagfase-leerders se geletterdheids- en gesyferdheidsvlakke is 'n groot prioriteit en staan sentraal tot die WKOD se Geletterdheid-en-syferkundigheidstrategie.
2. In 2005 het die Direktoraat: Kurrikulumontwikkeling intensiewe 3-dagkursusse oor Vroeë Geletterdheid en Vroeë Gesyferdheid vir graad R-onderwysers aangebied ten einde hulle en hulle skole te ondersteun om ontluikende geletterdheids- en gesyferdheidskennis, -vaardighede, -gesindhede en -waardes in graad R-leerders te ontwikkel. Die WKOD is verbind tot die voorsiening van graad R, en daarmee saam verdere kursusse, ten einde 'n goeie gehalte graad R-kurrikulum te voorsien.

3. Die kursusse het ten doel om
  • 'n bewustheid en begrip te bevorder van die belangrikheid van ontwikkelingsgepaste sygferkundigheids- en geletterdheidsonderwyservaring vir verdere sukses in hierdie areas.
  • die onderwysers se vermoë om vroeëgeletterdheids- en -gesyferdheidskennis, -vaardighede, -gesindhede en -waardes aan graad R-leerders te onderrig sodat leerders voorbereid is op die kurrikulum van graad 1 - 3.
4. Aan die einde van hierdie kursusse sal deelnemers in staat wees om die volgende te doen:
  • Begryp die konsep van ontluikende geletterdheid/gesyferdheid
  • Ondersoek alle uitkomsgebaseerde assesseringstandaarde vir graad R in die Tale-/Wiskunde-leerarea, met spesifieke verwysing na ontluikende geletterdheids-/gesyferdheidsontwikkeling in 'n nieformele onderrig-en-leerprogram wat op speel en aktiewe leer gegrond is
  • Beskryf hoe die integrasie van onderrig en leer oor 3 leerprogramme heen die ontwikkeling van ontluikende geletterdheid/gesyferdheid ondersteun
  • Ontwerp geïntegreerde graad R-onderrig- en -leeraktiwiteite wat gegrond is op die NKV en wat ontluikende geletterdheids- en gesyferdheidskennis, -vaardighede, -waardes en -gesindhede ontwikkel
  • Inkorporeer geletterdheids-/gesyferdheidsbeplanning in die daaglikse program van 'n nieformele omgewing wat speel, ontdekking en aktiewe leer ondersteun
  • Identifiseer algemene leerstoornisse wat 'n uitwerking het op die ontwikkeling van ontluikende geletterdheid/gesyferdheid
  • Beskryf ten minste 3 daaglikse kernaktiwiteite wat op 'n daaglikse rooster/program vir graad 3 vereis word, wat noodsaaklik is vir die bevordering van geletterdheids-/gesyferdheidsontwikkeling
5. Vroeëgeletterdheidskursusse sal hierdie jaar in 4 OBOS-distrikte aangebied word. Besonderhede oor die kursusse word in Bylae A en B gegee. Enige navrae van onderwysers in hierdie 4 distrikte oor registrasie en kursusaangeleenthede kan gerig word aan die betrokke OBOS-koördineerder op die lys in Bylae A en B. Navrae van onderwysers in ander distrikte kan gerig word aan die hoofkurrikulumadviseur in hulle OBOS'e.
6. Graad R-onderwysers wat tans in WKOD-geregistreerde klasse onderrig, kan die kursusse bywoon wat in hulle OBOS-distrikte aangebied word. Deelname aan 'n kursus is egter vrywillig en registrasies sal beperk word tot 'n maksimum van slegs 32 onderwysers per kursus.
7. OBOS'e kan na goeddunke óf 'n algemene uitnodiging aan hulle skole rig, óf dié skole nooi wat aan die OBOS se voorafbepaalde kriteria voldoen, bv. afstand vanaf die lokaal en blootstelling aan ander opleidingskursusse. OBOS'e sal skole binnekort skakel en alle ingevulde registrasies moet aan die OBOS teruggestuur word voor of op 1 Junie 2007.
8. Wanneer 'n onderwyser aanvaar en geregistreer is vir 'n kursus, sal hy of sy verplig wees om dit by te woon of om reëlings te tref vir 'n geskikte plaasvervanger. Indien hy of sy versuim om dit te doen, kan die onnodige uitgawes van die skool verhaal word.
9. Onderwysers wie se registrasies goedgekeur is, kan vir hulle vervoerkoste eis.

Die volgende eenmalige subsidie sal betaal word, mits die WKOD 'n korrek ingevulde eisvorm by die lokaal ontvang.

  • 20 tot 50 km in geheel oor die 3 dae:    R75-00
  • 51 tot 75 km in geheel oor die 3 dae:    R85-00
  • 76 tot 100 km in geheel oor die 3 dae:  R95-00
  • +100 km in geheel oor die 3 dae:          R100-00
10. Onderwysers word versoek om seker te maak dat hulle ingevulde eisvorms, met al die inligting daarop korrek en gewaarmerk, voor die einde van die kursus ingedien word by die lokaalbestuurder. Die volgende inligting word vereis vir die verwerking van vervoereise:
  • Persal-nommer (indien van toepassing)
  • ID-nommer
  • Reisafstand in kilometer van u huis na die lokaal
  • Die korrekte bankbesonderhede vna alle werknemers van skoolbeheerliggame moet voor die einde van die kursus op die toepaslike vorm ingedien word. Die vorm moet gestempel word deur die betrokke bank. Geen fotokopieë of faksimileë van die ingevulde vorm sal aanvaar word nie.

Laat en foutiewe eisvorms sal nie aanvaar word nie.
11. Ligte verversings sal gedurende die oggend en tydens middagete bedien word.
12. Die Direktoraat: Kurrikulumontwikkeling verwelkom hierdie geleentheid om graad R-onderwysers te ondersteun in die belangrike rol wat hulle speel in die ontwikkeling van 'n sterk grondslag vir geletterdheid en gesyferdheid in ons jongste leerders.


GETEKEN: J.P. RAULT-SMITH
HOOF: ONDERWYS
DATUM: 2007:05:10

Bylae A  (grootte: 18 KB)
Bylae B  (grootte: 18 KB)