1. Die hoofdoel van 'n grondlynassessering is dat 'n onderwyser kan vasstel wat leerders alreeds weet (vorige leer) en om hierdie inligting te gebruik om die onderrigprogram te rig sodat die verskillende behoeftes en vermoëns van leerders in gedagte gehou word. Dit verskaf ook 'n beginpunt waarvandaan die vordering van individuele leerders bepaal kan word.
2. Grondlynassessering vind gewoonlik plaas aan die begin van 'n graad of fase. In graad 1 word dit nie aangewend om te bepaal of 'n voorskoolse/graad R-leerder gereed is of nie om in te skryf nie, maar wel wanneer die leerders reeds ingeskryf is.
3. In 2006 het die WKOD 'n provinsiale Grondlynassesseringsprogram vir graad 1-leerders ingestel as deel van die Geletterdheid- en Syferkundigheidstrategie. Die program het die leerders oor 'n tydperk van 15 dae geassesseer volgens graad R-assesseringstandaarde, terwyl hulle georiënteer is tot hulle nuwe leeromgewing.
4. Graad 1-onderwysers behoort vanaf 17 Januarie 2007 tot 6 Februarie 2007 dieselfde 15-daagse Grondlyn-assesseringsprogram te implementeer met die volgende in gedagte:
  • Onderwysers kan aanpassings maak aan die Program, gebaseer op die behoeftes van hulle leerders.

  • Onderwysers mag die program in minder as 15 dae afhandel indien al die leerders geassesseer is.

  • Gedurende hierdie tyd moet die fokus van die program op assessering en nie op onderrig en leer wees nie. Die inligting wat versamel word, moet gebruik word as 'n verwysingspunt vir die toekoms.

  • Onderwysers moet die program nie tot langer as 15 dae rek nie.

5. In 2007 sal 'n diensverskaffer 'n ondersoek van 'n ewekansige steekproef van skole onderneem om die sterk punte, uitdagings en impak van die Grondlynassesseringsprogram te bepaal. Aanbevelings wat uit hierdie ondersoek spruit, sal vir implementering in 2008 oorweeg word.
6. Skole wat verdere bystand of inligting rakende graad 1 se grondlynassessering in 2007 benodig, moet hulle OBOS se Grondslagfase-kurrikulumadviseurs kontak.
7. Prinsipale en Grondslagfase-departementshoofde word versoek om die inhoud van hierdie minuut onder die aandag van alle graad 1-onderwysers te bring voor die einde van die huidige skooljaar sodat leerprogramme en werkskedules aangepas kan word om hierdie proses te akkommodeer.


GETEKEN: J.P. RAULT-SMITH
HOOF: ONDERWYS
DATUM: 2006:11:14