1. Ingesluit is ‘n kopie van die provinsiale verslag oor die 2004 graad 6 Sistemiese Evaluering asook ‘n CD wat die nasionale verslag van dieselfde evaluering bevat. Albei verslae onderstreep die belangrikheid van monitering en evaluering in die verskaffing van hoëgehalteonderwys. Hierdie verslae sal nuttige leiding verskaf ten opsigte van daardie strategieë en intervensies wat ontwerp is om ondersteuning aan skole te bied.
2. Dit is in u beste belang om die provinsiale verslag te bestudeer, aangesien dit nuttige inligting verskaf oor die vordering van die onderwysstelsel ten opsigte van die transformasiedoelwitte van toeganklikheid, gehalte, doeltreffendheid en gelykberegtiging, en hoe hierdie doelwitte leerderprestasie beïnvloed het.
3. Alhoewel die studie in 2004 gedoen is, is die bevindinge steeds relevant in 2006. Behalwe dat daar oor leerderprestasie op provinsiale vlak verslag gedoen is, is die bevindings verder opgebreek en per OBOS gerangskik. Beamptes in die ondersteuningsdienste oor die provinsie heen sal gebruik maak van die aanbevelings om skole te monitor en aan hulle ondersteuning te bied.
4. Met die lees van ‘n verslag van hierdie aard is dit maklik om die bevindings te oorvereenvoudig. Op grond van die diversiteit by skole is dit belangrik om krities te kyk na die onderskeie faktore wat bygedra het of nie bygedra het nie tot leerderprestasie. So bv. verskyn bywoning van preprimêre skole (bladsy 81) slegs sewentiende op die lys van korrelasies met leerderprestasie. Nogtans verklaar die dokument in paragraaf 5.4.16 (bladsy 93). dat leerders wat preprimêre skole bygewoon het gewoonlik beter presteer het. Dit dui aan dat ‘n mens na die bevindings vanuit verskillende hoeke moet kyk om die bydraende faktore te verstaan.
5. As ‘n mens op dieselfde analitiese wyse na aanduiders soos skoolveiligheid, dissipline, skoolgeld, klein klasgrootes en ouerbetrokkenheid en -persepsies kyk, besef jy dat daar baie faktore is wat leerderprestasie beïnvloed en dat ‘n deeglike studie van die dokument nodig is indien skole uit die sistemiese evaluering wil voordeel trek.
6. Ons beste wense vergesel u in al u pogings om gehalteonderwys in al ons skole te bevorder.


GETEKEN: L.J. ROSE
HOOF: ONDERWYS
DATUM: 2006:04:05


Die dokumente, waarna verwys word in die Minuut, is aan skole gestuur.