1. Prinsipale/sentrumbestuurders en hoofopsieners se aandag word daarop gevestig dat die Tik-vraestel twee verpligte noukeurigheidstoetse bevat. Aan elke leerder sal die hoogste punt van die punte behaal vir die twee toetse wat aangepak is, toegeken word.

L.W.: Prinsipale/sentrumbestuurders en hoofopsieners word daarop attent gemaak dat die tydsbeperking vir die noukeurigheidstoetse in Tik, 10 minute is. Enige addisionele tyd wat toegelaat word, sal as 'n onreëlmatigheid beskou word.
2. Prinsipale/sentrumbestuurders en hoofopsieners word dringend versoek om sorg te dra dat die volgende reëlings in verband met die afneem van die Tik-eksamen noulettend nagekom word:
2.1 Die voorskrifte aan opsieners bepaal dat leerders 25 minute voor die aanvang van die eksamen tot die eksamenlokaal toegelaat moet word. Tik-leerders moet egter 35 minute vroeër tot die eksamenlokaal toegelaat word sodat hulle, nadat hulle in hul korrekte sitplekke sit, 10 minute lank op hul tikmasjiene kan oefen en dit vir die eksamen kan gereed kry. Leerders moet ongeveer 10 minute voor die aanvang van die eksamen met hierdie bedrywighede ophou, wanneer die eerste vraestelle aan hulle uitgedeel sal word.
2.2 Die eerste vraestel bestaan uit 'n snel-noukeurigheidstoets van 10 minute. Nadat die eerste vraestel uitgedeel is, moet die leerders 10 minute gegun word om die instruksies en die vraestel deur te lees en hulle vir die snel-noukeurigheidstoets gereed te maak. Tikpapier moet voor die aanvang van die snel-noukeurigheidstoets in die tikmasjiene geplaas word.
2.3 Onmiddellik nadat die eerste snel-noukeurigheidstoets afgeneem is, moet hierdie antwoordstelle deur die opsieners ingeneem word. Daarna moet 'n pouse van 15 minute toegelaat word. Leerders mag nie die eksamenlokaal gedurende hierdie pouse verlaat nie.
2.4 Die tweede vraestel duur 3 uur en bestaan uit 'n snel-noukeurigheidstoets van 10 minute en die res van die vrae. Nadat die tweede vraestel uitgedeel is, moet die leerders 10 minute gegun word om die instruksies en die vraestel deur te lees en hulle vir die snel-noukeurigheidstoets gereed te maak. Tikpapier moet voor die aanvang van die snel-noukeurigheidstoets in die tikmasjiene geplaas word.
2.5 'n Ervare Tik-onderwyser/es, wat nie noodwendig die betrokke leerders se tik-onderwyser/es hoef te wees nie, moet vir die volle duur van die eksamen in Tik in die eksamenlokaal teenwoordig wees sodat hy of sy die nodige instruksies aan die leerders kan gee wanneer om te begin tik en wanneer om op te hou. Hy of sy mag hulp verleen aan leerders wat probleme ondervind met hul tikmasjiene. (Aan sulke leerders moet addisionele tyd gelykstaande aan die tyd wat hulle weens faktore buite hul beheer verloor het, toegestaan word). Die onderwyser/es moet hom of haar egter streng bepaal by die reëls en instruksies wat op die snel-noukeurigheidstoets van toepassing is.
2.6 Hoofopsieners en leerders se aandag word pertinent daarop gevestig dat dit gebiedend noodsaaklik is dat leerders sorg dra dat hul volle eksamennommers op elke bladsy van die snel-noukeurigheidstoets sowel as die antwoordstelle aangebring word.
3. Na afloop van die Tik-eksamen moet opsieners, met behulp van die prinsipaal, die bladsye van die eerste sowel as van die tweede snel-noukeurigheidstoets binne-in die omslag van elke leerder se antwoordstel plaas. Dit kan nie oorbeklemtoon word nie dat hierdie taak met die uiterste versigtigheid uitgevoer moet word ten einde te verseker dat die korrekte snel-noukeurigheidstoetsbladsye in elke antwoordstel geplaas word.
4. Hoofopsieners moet daarop let dat slegs EEN puntestaat vir Tik voorsien sal word.
5. Prinsipale/sentrumbestuurders moet toesien dat tikmasjiene en tiklinte wat vir hierdie eksamen gebruik gaan word, in 'n goeie werkende toestand is. Hierdie opdrag moet asseblief stiptelik nagekom word ten einde te verhoed dat leerders werk van swak gehalte indien.
6. Soortgelyke reëlings moet toegepas word by die afneem van die interne Tik-eksamen.
7. In die geval van 'n kragonderbreking gedurende 'n Tik-eksamen, moet die volgende prosedure gevolg word:
7.1 Leerders moet in die tikkamer bly tot die kragtoevoer herstel word. Leerders mag nie met mekaar praat terwyl hulle wag dat die kragtoevoer herstel word nie. Die tyd wat tydens die kragonderbreking verloor is, moet as addisionele eksamentyd toegelaat word.
7.2 INDIEN DIE KRAGTOEVOER NA 'N HALFUUR NOG NIE HERSTEL IS NIE, MOET DIE EKSAMENSESSIE AFGELAS WORD EN SAL HERSKEDULEER WORD OP 'N DATUM SOOS OOREENGEKOM TUSSEN DIE DEPARTEMENT EN DIE BETROKKE SKOOL(E).
7.3 Die Direktoraat: Eksamens moet onverwyld van die kragonderbreking in kennis gestel word.
7.4 Die werk wat die leerders alreeds getik het, moet aan die Direktoraat: Eksamens gestuur word.
7.5 In gevalle waar daar twee tiksessies gedurende 'n eksamen voorkom, geld bogenoemde reëlings vir beide sessies.
7.6 Om 'n kragonderbreking te help voorkom, behoort prinsipale/sentrumbestuurders reëlings te tref dat elektriese toerusting (bv. in Metaalwerk-, Houtwerk- en Huishoudkunde lokale) nie gebruik word vir die tydsduur van die Tik-eksamen nie.
7.7 Indien 'n kragonderbreking gedurende die eerste sessie voorkom en die Tik-eksamen van die eerste sessie afgelas word, moet prinsipale/sentrumbestuurders die nodige reëlings tref om te verseker dat daar voor die aanvang van die tweede sessie hoegenaamd geen kontak tussen leerders van die eerste sessie en dié van die tweede sessie is nie.
7.8 Sodra 'n kragonderbreking voorkom, moet die prinsipaal/sentrumbestuurder onmiddellik die plaaslike owerhede daarvan in kennis stel en ook, indien moontlik, verneem hoe lank die kragonderbreking sal duur.
7.9 Alle elektriese apparate, bedrading, verlengingskoorde, muurproppe en muursokke by die skool moet nagegaan word ten einde te verseker dat dit in 'n goeie werkende toestand is. Dit sal verhoed dat kragonderbrekings deur defekte elektriese toerusting en installasies veroorsaak word.


GETEKEN: A.P. CLAUSEN
HOOF: ONDERWYS
DATUM: 2006:10:06