1. Die Departement van Staatsdiens en Administrasie het, soos wat u reeds bewus is, met ingang van 1 Julie 2006 'n nuwe mediese skema vir regeringswerknemers (ingesluit opvoeders) geïmplementeer, wat bekend staan as die Mediese Skema vir Regeringswerknemers ( Government Employees Medical Aid Scheme (GEMS) ).
2. Ten einde hierdie mediese skema te implementeer, is 'n ooreenkoms met georganiseerde arbeid op 22 Junie 2006 onderteken waarin die volgende beginsels van die nuwe mediese skema uitgelig is:
  • Die oogmerk met die implementering van GEMS is om groter toegang tot mediese dekking te verseker deur bekostigbare mediese dekking vir alle werknemers te voorsien, veral werknemers met kleiner inkomstes.

  • Die mediese subsidie sal in ooreenstemming wees met die nuwe belastingstruktuur.

  • Werknemers sal aangemoedig word om by GEMS aan te sluit.

  • GEMS sal koste-effektiewe en langtermyn mediese dekking vir werknemers verseker.

  • Die mediese subsidie sal doeltreffend geadministreer word.

  • Die implementering van GEMS sal die werwing en behoud van professionele persone en werknemers met skaars vaardighede aanmoedig.

3. Alle werknemers wat vanaf 1 Julie 2006 nuut aangestel word, moet aan GEMS behoort ten einde 'n werkgewersubsidie met betrekking tot mediese dekking te ontvang.
4. Kontrakwerkers wat vir 'n aaneenlopende tydperk van ten minste 12 maande aangestel word, kwalifiseer ook vir lidmaatskap van GEMS.
5. 'n Werknemer wat voor 1 Julie 2006 in diens van die Staat was en wat die werkgewer se subsidie vir 'n geregistreerde mediese skema op 30 Junie 2006 ontvang het, sal steeds die werkgewersubsidie van 66.6% op die mediese bydraes ontvang, onderworpe aan 'n limiet van R1 014.00 per maand, mits die werknemer 'n lid van 'n geregistreerde mediese skema bly.
6. Werknemers wat na 1 Julie 2006 sonder onderbreking van lidmaatskap oorskakel van een mediese fonds na 'n ander mediese fonds, anders as GEMS, sal die subsidie van die Staat behou wat voor 1 Julie 2006 aan hulle betaal is.
7. Indien 'n werknemer op onbetaalde verlof is, sal sy/haar departement steeds die werkgewer se subsidie betaal, solank as wat die werknemer sy/haar bydrae betaal.
8. Aangesien die getekende Resolusie eers op 22 Junie 2006 ontvang is en die salarismaand van Julie 2006 op 30 Junie 2006 afgesluit het, sal die vereistes van Resolusie 1 van 2006 eers met ingang van 1 September 2006 op Persal geïmplementeer word.
9. Dit impliseer dat enige werknemer wat vanaf 1 Julie 2006 aangestel is en wat lid is van enige ander mediese skema as GEMS foutiewelik 'n werkgewersbydrae op die mediese skema sal ontvang, wat vanaf 1 September 2006 verhaal sal word.
10. 'n Werknemer wat tans lid is van 'n mediese fonds en na GEMS wil oorskakel, moet daarop let dat daar vooraf kennis gegee moet word van lidmaatskapbeëindiging by hul huidige mediese fonds en sommige mediese fondse vereis 3 maande kennis.
11. 'n Volledige uiteensetting van die werkgewer se mediese hulp met betrekking tot GEMS is in die aangehegte Bylae A uiteengesit.
12. Bring asseblief die inhoud van hierdie minuut onder die aandag van alle lede van u personeel.


GETEKEN: J.H. HURTER
HOOF: ONDERWYS
DATUM: 2006:11:09

Bylae A  (grootte: 8 KB)