1. RAVO-Kollektiewe Ooreenkoms 8 van 2003, wat handel oor die Geïntegreerde Gehaltebestuurstelsel (GGBS) beklemtoon voortgesette opleiding, ontwikkeling en ondersteuning vir alle opvoeders t.o.v. hulle persoonlike groeiplanne. Opleiding en ontwikkeling is die verantwoordelikheid van die individu, die inrigting en die OBOS. Die planne, stelsels en strukture vir voortgesette professionele onderwyser-ontwikkeling behoort hierdie verantwoordelikheid te weerspieël. Daar moet voorsiening gemaak word vir die prioriteitsbehoeftes van alle opvoeders sodat die algemene gehalte van onderwys kan verbeter.
2. In die geval van opvoeders wat swak presteer het, soos aangedui in hulle prestasieassesseringsaanslag, behoort spesiale reëlings getref te word deur die ontwikkelingsondersteuningsgroepe (OOG’s) en die personeelontwikkelingspanne om te verseker dat gefokusde, behoeftegebaseerde opleiding en ondersteuning aangebied word om verbeterde prestasie te bevorder. Voortgesette swak prestasie kan uiteindelik lei tot ontslag ingevolge die Wet op die Indiensneming van Opvoeders.
3. Die WKOD het alle skole voorsien van ? riglyndokument wat die verifieerbare getuienis uitspel wat aanleiding gee tot ? bepaalde gradering vir elk van die prestasiestandaarde. Hierdie dokument mag ook gebruik word as ? aanduiding van die “beste praktyk” wat elke opvoeder behoort na te streef. Prinsipale word aangeraai om hierdie dokument beskikbaar te stel aan opvoeders en om professionele besprekings aan die gang te sit oor die praktyke soos onder elke kriterium gelys is.
4. Die Geïntegreerde Gehaltebestuurstelsel se koördineerders sal gedurende 2006 besprekingsessies met prinsipale in alle kringe oor bogenoemde riglyndokument hou. Prinsipale sal weer op hulle beurt hierdie inligting met hulle opvoederpersoneel moet deel. Die doelwit is om te verseker dat alle opvoeders ? deeglike begrip het van wat van hulle verwag word, en om soveel subjektiwiteit as moontlik van die assesseringsproses te elimineer. Daarbenewens sal dit die misverstand uit die weg ruim dat opvoeders ? hoë merietegradering verdien omdat hulle die basiese take wat van hulle verwag word, gedoen het. Goeie en uitstekende merietegraderings behoort slegs toegeken te word wanneer die opvoeder die verwagtings van die OOG en die kliënte oortref het.
5. Die Direktoraat Gehalteversekering sal monitor of die lewering van opleiding, ontwikkeling en ondersteuning in ooreenstemming is met die verwagtings waarna hierbo verwys is. GGBS-koördineerders sal inrigtings ondersteun ten opsigte van al die bogenoemde prosesse.
6. Bring asseblief die inhoud van hierdie minuut onder die aandag van alle belanghebbende opvoeders.


GETEKEN: L.J. ROSE
HOOF: ONDERWYS
DATUM: 2006:01:18