1. Skole word weereens aangemoedig om programme te implementeer en geleenthede te organiseer om bewustheid van MIV/VIGS gedurende September op te skerp.
2. Die noodsaaklikheid daarvan om gesonde lewenstyle te bevorder ten opsigte van die seksualiteit en om skole en gemeenskappe te skep wat omgee vir diegene wat met Vigs geïnfekteer en daardeur geaffekteer is, is deur die Provinsiale Minister van Onderwys, Cameron Dugmore, sowel as deur Premier Rasool beklemtoon.
3. Skole, opvoeders en leerders word daarom aangemoedig om op MIV/VIGS-programme gedurende September te fokus en om programme en gebeurtenisse te ontwikkel as ‘n aanloop tot Wêreld-Vigsdag op 1 Desember. Die tema vir Wêreld-Vigsdag is "Stop VIGS. Hou woord".
4. Skole en hulle vennote in die gemeenskap (ouers, gemeenskaps- en geloofgebaseerde organisasies en plaaslike regering) moet daarna strewe om
  • die bewustheid van die toenemende voorkoms van MIV/VIGS en ander verwante kwessies in hulle gemeenskappe te verhoog, en akkurate inligting te verskaf om te help om die verspreiding te voorkom en die impak te verminder.

  • ‘n geleentheid vir opvoeders en leerders te skep om die interpersoonlike vaardighede te ontwikkel om MIV/VIGS aan te spreek soos kommunikasie, besluitneming, beslistheid en portuurleierskap.

  • aandag te gee aan diskriminasie en om ‘n skoolomgewing te skep wat vir almal omgee en almal ondersteun.

  • die gesindhede, waardes en verantwoordelike gedragspatrone wat van leerders, opvoeders en ouers verwag word, te bevorder en aandag te skenk aan kwessies soos kondome, vrywillige berading en toetsing, anti-retrovirale en alternatiewe behandeling, om maar net ‘n paar te noem.

  • ‘n plan van aksie vir die bestuur van MIV/VIGS in skole te ontwikkel.

5. Skole kan hierdie doelwitte bereik deur kreatiewe programme vir leerders, ouers en opvoeders te implementeer (sien onderstaande lys). Hierdie programme behoort nie tot kurrikulumgebaseerde aktiwiteite beperk te wees nie, maar behoort ook na buite-kurrikulêre aktiwiteite uitgebrei te word.
6. Sommige van die aktiwiteite wat skole kan onderneem is die volgende:
  • Sang- en drama-aanbiedings

  • Plakkaatkompetisies

  • Uitstal van plakkate in plaaslike winkelsentrums

  • Motiveringsprekers vanaf die OBOS, plaaslike gesondheidsklinieke, NRO’s, ens.

  • Vertoon van die skool se MIV/VIGS-plan van aksie in die skool se portaal

  • Onderlinge samewerking met ondersteuningsdienste en bronne in die skoolgemeenskap

  • ‘n Gemeenskapsondersoek om gesindhede van die jeug ten opsigte van MIV/VIGS, tienerswangerskappe, dwelms, ens. vas te stel

  • Die bevordering van ‘n positiewe leefstyl

  • Die maak van kwilts

  • Die maak van legkaarte

  • Werkswinkels vir ouers

  • Uitreikprojekte na huise en inrigtings vir mense wat met VIGS saamleef.

7. Die volgende MIV/VIGS-koördineerders is kontakpersone by die OBOS’e:
Metropool Sentraal    Lynne Herrmann  021 659 4300
Metropool Suid        Valery Jordaan  021 370 2072
Metropool Noord       Labeqa Abrahams 021 938 3065
Metropole Oos         Esmé Kleinveldt 021 900 7024
Weskus/Wynland        Janine Kearns   021 860 1200
Breederivier/Overberg Alister Adonis  023 348 4687
Suid-Kaap & Karoo     Lionel Pedro    044 874 3130
8. U entoesiastiese deelname aan programme gedurende die Skole-Vigsmaand sal hoog op prys gestel word.


GETEKEN: M.J. THERON
HOOF: ONDERWYS
DATUM: 2006:08:23