1. |
Iziko ngalinye malicwangcise inkqubo yokuqesha abasebenzi ngokwezakhono zabo (human resource deployment) ukuze likwazi ukujongana neemfuno neenjongo zalo zokwenza iinkonzo. Apha eMzantsi Afrika, ngenxa yenkqubo yexesha elidlulileyo yocalu-calulo, kufuneka sicwangcise ngohlobo lokuba sinike bonke abemi abafanelekileyo ukufikelela ngokulinganayo kumathuba omsebenzi.
|
2. |
Iinjongo zoMthetho woBulungisa kwezeNgqesho, ka-1998 (Employment Equity Act, 1998 [ubukhulu: 2 313 KB] ) kukuqinisekisa
(a) |
ukuba kuqeshwa abasebenzi abamele iintlanga ngeentlanga,
|
(b) |
amathuba alinganayo kunye
|
(c) |
nokuphunyezwa kwamanyathelo enkqubo ebonelela ababevinjwe amathuba engqesho ngaphambili (affirmative action measures).
|
|
3. |
Emva kokuba iSebe leMfundo leNtshona Koloni lamkele iSicwangciso soBulungisa kwezeNgqesho ngo-2002, kwaqulunqwa iqela lezikhokelo nemiyalelo kwaze kwaboniswana ngayo ukwenzela ukunika isikhokelo malunga nokungqinelana nalo Mthetho. Ngo-2005 iSebe i-WCED laqulunqa imiyalelo yokuphunyezwa komgaqo-nkqubo kumaziko emfundo nakwiikholeji zeFET ukuqinisekisa ukuba kuyangqinelwana neSicwangciso soBulungisa kwezeNgqesho seSebe leMfundo leNtshona Koloni kunye neenjongo zaso kwakunye neenjongo zoMthetho woBulungisa kwezeNgqesho, ka-1998. Lo myalelo uqhotyoshelwe njengeSihlomelo A yaye imigaqo yale ngcaciso imfutshane iya kuphunyezwa ngoko nangoko.
|
4. |
Iya kuthakazelelwa intsebenziswano yakho ekuqinisekiseni ukuba iSebe leMfundo leNtshona Koloni liwulandela ngokuthe ngqo lo Mthetho kunye neenjongo zawo.
|
ISAYINWE: NGU-E.D. KIRSTEN
INTLOKO: YESEBE LEMFUNDO
UMHLA: 2006:01:11
|