1. Elke onderwysinrigting wat die Senior Sertifikaat deur middel van die Wes-Kaap Onderwysdepartement (WKOD) skryf, word hiermee voorsien van 'n ontleding van die uitslae wat sy kandidate in die 2006-Senior Sertifikaat-eksamen behaal het.
2. Gedurende die nasienproses in Desember is die punte wat deur elke kandidaat in elke vraag in elke vraestel behaal is, verwerk ten einde die WKOD in staat te stel om hierdie ontleding aan elke skool te voorsien.
3. Kurrikulumbeplanners en -adviseurs is van die statistiek vir die provinsie en hul OBOS'e voorsien sodat hulle strategieë kan ontwikkel om onderwysers met moeilike aspekte van die kurrikulum te help.
4. Hierdie uitgebreide ontleding stel elke skool in staat om te identifiseer waar hul leerders goed gedoen het of met sekere vrae gesukkel het.
5. Die statistieke behoort ook vir skoolhoofde van nut te wees in hulle taak om die gehalte van die werk wat in hulle skole gedoen word, te verseker.
6. Hierdie statistiek dui die volgende aan ten opsigte van individuele skole:

  • Die persentasie verskil bo of onder die provinsiale gemiddelde wat sy kandidate vir elke vraag behaal het. 'n Positiewe persentasie verskil toon aan dat die gemiddelde persentasie bo die provinsiale gemiddelde was, terwyl 'n negatiewe persentasie verskil daarop dui dat u skool se gemiddelde persentasie onder die provinsiale gemiddelde was.

  • Die getal kandidate wat elke vraag aangepak het.

  • Die afwyking in die gemiddelde persentasie tussen wat die kandidate vir die vraestel as 'n geheel behaal het en die gemiddelde vir die provinsie. Dit verskyn in die laaste kolom.
7. Die onderwysers wat by elke vak betrokke is, moet die statistiek onderling bespreek, sterk en swak punte identifiseer, en hierdie inligting gebruik om 'n aksieplan vir die vak vir die komende jaar op te stel.
8. Waar ernstige probleme in 'n vak geïdentifiseer word, moet vakhoofde die kurrikulumadviseurs om hulp nader. Hulle word ook aangemoedig om saam met hulle opvoeders betrokke te raak by vakgroeperings in hulle streek. Onderwysers wie se leerders besondere sukses in spesifieke vrae behaal het, kan deur die kurrikulumadviseurs gevra word om die redes vir hul sukses te deel met skole wat swak gevaar het.
9. Die WKOD vertrou dat skoolhoofde en onderwysers sal baat by hierdie statistiek en dat dit tot die verbetering van die gehalte van onderrig en leer in die Wes-Kaap sal bydra.


GETEKEN: J.P. RAULT-SMITH
HOOF: ONDERWYS
DATUM: 2007:01:08


"Die dokumente waarna daar verwys word as aanhangsels by die minuut is nie by hierdie e-pos aangeheg nie, maar is beskikbaar as drukstukke en sal binnekort gepos word.
'n Voorbeeld van die tipe statistiek wat in die minuut genoem word, is as 'n PDF-lêer aangeheg."
Ontleding  (grootte: 93 KB)