1. Die Wes-Kaap Onderwysdepartement (WKOD) het besluit om twee vakaturelyste vir 2007 uit te reik. Die vakaturelyste sal beide posvlak 1- en bevorderingsposte (insluitende prinsipaalsposte) bevat.
2. Hoofde van onderwysinrigtings en beheerliggame/rade word vriendelik versoek om seker te maak dat advertensies elektronies ingevul word op die konsepvakaturelys wat op die WKOD se webwerf beskikbaar sal wees by http://wced.wcape.gov.za
2.1 Advertensies moet elektronies ingedien word. Geen advertensievorms sal aanvaar word nie. Hoofde van onderwysinrigtings moet hul kringbestuurders raadpleeg indien hulle probleme sou ondervind met die invul van die advertensies op die konsepvakaturelys op die webwerf. Verwys asseblief na Minuut No. DPE/0010/2005 van 18 Julie 2005 (afskrif aangeheg) in hierdie verband. Hoofde van onderwysinrigtings wat nie toegang tot die webwerf kan verkry nie moet asseblief hul kringbestuurders skakel.
2.2 Die aanstellingsvereistes en prosedures met betrekking tot die vul van poste sal in die toepaslike vakaturelys aangedui word.

3. Die WKOD onderneem om, behalwe as daar buitengewone omstandighede is, by bostaande sperdatums te hou. Spesiale rëelings sal getref word om te verseker dat die sperdatums binne die verantwoordelikheidsfeer van die WKOD nagekom word. Om egter hierdie onderneming gestand te doen, is dit van kardinale belang dat alle betrokkenes saamwerk en by die onderskeie sperdatums hou. In hierdie verband word veral verwys na die sluitingsdatum vir die insleuteling van advertensies en vir die ontvangs van benoemings deur skoolbeheerliggame.
4. Die WKOD beskou die advertering en vul van opvoedersposte as 'n baie belangrike prosedure. Poste kan dus nie geadverteer word en dan nie gevul word nie as gevolg van skoolbeheerliggame of prinsipale se versuim om benoemings betyds in te dien. Geadverteerde poste wat nie gevul word nie skep 'n onaanvaarbare onstabiliteit in skole en die WKOD beskou sulke situasies in 'n baie ernstige lig. Die WKOD is vasbeslote om te verseker dat geadverteerde poste volgens die skedule vervat in paragraaf 6 hieronder gevul word.
5. Die WKOD se onderneming moet beskou word as 'n poging om hierdie belangrike taak binne die wetlike en arbeidsvoorskrifte en tot voordeel van almal te bestuur.
6. Die volgende tabel dui die beoogde datums van publikasie en ander belangrike datums aan:

AksieVakaturelys
1/20072/2007
WKOD open die elektroniese vakaturelys vir inrigtings17 Januarie 20074 Junie 2007
SLUITINGSDATUM VIR PRINSIPALE OM VAKATURES OP WEBWERF IN TE VOER02 Februarie 200715 Junie 2007
Kringbestuurders moet advertensies nagaan en verifieer 09 Februarie 200722 Junie 2007
WKOD moet vakaturelys druk en uitreik19 Februarie 200716 Julie 2007
SLUITINGSDATUM VIR ONTVANGS VAN AANSOEKE15 Maart 20076 Augustus 2007
WKOD stuur aansoeke aan skole16 April 200727 Augustus 2007
SLUITINGSDATUM VIR BEHEERLIGGAME/RADE OM NOMINASIES BY WKOD IN TE DIEN11 Mei 200721 September 2007
WKOD moet nominasies goedkeur4 Junie 200731 Oktober 2007
DATUM VAN AANSTELLING1 Julie 20071 Januarie 2008
7. Die samewerking van alle betrokkenes sal die suksesvolle bestuur van hierdie belangrike taak verseker en sal hoog op prys gestel word.


GETEKEN: C.J. FOURIE
HOOF: ONDERWYS
DATUM: 2006:12:04