1. Die WKOD is verantwoordelik vir die gehalte van onderwys en vir die bevordering van gesyferdheid. Die week van 3 tot 8 September 2007 word nasionaal gevier as Wiskundeweek. Om hierdie rede word skole aangemoedig om aktiwiteite te beplan om Wiskundeweek te vier. Gedurende hierdie week kan elke fase of graad sy eie Wiskundedag met verskillende aktiwiteite vier.
2. Primêre Skool

Idees vir die beplanning van 'n Gesyferdheids- of Wiskundedag:

  • Hou 'n wiskundespeletjiemiddag: Gebruik speletjies soos skaak, dambord, slangetjies en leertjies, Sjinese dambord (Chinese Checkers) bingo, umlabalaba, Monopoly, kaartspele wat getalgroeperings gebruik, speletjies met dobbelsteentjies wat die vier bewerkings gebruik, getallespeletjies, waarskynlikheidspeletjies of enige ander speletjies wat met wiskunde te doen het.

  • Gebruik die AMESA-uitdaging: Die Vereniging vir Wiskundeonderrig in Suid-Afrika (AMESA) bied 'n Wiskunde-uitdaging vir graad 4 - 7-leerders. Volle besonderhede aangaande die AMESA-uitdaging, wat vorige vraestelle insluit, is beskikbaar by http://www.amesa.org.za/Challenge op die web. Om inligting oor die AMESA-uitdaging te verkry, kan die organiseerder, Alwyn Olivier gekontak word by aio@sun.ac.za. Die WKOD sal aan die begin van die derde kwartaal 'n meesterkopie van die AMESA-uitdaging 2007 se vraestel aan alle primêre skole stuur. 'n CD van vraestelle van vorige AMESA-uitdagings kan bestel word teen R12 plus posgeld vanaf Edumedia by tel. 021 689 9536 of by faksno. 021 685 7421 of by e-posadres edumedia@pgwc.gov.za

  • Skryf 'n sudoku-kompetisie uit: Leerders neem deel in klasgroepe of spanne.

  • Organiseer 'n Tegnologie/Wiskunde-modelboukompetisie of uitstalling: Leerders spandeer 'n dag aan die bou van modelle wat deur hulleself ontwerp is. Anders kan modelle en projekte wat in die klas voltooi is (bv. gedurende Tegnologie-lesse) uitgestal word.

  • Reël 'n Wiskundevasvra: Leerders kan deelneem aan 'n hoofrekene-wiskunde-uitdaging of 'n probleemoplossende uitdaging.

  • Doen Wiskundeprobleme vir die pret in die klas: Wondervierkante, ens. Boeke met idees kan by EDULIS uitgeneem word. Tel. 021 957 9618 of by e-posadres edulis@pgwc.gov.za

  • Reël biblioteekuitstallings :Uitstallings in die biblioteek wat wiskundeformules, uitvindsels, ens. beklemtoon.

  • Moedig biblioteekgebruik aan: Leerders kan die biblioteek gebruik om onderwerpe na te vors of te ondersoek wat deur die onderwyser opgestel is, bv. vrae oor Romeinse algebra, Egiptiese algebra, Pythagoras, Pascal, Fibonacci of wie wat gedoen het op 'n bepaalde dag in die geskiedenis van wiskunde (leerders kan dan 'n tydlyn ontwikkel).

  • Beplan 'n skattejag wat van 'n kaart met koördinate gebruik maak om 'n skat te vind: Die leidrade sou gegee kon word in die oplossing van 'n wiskundeprobleem.

  • Nooi ouers en leerders uit na 'n prettige Wiskundedag: Aktiwiteite sou insluit kaartspel, veerpyltjies, kegelspel met punte, skaak, dekskyfgooi en ringgooi oor genommerde kegels, syfer- en logiese raaisels.

3. Hoërskole

Idees vir die beplanning van 'n Wiskundedag:

  • Bied 'n pretwiskundemiddag of aand aan vir leerders, onderwysers en ouers: Leerders, onderwysers en ouers kan deelneem aan aan 'n middag van prettige Wiskundeaktiwiteite. Ouers kan uitgenooi word om aan leerders te vertel hoe hulle wiskunde in hulle alledaagse werk gebruik.

  • Reël speletjies en vasvrae: Onderwysers kan een les daaraan wy om leerders speletjies te laat speel soos Wiskunde24, sudoku, ens. Dit sou kon uitloop op die prettige wiskundemiddag waar uitmuntende prestasies deur leerders met pryse bekroon sou kon word.

  • Reël vertonings van wiskundeplakkate en projekte wat die geskiedenis of die praktiese toepassings van Wiskunde, ens. uitbeeld.

  • Neem deel aan AMESA-wiskundeweek se aktiwiteite gedurende hierdie periode.

4. Die bevordering van Wiskunde op 'n genotvolle wyse sal daartoe bydra om leerders aan te moedig om deel te neem aan aktiwiteite wat wiskundige denke insluit en ontwikkel.
5. Skole wat 'n suksesvolle Wiskundedag aangebied het, word uitgenooi om ons daarvan te vertel. 'n Kort beskrywing met foto's, indien moontlik, kan gepos word aan me L Malan. Kamer 803, WKOD, Privaatsak X9114, Kaapstad, 8000, of na lymalan@pgwc.gov.za, of dit kan gestuur word na u OBOS se Kurrikulumadviseur vir Wiskunde. U suksesverhaal sal geplaas word op die Wiskunde AOO-webtuiste by http//:www.curriculum.pgwc.gov.za.
6. Prinsipale word aangemoedig om 'n Wiskundeweek in hulle jaarbeplanning in te sluit,


GETEKEN: M.J. CAMERON
HOOF: ONDERWYS
DATUM: 2007:06:28