1. Die Geografiese Inligtingstelsels- (GIS-) -bewustheidsweekuitstalling 2007 is 'n gesamentlike inisiatief van die Geografiese Inligtingstelselvereniging van Suid-Afrika (GISSA) in die Wes-Kaap en die Wes-Kaap Onderwysdepartement (WKOD).
2. Die GIS-bewustheidsweekuitstalling 2007 sal plaasvind vanaf 7 tot 11 Mei 2007 en sal die gebruik van tegnologie in die Aardrykskundeklas beklemtoon, en opleidings- en ontwikkelingshulpbronne en -dienste in die Wes-Kaap uitlig.
3. Hierdie vierde jaar van die GIS-bewustheidsweekuitstalling beloof om selfs groter en meer innoverend as vantevore te wees. Verskeie opwindende temas en geleenthede om huidige uitdagings en ontwikkelings in die Aardrykskundeklas te ondersoek, sal aangebied word.
4. Volledige programbesonderhede kan op die WKOD se Kurrikulumwebtuiste (http://curriculum.wcape.school.za/) en die Geografiewebtuiste (VOO) (http://curriculum.wcape.school.za/site/39/page/view/) verkry word. Plakkate sal onder skole versprei word wat besonderhede van al die gebeure sal verskaf. Daarbenewens sal die media artikels en advertensies publiseer wat op die GIS-bewustheidsweek van toepassing is.
5. Die GIS-bewustheidsweekuitstalling 2007 sal saamval met 'n minikonferensie wat sal handel oor onderwerpe wat verband hou met die nuwe VOO-NKV-Geografiekurrikulum.
6. Die uitstalling sal by die kampus van die Universiteit van Wes-Kaapland in Modderdamweg, Bellville gehou word en sal 'n algemene bewustheidsprogram van seminare en ander aktiwiteite insluit. Hoewel sessies gedurende die bewustheidsweek van groot belang vir leerders sal wees, word skole ook aangemoedig om opvoeders uit te nooi om die week by te woon sodat hulle in 'n posisie sal wees om onderrigmetodologieë te verbeter en betekenisvolle insette te lewer met betrekking tot leerders se studie- en loopbaankeuses.
6.1 Uitstallers sal toegang tot inligting voorsien oor alle aspekte van GIS-onderrig en -leer, opleiding en ontwikkeling, deur die nuutste kursusse, kursusmateriaal, opvoedkundige sagteware, leer- en onderrigondersteuningsmateriaal, -tegnieke en metodologieë tentoon te stel.
6.2 Die deelname van opvoeders, afrigters, vaardigheidsontwikkelingspraktisyns en-fasiliteerders aan die program sal verseker dat hulle aan nasionale en internasionale strominge vir opvoeders en leerders vanuit alle sektore en vlakke van leer blootgestel word. Die program sal ook 'n strategiese platform voorsien vir netwerkvorming, vennootskappe en die heersende debat.
6.3 Die GIS-bewustheidsweekprogram sal klem lê op die uitwys en ondersoek van Geografie-onderwys en -opleidingsgeleenthede. Skole wat dit oorweeg om hulle verskeidenheid van vakaanbiedings te verander sal ook baat by 'n besoek aan die uitstalling, omdat hulle aan 'n volledige reeks leermoontlikhede blootgestel sal word. Praktisyns van verskillende sektore sal referate oor GIS-onderwerpe lewer vanaf 14:00 tot 15:30 op 8 en 9 Mei 2007.
6.4 Die Woensdag- en Donderdagprogram is spesifiek ontwerp om graad 9-, 10- en 11-onderwysers en graad 9-, 10- en 11-leerders en ouers, insluitende dié uit plattelandse gebiede, te akkommodeer. Skole sal self vervoer moet reël vir leerders wat dit wil bywoon.
7. Alle WKOD-inrigtings word aangemoedig om die GIS-bewustheidsweekuitstalling te ondersteun.


GETEKEN: J.P. RAULT-SMITH
HOOF: ONDERWYS
DATUM: 2007:03:23