1. Aansoeke word ingewag van persone wat in November 2006 wil dien as nasieners van vakke (lys aangeheg) wat gedurende die Oktober/November 2006 Senior Sertifikaat-eksamen geskryf is.

Alle aansoeke moet per geregistreerde pos gestuur word, en die kwitansie wat deur die Poskantoor uitgereik word, moet behou word as bewys van versending. Ingevulde aansoekvorms (gemerk Vir aandag: mnr Mark Cameron) kan per hand ingedien word by die Direktoraat: Eksamens, 4de verdieping, Grand Central Towersgebou, waar ‘n kwitansie vir elke aansoek uitgereik sal word.
2. Die volgende kriteria geld by die aanstelling van nasieners:
2.1 Geen opvoeder wat `n vakslaagpersentasie van minder as 50% in die Senior Sertifikaat-eksamen van die vorige jaar behaal het en wat verbonde is aan `n inrigting wat in die Senior Sertifikaat-eksamen van die vorige jaar `n slaagpersentasie van minder as 40% behaal het, mag aangestel word as `n nasiener vir die Senior Sertifikaat-eksamen van die daaropvolgende jaar nie. (Onderwysers wie se prestasie van 50% of meer nie duidelik is in die resultate wat vir die Hoofkantoor beskikbaar is nie, op grond van die swak resultate van ander onderwysers in die vak by die skool, moet bewys lewer van die prestasies van die klas(se) wat hulle onderrig.)
2.2 Opvoeders wat die vak gedurende enige van die vorige drie jaar, byvoorbeeld 2006, 2005 en 2004 op graad 12-vlak onderrig het, mag aansoek doen.
2.3 Aansoekers moet beskik oor `n erkende driejarige na-Senior Sertifikaat-kwalifikasie wat die vak waarvoor aansoek gedoen word op tweede- of derdejaarsvlak insluit, of oor ander toepaslike na-Senior Sertifikaat-kwalifikasies.
2.4 Alle aansoekers moet in diens wees by inrigtings wat kandidate vir die Wes-Kaap Senior Sertifikaat-eksamen voorberei.
2.5 Ten einde te verseker dat die funksionering van die inrigting nie nadelig deur die afwesigheid van opvoeders geraak word nie, sal nie meer as 30% van die opvoeders by `n betrokke inrigting as nasieners aangestel word nie. Die finale besluit oor watter opvoeders as nasieners aangestel kan word, berus by die WKOD.
2.6 Die WKOD ondersteun die Wet op Diensbillikheid en aanstelling as nasiener sal in ooreenstemming wees met die Departement se Diensbillikheidsplan. Dit is dus noodsaaklik dat aansoekers hulle ras en geslag op die aansoekvorm moet aandui.
2.7 Aansoekers wat aangedui het dat hulle van voorneme is om te bedank of af te tree en hulle diens by die WKOD teen 29 September 2006 te beëindig, sal nie vir aanstelling oorweeg word nie.
2.8 Geen onderwyser wat met siekteverlof is in die nasientydperk mag nasien nie.
2.9 'n Aansoeker moet ‘n afsonderlike aansoekvorm voltooi vir elke vraestel waarvoor hy of sy aansoek doen.
2.10 Gewaarmerkte afskrifte van hoogste kwalifikasies wat aandui watter vakke die aansoeker bestudeer het, moet elke aansoekvorm vergesel. Aansoekvorms wat nie deur gewaarmerkte afskrifte van uitslae vergesel word nie, sal nie oorweeg word nie. Geen uitsonderings sal in hierdie verband gemaak word nie, en geen korrespondensie sal met aansoekers daaroor gevoer word nie.
2.11 Interne moderatore van die WKOD wat oorweeg wil word as nasieners van Senior Sertifikaat-skrifte, moet ook daarvoor aansoek doen.
2.12 Skoolhoofde mag aansoek doen om as nasieners te dien. Dit is egter nie wenslik vir skoolhoofde om aan die einde van `n jaar van die skool af weg te wees nie aangesien hulle in hierdie besige tyd vir die bestuur van hulle skole verantwoordelik is. Die keuring van skoolhoofde as nasieners sal derhalwe, onder andere, aan die volgende voorwaardes onderworpe wees:

  • Na die verstryking van die keerdatum vir die indiening van aansoekvorms, sal al die skoolhoofde se aansoeke aan die OBOS-direkteure vir aanbeveling voorgelê word.

  • ‘n Primêre oorweging sal wees of `n skool tydens die nasienperiode optimaal sal kan funksioneer in die afwesigheid van die skoolhoof.

  • Gepaste reëlings moet getref word vir ‘n personeellid om as prinsipaal waar te neem.

