1. Ons is nou in die ontwikkelingsfase van die 2006-siklus van die Geïntegreerde Gehaltebeheerstelsel (GGBS). Die basislynevaluerings van opvoeders wat die stelsel vir die eerste keer implementeer is ook afgehandel en hulle behoort ook op hulle ontwikkeling te fokus.
2. Ons soek deurentyd na maniere om die proses te verfyn. Dit moet uitloop op verbeterde gehalte in die lewering van onderwys. Die oogmerk is dus van hierdie jaar af aan dat GGBS in die normale funksionering van die skool geïntegreer moet word.
3. Die WKOD het ‘n Prestasieaanwyserboek vir elke skool beskikbaar gestel om gedurende die normale funksionering te gebruik, spesifiek om onderrig en leer te verbeter.
4. Die Prestasieaanwyserboek is ‘n riglyndokument wat die verifieerbare bewyse spesifiseer wat uitloop op ‘n uitslag/gradering vir elk van die prestasiestandaarde. Gedurende waarneming van die opvoeder in die praktyk, behoort hierdie generiese verifieerbare bewyse, tesame met die leerarea-kundige van die ontwikkelingondersteuningsgroep (OOG), te verseker dat baie akkurater uitslae toegeken word. ‘n Meer objektiewe oordeel kan gemaak word omdat uitslae deur die beskikbare bewyse gestaaf sal moet word.
5. Dit is belangrik dat die prestasie van die opvoeder dwarsdeur die jaar in aanmerking geneem moet word wanneer die finale summatiewe evaluering afgehandel word, en nie net wat bereik is gedurende die week of maand van die oorsig nie.
6. Voortdurende moderering deur die prinsipaal en die skoolontwikkelingspan dwarsdeur die jaar is noodsaaklik sodat die uitslae en ontwikkelingsbehoeftes van die opvoeders duidelik gedefinieer kan word. Die Onderwysdepartement sal binnekort ‘n dokument beskikbaar stel oor Moderasieprosedures, wat deur die WKOD aan alle skole beskikbaar gestel sal word.
7. Die Prestasieaanwyserboek moet ook as ‘n aanduiding gebruik word van die “beste praktyk” waarna elke opvoeder behoort te streef.
8. Prinsipale word versoek om seker te maak dat die Prestasieaanwyserboek vir hulle personeel beskikbaar gestel word. Daar word aanbeveel dat die onderskeie standaarde en prestasiesaanduiders deur die hele personeel bespreek word.
9. Prinsipale word ook aangemoedig om afskrifte van die boek te maak sodat dit as ‘n naslaandokument deur die opvoeders gebruik kan word.
10. Ek vertrou dat die Prestasieaanwyserboek u van hulp sal wees om die gehalte van onderwys in die Wes-Kaap te verbeter.


GETEKEN: L. ROSE
HOOF: ONDERWYS
DATUM: 2006:05:17