1. Die Departement van Kuns en Kultuur, in samewerking met die Biblioteek- en Inligtingsvereniging van Suid-Afrika (LIASA) het besluit dat die week van 13 tot 18 Maart 2006 Suid-Afrikaanse Biblioteekweek sal wees. Tydens hierdie week sal Suid-Afrika biblioteek- en inligtingsdienste vier en bevorder deur die volgende tema te gebruik: Biblioteke as vennote in leer, nasiebou en ontwikkeling.
2. Met die oog op die toenemend belangrike rol van leer- en onderrigonder-steuningsmateriaal (LOOM) in uitkomsgebaseerde onderrig en leer, behoort onderwysers van die beskikbaarheid van biblioteekhulpbronne vir hierdie doel bewus te wees. As deel van die vierings van die Suid-Afrikaanse Biblioteekweek 2006 en die bevordering van die biblioteek- en inligtingsdiens van die WKOD word u en u personeel genooi om ‘n besoek te bring aan die EDULIS-biblioteek of sekere OBOS-bronnesentrums, vir oriëntasie en inligting aangaande hierdie dienste en die beskikbare gespesialiseerde biblioteekbronne. Groepbesoeke hoef nie beperk te word tot die tydperk 13 tot 18 Maart nie, maar kan gereël word om u en u personeel te pas.
3. Die EDULIS-biblioteek se Sentrale Versameling in Bellville en die OBOS-bronnesentrumversamelings in Mitchell’s Plain, Paarl, George, Worcester en Kuilsrivier het die volgende LOOM beskikbaar vir individuele uitleen deur onderwysers, of blokleen deur skole.
  • Inspirerende aktiwiteitsgebaseerde idees vir lesplanne, en vir geletterdheids- en syferkundige ontwikkeling (vele hiervan kan gekopieer word)

  • ‘n Wye reeks kurrikulumondersteuningsmateriaal

  • ‘n Baie groot versameling van onlangs gepubliseerde boeke oor bestuur en leierskap

  • Prikkelende materiaal ter ondersteuning van onderwysnavorsing en onderwysbeleidsontwikkeling

  • Materiaal wat huidige kritieke kwessies soos geletterdheid en syferkundigheid, inklusiwiteit, dissiplinêre en gedragsprobleme, differensiasie, MIV/Vigs en fetale alkoholsindroom dek.

  • Leerdergefokusde materiaal (prenteboeke en novelles vir leerders van alle ouderdomme vir gebruik gedurende leesperiodes), wat spesiaal geëvalueer en geresenseer is om onderwysers te help om stof vir hulle skoolbiblioteke uit te soek

  • Video’s, DVD’s, oudiokassette, CD’s, CD ROM’s en multimedia wat ‘n wye reeks onderwerpe insluit om klaskamerleer en -onderrig te verryk en te ondersteun.

4. Die volgende bibliotekarisse kan gekontak word in bogenoemde verband:
Susan Hanekom
EDULIS-biblioteek
Bellville
Tel: 021 957 9617
Ntombi Mngxuma
OBOS: Metropool-Suid
Brian O’Connell Bronnesentrum,
Mitchell’s Plain
Tel: 021 370 2084
Ina Heiberg
OBOS Weskus & Wynland
Bronnesentrum, Paarl
Tel: 021 860 1229
Sam Webber
OBOS: Suid-Kaap/Karoo 
Bronnesentrum
George
Tel: 044 803 8328
Janine Ontong
OBOS: Breederivier & Overberg
Bronnesentrum
Worcester
Tel: 023 348 4657
Cheryl Joseph
OBOS: Metropool-Oos
Bronnesentrum/EDULIS-takbiblioteek
Kuilsrivier
Tel: 021 900 5111
5. In die afwesigheid van ‘n funksionerende bronnesentum by die OBOS: Metropool-Sentraal en in reaksie op vele versoeke van opvoeders by skole in die distrik, is besluit om ‘n kollekteerpunt in te rig by EDUMEDIA in Mowbray vir skoolbloklenings van boeke wat van die EDULIS-biblioteek geleen is. Hierdie interimmaatreël sal van toepassing wees totdat ‘n bronnesentrum vir die OBOS: Metropool-Sentraalgebied tot stand gebring is.
6. Kyk asseblief na die aangehegte bylae vir ‘n reeks voorstelle oor hoe WKOD-skole Suid-Afrikaanse Biblioteekweek 2006 kan vier.


GETEKEN: F.A. BOOYSE
HOOF: ONDERWYS
DATUM: 2006:02:17

Moontlike aktiwiteite vir suid-afrikaanse biblioteekweek  (grootte: 11 KB)