  • Die skool moet in staat wees om sonder die hoof se kundigheid en leiding te kan funksioneer en die skool se leerderbevorderingsproses moet nie bedreig word deur die prinsipaal se afwesigheid nie.

3. Aansoekprosedure:
3.1 Aansoeke moet ingedien word op die aangehegte voorgeskrewe aansoekvorm, wat ook verkrygbaar is by 
Hoof: Onderwys 
Wes-Kaap Onderwysdepartement 
Direktoraat: Eksamens
Kamer 4-13
Grand Central Towers
Laer Parlementstraat
KAAPSTAD
8001	
Webtuiste: http://wced.wcape.school.za/circulars
3.2 Alle navrae, hetsy per telefoon of skriftelik, moet gerig word aan die Direktoraat: Eksamens en NIE direk aan eksaminatore nie. Kontak mnr M Cameron by tel. 021 467 2964, mnr N. Riddles by tel. 021 467 2992 of Me B Calvert by tel. 021 467 2994 of, faks 021 461 5628 of stuur 'n e-pos aan: Michael Cameron by mgcameron@pgwc.gov.za, Brownwyn Calvert by bcalvert@pgwc.gov.za of Norman Riddles by nriddles@pgwc.gov.za
3.3 Afskrifte mag van die aangehegte vorm gemaak word. Behoorlik voltooide aansoekvorms moet die Direktoraat: Eksamens teen nie later nie as 24 Mei 2006 bereik. Aansoeke mag onder geen omstandighede direk aan eksaminatore gestuur word nie. Aansoeke wat na die sluitingsdatum ontvang word, sal nie oorweeg word nie.
3.4 Alle aansoekvorms moet onderteken word deur die prinsipaal (in die geval van opvoeders) of die direkteur, die hoofkurrikulumadviseur van die OBOS of die hoofkurrikulumbeplanner: VOO (in die geval van prinsipale, senior kurrikulumbeplanners, hoofkurrikulumadviseurs en kurrikulumadviseurs).
3.5 Ongetekende aansoeke sal nie oorweeg word nie. Die onus rus op aansoekers om te verseker dat die voltooide aansoekvorm hierdie kantoor voor of op die sluitingsdatum bereik.
3.6 Aansoekers moet asseblief hul ete-voorkeure op hulle aansoekvorms aandui en daarop let dat die WKOD geen ete-voorkeurveranderinge tydens die nasienperiode kan akkommodeer nie.
4. Reëlings vir die nasientydperk
4.1 Alle nasienwerk word verrig by `n sentrale plek in of naby Kaapstad, soos deur die WKOD bepaal.
4.2 Daar word beoog dat die nasien van eksamenskrifte om 07:30 op Donderdag 30 November 2006 `n aanvang sal neem en om 18:00 op Woensdag 6 Desember 2006 ten einde loop. Die datums sal later bevestig word.
4.3 Daar sal van nasieners verwag word om skrifte vir minstens 8 uur per dag na te sien. Dit sluit middagetes en teetye uit. Die nasiensentrum sal gedurende die nasienperiode daagliks van 06:00 tot 22:00 toeganklik wees. Nasieners moet alle take by hulle skole afgehandel het, nasienwerk ingesluit, voordat met die nasienwerk begin word.
4.4 Die nasientarief vir elke vraestel sal so gou moontlik bekend gemaak word. Elke moderator, eksaminator en nasiener, sal ooreenkomstig die Inkomstebelastingwet belas word.
4.5 Dit is noodsaaklik dat prinsipale, OBOS-direkteure, kringbestuurders en kurrikulumadviseurs die inhoud van hierdie minuut onder die aandag van alle opvoeders bring, insluitend diegene wat met verlof is. Hierdie Direktoraat aanvaar geen verantwoordelikheid daarvoor as opvoeders nie oor die inhoud van hierdie eksamenminuut ingelig word nie.
5. Aangesien die nasien van Senior Sertifikaat-eksamenvraestelle vir opvoeders `n uiters waardevolle en lonende ondervinding is, poog die WKOD om toe te sien dat nasienpanele elke jaar nuwe nasieners insluit. Verder is diensbillikheid ook `n baie belangrike oorweging. Alle opvoeders wat kwalifiseer om na te sien, word daarom aangemoedig om aansoek te doen. Prinsipale en kurrikulumadviseurs word ook versoek om bevoegde onderwysers aan te moedig om aansoek te doen.
6. Prinsipale moet ontvangs van hierdie eksamenminuut erken op die aangehegte vorm wat hierdie kantoor voor 11 Mei 2006 moet bereik.


GETEKEN: A.P. CLAUSEN
HOOF: ONDERWYS
DATUM: 2006:05:02

Lys van vakke  (grootte: 11 KB)
Aansoekvorm  (grootte: 23 KB)
Ontvangserkenning  (grootte: 32 KB)