| 1. |
Vakoriëntasiewerkswinkels is gedurende die Junie/Julie-skoolvakansie van 2006 aangebied. Hierdie werkswinkels het nuwe vakspesifieke inhoud gedek.
|
| 2. |
Die inhoudsmodules was uiters waardevol vir dié onderwysers wat dit bygewoon het en, na versoeke om hierdie modules te herhaal, sal die modules weer aangebied word vir onderwysers wat die eerste rondte in Junie/Julie 2006 misgeloop het, nuwe onderwysers wat tot die professie in die VOO-band toegetree het en onderwysers wat 'n nuwe vak in graad 10 tot 12 aanbied.
|
| 3. |
Die herhaling van die werkswinkels oor hierdie modules sal gedurende die April 2007-skoolvakansie plaasvind. In sommige vakke is aanpassings gemaak om nuwe behoeftes te akkommodeer. Daar word aanbeveel dat onderwysers wat registreer al die modules moet bywoon. Hierdie modules sal gewoonlik plaasvind oor 'n tydperk van twee dae, afgesien van daardie uitsonderings wat in die aangehegte Bylae A aangedui word.
|
| 4. |
Bywoning is opsioneel, en hang af van onderwysers se akademiese en professionele ontwikkelingsbehoeftes.
|
| 5. |
Die program stel onderwysers in staat om hulle verloftyd te maksimaliseer, aangesien slegs twee dae, nl. 2 en 3 April en/of 12 en 13 April, gebruik sal word. In twee vakke word 'n vierdag-opleidingsprogram vereis as gevolg van die tegniese aard van daardie vakke (sien Bylae A). Die kursusdatums is gekies om vir die Paasnaweek voorsiening te maak en om onderwysers in staat te stel om werkswinkels in twee verskillende vakke by te woon indien hulle sou wou.
|
| 6. |
Bylae A bevat 'n lys vakke en modules wat aangebied sal word. Let asseblief daarop dat sekere vakke uitgesluit is, in die lig van moontlike opleiding deur die nasionale Departement van Onderwys gedurende die vakansie in Junie/Julie 2007, nl. RTT en IT. In ander gevalle is vakke uitgelaat waar onderwysers nie 'n behoefte aan verdere opleiding aangedui het nie.
|
| 7. |
Die deelnemers aan die werkswinkels sal beperk word tot 70 onderwysers per vak en die werkswinkels sal in en om Kaapstad aangebied word. Onderwysers wat van die landelike gebiede af reis sal vergoed word vir akkommodasie- en reisuitgawes, in ooreenstemming met Tesourie-regulasies. Onderwysers moet hulle eie reis- en akkommodasiereëlings tref sodra die werswinkels gefinaliseer en die geregistreerde onderwysers dienooreenkomstig ingelig is.
|
| 8. |
Onderwysers wat hierdie werkswinkels wil bywoon, moet by Hoofkantoor registreer. Die aangehegte registrasievorm (Bylae B) moet teen 9 Maart 2007 ingedien word by mnr J. Randewijk by e-posadres jrandewijk@pgwc.gov.zaof by faksnommer 021 467 2258. Geen laat registrasies sal aanvaar word nie. Skakel met mnr Randewijk by telefoonnommer 021 467 2564/2585 vir meer inligting.
|
| 9. |
Let asseblief daarop dat indien daar minder as 12 registrasies vir 'n vak ontvang word, geen werkswinkel vir daardie bepaalde vak aangebied sal word nie. Die name van die onderwysers sal by die OBOS'e ingedien word vir opvolgleiding en -ondersteuning. Skole sal dienooreenkomstig in kennis gestel word.
|
| 10. |
Sodra registrasie afgehandel is, sal onderwysers ingelig word omtrent die lokale waar die werkswinkels sal plaasvind.
|
| 11. |
Onderwysers wat nie registreer nie, sal om logistieke redes nie toegelaat word om die werkswinkels by te woon nie en hulle sal nie vergoed word vir enige onkoste aangegaan nie.
|
| 12. |
Prinsipale word versoek om seker te maak dat al hulle leerders onderrig word deur toepaslik opgeleide onderwysers. Prinsipale word vriendelik versoek om by die registrasiedatum van 9 Maart 2007 te hou en om die inhoud van hierdie kurrikulumminuut onder die aandag van alle graad 10- tot 12-onderwysers van vakke in Bylae A te bring.
|
GETEKEN: J.P. RAULT-SMITH
HOOF: ONDERWYS
DATUM: 2007:02:19
|