1. Die toekenning van salarisvorderingskerwe moet op werkprestasie gebaseer wees. Ten einde die toekenning van die 1% salarisvordering (pay progression) met ingang van 1 Julie 2006 aan al die staatsamptenare van die WKOD op posvlakke 1 tot 12 te oorweeg, moet 'n afsonderlike Bylae E-vorm (afskrif aangeheg) ingevul word vir elke individu wat aan die vereistes voldoen en gebaseer op sy of haar werkprestasie gedurende die 1 April 2005 tot 31 Maart 2006 prestasiesiklus. Die ingevulde vorms moet hierdie kantoor so spoedig moontlik, maar nie later nie as 8 Augustus 2006, bereik en moet gestuur word aan Die Direkteur: Personeelbestuur (Staatsdiens), Afdeling Prestasiebestuur, by die adres wat onderaan hierdie bladsy verskyn.
2. Hoewel die Bylae E-vorms deel is van die stel PPBOS-dokumente wat jaarliks ten opsigte van elke staatsdienspersoneellid voltooi moet word en aan `n modereringsproses onderworpe is, sal die Bylae E-vorms vooraf apart hanteer word en die 1% sal toegestaan word aan diegene wat ten minste bevredigend presteer, mits dit so op die betrokke vorm aangedui word.
3. Gedurende die vorige siklus het die Departement groot moeite gehad om die Bylae E-vorms van komponente en inrigtings terug te kry. `n Dringende beroep word dus op u gedoen om asseblief te verseker dat u personeel se Bylae E-vorms so gou moontlik ingedien word.
4. Verdere kommunikasie oor die inhandiging van die res van die dokumente (Bylae A tot D en die motivering) ten opsigte van staatsamptenare vir die siklus soos in paragraaf 1 gemeld, sal binnekort uitgereik word.
5. Bring asseblief die inhoud van hierdie minuut onder die aandag van al die staatsamptenare onder u beheer.
6. U samewerking sal op prys gestel word.


GETEKEN: G.J. ELLIOTT
HOOF: ONDERWYS
DATUM: 2006:07:06

Bylae E  (grootte: 18 KB)