Die Wes-Kaap Onderwysdepartement het 'n omvattende strategie ontwikkel om geletterdheid en gesyferdheidsprobleme in skole in die Wes-Kaap aan te spreek. Navorsing wat oor die Geletterdheid- en Gesyferdheidstrategie gedoen is, toon dat 'n gebrek aan leesmateriaal en die groot klasse ernstige probleme vir onderwysers skep. Die navorsing dui ook aan dat indien onderwysers in die Intermediêre Fase nie leesonderrig doen nie, die vlakke van geletterdheid val ten opsigte van die verwagte prestasievlakke tussen graad 3 en graad 6.

Die Masifunde Maqela Leesprojek is gemik op hierdie uitdagings. Die projek voorsien onderwysers van graad 4 tot 7 van 'n stel leesmateriaal. Openbare skole in die laer 4 provinsiale kwintiele word voorsien van een stel boeke per klaskamer, terwyl 'n enkele voorbeeldstel na skole in kwintiel 5 gestuur sal word. Die projek beveel ook 'n besondere metode vir die onderrig van leer aan; dit laat leerders toe om in klein groepies saam te werk binne 'n groot klas met leesboeke van 'n gepaste vlak, terwyl hulle besig is om die leesmateriaal te interpreteer.

Verskillende benaderings moet gebruik word in leesonderrig. Hierdie benaderings sluit in klankmetode, sigwoorde, linguistiek, heeltaal en taalervaring. Aangesien daar gedifferensieerde leesvlakke bestaan, en op grond van die feit dat baie Intermediêre Fase-onderwysers nie opgelei is om leesonderrig aan te bied nie en leerders moet onderrig wat nie op daardie graadvlakke die mas opkom nie, word 'n intervensiestrategie van begeleide lees bekendgestel. Elke klaskamer en konteks is verskillend, en dus is dit nie 'n voorskriftelike benadering nie - dit is 'n gids om te verseker dat goeie gebruik gemaak word van die leesmateriaal in die Geletterdheidshalfuur.

Ondersteuning is vir onderwysers beskikbaar om die leesuitdaging te hanteer.

Oriëntering vir onderwysers in die begeleide leesstrategie sal voorsien word by elke skool deur uitgewers in 'n 3-uur middagsessie in die eerste kwartaal. Aangewese uitgewers sal skole skakel om hierdie sessies te reël.

'n Opleidingshandleiding is ontwikkel en 'n DVD is gemaak om onderwysers te ondersteun wat dalk nie daarvoor opgelei is om lees te onderrig nie. Die handleiding sowel as die DVD verskaf duidelike, stap vir stap leiding oor hoe om lees in die klaskamer te begelei.

Gespesialiseerde Onderwyspersoneel en kurrikulumbeamptes word deur die WKOD geöriënteer om skole te ondersteun met die implementering en handhawing van die begeleide leesprogram.

Grondslagfase-onderwysers sou ook gevra kon word om bystand te verleen met die leesonderrig.

Prinsipale word versoek om vertroud te raak met die Masifunde Maqela Leesprojek se bronne en opleiding. Aktiewe deelname deur die prinsipaal in die middag se onderrigsessies sal leiding en ondersteuning verskaf in die hantering van leesuitdagings en in die verhoging van geletterdheidsvlakke. Die prinsipaal se leierskap is 'n kritieke faktor in die verbetering van geletterdheid en gesyferdheid.