1. Die Skoolbegrotingskompetisie het ‘n trotse tradisie geword van interaksie tussen die Lid van die Uitvoerende Raad (LUR) van die Departement van Finansies en Toerisme en leerders in die provinsie, en word oor die algemeen goed en entoesiasties deur skole en leerders ondersteun.
2. Die voorstelle wat gemaak word en gedagtes wat in die beste opstelle uitdrukking vind, het stof tot nadenke verskaf en is al in die LUR se jaarlikse Begrotingstoespraak voor die Provinsiale Parlement en die publiek gebruik. Soos u weet, behels hierdie toespraak die fiskale beleidsverklaring van die Provinsiale Regering.
3. As gevolg van hierdie jaar se plaaslike regeringsverkiesings, is die Provisiale Begrotingsdag vir 2006 vervroeg na 17 Februarie 2006. Dit blyk dat baie skole en leerders nie in ‘n posisie is om binne die gegewe tydsbestek aan hierdie kompetisie deel te neem nie, aangesien leerders eers aan die einde van Januarie na die skole teruggekeer het.
4. As gevolg van die uiters swak deelname aan die Skoolbegrotingskompetisie – 2006 het LUR Brown ongelukkig besluit om hierdie jaar se program te kanselleer. Ons maak opreg verskoning teenoor daardie paar leerders en skole wat ‘n poging aangewend het om ‘n inskrywing in te dien.
5. Ons vertrou dat ons volgende jaar die gewone hoë en breë standaard van deelname sal hê, sodat ons weer aan daardie skole en leerders erkenning sal kan gee wat ons van die beste voorstelle voorsien om saam te neem op die pad vorentoe. Begrotings gaan oor groei en die ontwikkeling van hierdie land op die beste moontlike manier en aangesien vandag se leerders die erfgename van môre is, is dit wenslik dat ons hulle insette ook moet kry.
6. Bring asseblief die inhoud van hierdie Logistiekediensteminuut onder die aandag van alle betrokke leerders.


GETEKEN: J.H. LYNERS
HOOF: ONDERWYS
DATUM: 2006:02:20