1. Die Wes-Kaap Onderwysdepartement (WKOD) sal op 15 Junie 2006 die Wes-Kaap Verteenwoordigende Raad van Leerders (WKVRL) bekendstel. Die hoofdoel van die WKVRL sal wees om as skakel te dien tussen die VRL’e by skole aan die een kant en die WKOD en LUR vir Onderwys aan die ander kant. Die beoogde WKVRL is ‘n inisiatief van die LUR vir Onderwys, mnr Cameron Dugmore, as een van sy spesiale projekte. Die bekendstelling is beplan om saam te val met die dertigjarige viering van Jeugdag op 16 Junie.
2. By die VRL-konferensie in 2005, is ‘n Interim Provinsiale VRL-komitee verkies met die mandaat om die voorgestelde grondwet vir die WLVRL te finaliseer. Die Interim Provinsiale VRL-komitee het die tweede konsep van die grondwet op Vrydag, 12 Mei 2006 aan die LUR oorhandig. Die ingeslote tweede konsep is nou gereed om met VRL’e by skole bespreek te word. Dit is ongelukkig net in Engels beskikbaar.
3. Skole word versoek om te besluit of hulle by die WKVRL geafilieer wil wees of nie, na aanleiding van die WKVRL se oogmerke en doelwitte soos in die grondwet uiteengesit. VRL’e moet dus met hulle medeleerders beraadslaag ten opsigte van affiliasie met die WKVRL. Waar die leerders van die skool besluit om met die WKVRL te affilieer, moet die ingeslote aansoek om affiliasie voltooi en voorgelê word by die OBOS-vergadering wat hieronder genoem word. Die VRL-koördineerders van die OBOS moet op hulle beurt die voltooide affiliasievorms aan die Provinsiale VRL-koördineerder stuur teen nie later nie as 2 Junie 2006.
4. Skole word ook versoek om die grondwet te bestudeer sodat voorstelle ten opsigte van veranderinge/wysigings aan die konsep geformuleer kan word. Skole moet dan drie VRL-verteenwoordigers kies om die OBOS-vergadering by te woon waar hulle idees oor enige veranderinge/amendemente (op skrif ingedien) met ander skole in die OBOS gedeel sal word.
4.1 Die VRL-koördineerder by die OBOS’e sal skole inlig aangaande die datum, vergaderplek en tyd van die OBOS-vergadering Hierdie OBOS-vergaderings moet egter teen 31 Mei 2006 gefinaliseer word.
4.2 Die VRL-koördineerders van die OBOS’e word gevra om op hulle beurt die voltooide affiliasievorms aan die Provinsiale VRL-koördineerder te stuur teen nie later nie as 2 Junie 2006.
5. Om die kontinuïteit en vloeibaarheid van die proses te verseker, moet die drie VRL-verteenwoordigers wat die vergadering bygewoon het die skool by die bekendstellingplegtigheid verteenwoordig. Skole word dus aangemoedig om graad 12-leerders wat op die VRL dien toe te laat om hulleself behoorlik vir die komende finale eksamen voor te berei en eerder te konsentreer op graad 8- en 11-leerders wat betref die bywoning van die OBOS-vergadering en die bekendstellingplegtigheid.
6. VRL-lede wat die bekendstellingplegtigheid op 15 Junie bywoon, sal ook betrokke wees by die Jeugdagvierings (16 Junie) wat deur die Wes-Kaap Jeugkommissie (WKJK) gekoördineer word. VRL-lede sal egter onder toesig van die WKOD, sy beamptes en opvoeders wees.
7. Meer inligting aangaande die bekendstellingplegtigheid, vervoer en akkommodasie sal binnekort aan skole deurgegee word.
8. Die WKVRL sal binne drie maande na die bekendstelling sy uitvoerende lede en ampsdraers op ‘n spesiale vergadering verkies. Die LUR het, vir hierdie doel, die ampstermyn van die Interim Provinsiale VRL-komitee verleng.
9. Bring asseblief die inhoud van hierdie minuut onder die aandag van alle betrokkenes.


GETEKEN: D.R. SHEPHERD
HOOF: ONDERWYS
DATUM: 2006:05:18

Konsepgrondwet  (grootte: 20 KB)
Affiliasie vorm  (grootte: 7 KB)