1. Die WKOD het skole onlangs ingelig omtrent die loods van die Wes-Kaap Verteenwoordigende Raad van Leerders (WKVRL) op Donderdag, 15 Junie 2006. Skole is versoek om voorstelle vir wysigings aan die konsepgrondwet en ‘n ingevulde affiliasievorm in te dien. Skole is ook versoek om drie VRL-lede vir die geleentheid te nomineer.
1.1 Skole word hiermee uitgenooi om deel te neem aan die loods van die Wes-Kaap Verteenwoordigende Raad van Leerders (WKVRL). Die aangehegte registrasievorm moet ingevul word en aan die OBOS se VRL-koördineerder gestuur word.
1.2 Die loodsgeleentheid sal plaasvind op Donderdag, 15 Junie 2006 by His People Christian Worship Centre, N1-stad, Goodwood, Kaapstad.
2. Die Wes-Kaap Jeugkommissie (WKJK) het ‘n program gereël vir Vrydag, 16 Junie 2006 om die 30-jarige viering van Jeugdag te herdenk. Die VRL, as die jeugstruktuur van die WKOD, is genooi om deel te neem. VRL-lede wat die loodsgeleentheid bywoon, sal dus ook aan die program van die WKJK deelneem.
2.1 Die WKOD het met die WKJK samesprekings gevoer oor aangeleenthede soos veiligheid en beheer en is oortuig dat voldoende maatreëls getref is om leerders se veiligheid te verseker. Benewens die maatreëls wat deur die WKJK getref is, reël die WKOD vir ekstra toesig.
2.2 Die program vir Vrydag, 16 Junie 2006 sal plaasvind in Bonteheuwel en Langa onderskeidelik.
3. ‘n Konsepprogram vir die twee dae se gebeure is hierby aangeheg. Leerders moet op beide dae hulle skooluniforms aantrek en, waar van toepassing, hulle VRL-wapens dra.
4. Vervoer is gereël vir leerders van die OBOS’e Suid-Kaap & Karoo, Breederivier & Overberg en Weskus & Wynland (uitgesluit die areas Stellenbosch, Paarl en Wellington). Hierdie leerders sal Kaapstad toe vervoer word op Woensdag, 14 Junie 2006. Oplaaipunte en oplaaitye sal binnekort beskikbaar gestel word. Akkommodasie en maaltye is gereël tot Vrydag, 16 Junie 2006. Busse sal op Vrydag om 15:00 vanaf Kaapstad vertrek. Bagasie moet tot ‘n absolute minimum beperk word en waardevolle items moet tuis gelaat word.
5. Skole in die vier Metropool-OBOS'e, sowel as Stellenbosch, Paarl en Wellington word versoek om vervoer vir leerders op beide dae te reël.
6. Elke OBOS is versoek om een onderwyserskakelbeampte vir elke vyftien VRL-lede te reël om die leerders te vergesel. Daar sal dus ongeveer 200 onderwyserskakelbeamptes wees.
7. Leerders wat tans op die Tussentydse Provinsiale VRL-komitee dien, word beskou as deel van die amptelike afvaardiging van hulle OBOS'e, aangesien hulle mandaat deur die LUR vir Onderwys, mnr Cameron Dugmore, verleng is. Hulle sal die LUR ontmoet op Woensdagaand, 14 Junie 2006 en die Premier se toekenningsaand bywoon as gaste van die LUR. Die Tussentydse Provinsiale VRL-komiteelede uit die vier metropolitaanse OBOS'e sal dus ook geakkommodeer en vervoer word.
8. Bring asseblief die inhoud van hierdie minuut onder die aandag van alle belanghebbendes.


GETEKEN: D.R. SHEPHERD
HOOF: ONDERWYS
DATUM: 2006:06:08

Registrasie vorm  (grootte: 8 KB)
Program  (grootte: 11 KB)