Die WKOD is daartoe verbind om sy posisie te gebruik om 'n groter bewustheid van MIV/VIGS te skep, om inligting aangaande MIV/VIGS en die verspreiding daarvan bekend te maak, en om te help om die gesindhede van jongmense te verander sodat die verspreiding van hierdie epidemie gekeer kan word. Dit sal hoofsaaklik deur middel van formele klasonderrig geskied, asook deur middel van buitekurrikulêre aktiwiteite en ander informele inisiatiewe.

Die onderrig van MIV/VIGS, seksualiteit en lewensvaardighede binne die kurrikulum is nóg 'n addisionele nóg 'n opsionele aktiwiteit. Dit maak 'n integrale deel uit van die voorgeskrewe nasionale kurrikulum. Die implementering hiervan is gebiedend in alle skole in die Wes-Kaap. Aangesien MIV/VIGS-lewensvaardighedeonderwys dus deur middel van formele, kurrikulumgebaseerde klaskameronderrig geïmplementeer moet word, is die opleiding van onderwysers 'n hoofkomponent van die MIV/VIGS-program.

Met die bogenoemde in gedagte, is dit dringend noodsaaklik dat die onderwysers van leerders in spesiale skole met erge intellektuele gestremdhede en outisme ook MIV/VIGS-opleiding kry en dat hulle hulp kry om MIV/VIGS en die lewensvaardighedeonderrig by die kurrikulum te integreer op 'n manier wat relevant is tot hierdie leerders se behoeftes.

Training Workshops Unlimited (TWU) wat aangestel is om onderwyseropleiding en -ontwikkeling vir spesiale skole in die Wes-Kaap aan te bied, is 'n organisasie wat geaffilieer is by die Cape Mental Health Society wat op hulle beurt weer aktief betrokke is by verskeie gemeenskappe oor die Skiereiland heen. TWU het reeds ondervinding in die hou van opleidingskursusse oor basiese lewensvaardighede, gevorderde lewensvaardighede, werkvaardighede, spesifieke beroepsvaardighede en beroepsopleiding vir persone met intellektuele gestremdhede.

Die bestuur en personeel van Training Workshops Unlimited het uitvoerige navorsing gedoen om hulle in staat te stel om MIV/VIGS- en Seksualiteitsprogramme te ontwikkel wat aangepas is vir verskillende oudersdomsgroepe en vlakke van funksionering en kulture binne Suid-Afrika. Hulle is dus goed gekwalifiseerd om hierdie diens namens die WKOD te lewer.

'n Aantal opleidingswerkswinkels is reeds gedurende 2005 en 2006 aangebied. 'n Finale opleidingskursus sal nou in Worcester aangebied word (plek sal nog bevestig word) vanaf 10 tot 12 Januarie 2007. 'n Totaal van 30 onderwysers kan geakkommodeer word, d.w.s. twee onderwysers per fase per skool. Dit is van besondere belang vir daardie skole waar geen personeel nog die opleidingsessies bygewoon het nie.

Die opleidingsprogram sal daarop gemik wees om onderwysers op te lei om MIV/VIGS en Seksualiteitsonderrig aan te bied, om ouers te ondersteun en op te lei en om op te tree as skool-MIV-koördineerders.

Die program sal in ooreenstemming gebring word met die sleuteluitkomste van die NKV vir hoofstroomskole. Opvoeders en leerders sal voorsien word (teen geen koste vir die skool) van leer- en onderrigondersteuningsmateriaal (LOOM) en 'n opleidingstel. Die stel sluit anatomies-korrekte poppe en 'n bordspel in. Die leermateriaal is beskikbaar in al drie amptelike tale en sal in 2007 aan alle spesiale skole verskaf word.

Die skool se LOOM-behoeftes moet bestel word deur die aangehegte aanvraagvorm te voltooi en dit na me A. du Toit te stuur by faksno. 021 467 2127 of 021 425 7465 teen 31 Oktober 2006.

Die Voorwaardelike Toekenning vir MIV/VIGS maak voorsiening om alle kostes van hierdie MIV/VIGS-program te dek. Hierdie kostes sluit die volgende in:

• Spyseniering

• Akkommodasie teen DSA-tariewe (Afgevaardigdes reël en betaal self vir akkommodasie en stuur dan die eise na die WKOD se MIV/VIGS-eenheid.)

• Vervoer teen DSA-tariewe

Alle eise moet aan die volgende adres gestuur word:

MIV/VIGS -programeenheid
Wes-Kaap Onderwysdepartement 		
18de Vloer  
Goue Akker
Privaatsak X9114
Kaapstad	
8000

Vir enige verdere inligting oor die finansiële implikasies, skakel asseblief die volgende persone by die MIV/VIGS-programeenheid by Hoofkantoor:

Mnr Johan Keyzer (tel. 021 467 2126) 
Me Angelique du Toit (tel. 021 467 2101)

Die proses vir die registrasie van onderwysers vir opleiding sal binnekort aan skole bekend gemaak word deur Training Workshops Unlimited.

Aangesien sommige onderwysers van spesiale skole alreeds hierdie opleidingsessie bygewoon het (dit is 'n paar keer aangebied sedert Februarie 2006), word 'n addisionele geleentheid nou geskep vir daardie skole wat nog nie twee onderwysers per fase kon oplei nie. Indien die prinsipale van sodanige skole graag addisionele personeel wil laat oplei, word hulle aangemoedig om gebruik te maak van hierdie geleentheid en om daardie onderwysers te registreer.

Skakel asseblief met me Angelique du Toit (tel. 021 467 2124) indien u enige verdere inligting omtrent registrasie benodig.

Dit sal hoog op prys gestel word indien u hierdie noodsaaklike opleiding ondersteun.