Vanaf Januarie 2007 sal die Nasionale Kurrikulumverklaring van graad R tot graad 11 in werking wees. Skole en onderwysdepartement moet tyd toelaat vir die bou van kurrikulumkundigheid en moet seker maak dat take aan onderwysers toegeken word in dié areas waarin hulle sterk is.

Prinsipale moet, as kurrikulumbestuurders van hulle skole, hulle personeel bestuur en ontwikkel sodat die personeel kundiges word in die area van die kurrikulum wat hulle onderrig. 'n Personeelontwikkelingsprogram sal die skool help om vanuit 'n vaste grondslag ontvanklik en paraat te wees vir verandering. Die plan sal onderwysers help om hulself toe te rus in nuwe areas. Formele onderrig is beskikbaar deur middel van tweejaar-, deeltydse GSO-kursusse. In sommige gevalle kan onderwysers vergoed word vir die koste van hierdie kursusse na suksesvolle aflegging daarvan.

Navorsing dui daarop dat onderwysers by die afhandeling van hulle opleiding 'n rukkie neem voordat hulle vertroue het dat hulle aan die vereistes van die vak voldoen. Hulle behoort gevolglik

• die geleentheid gegun te word om 'n vaste grondslag te skep in die bepaalde vak/leerarea en graad voordat hulle 'n nuwe area en/of graad aanpak;

• 'n mate van bevoegdheid op te bou in die leerarea wat aan hulle toegeken is; en

• vir ten minste 3 jaar by 'n graad te bly in gevalle waar hulle opleiding ontvang het of betrokke is by kurrikulumprojekte, bv. om taal of gesyferdheid te verbeter.

Dit hou in dat onderwysers

• in die graad bly en nie normaalweg van een jaar na die volgende saam met hulle klasse deur 'n fase beweeg nie;

• die bevoegdheid van elke leerder aan die begin van 'n nuwe jaar assesseer;

• nie onnodig rondgeskuif word en gevolglik geforseer word om elke jaar opnuut te beplan en hulpbronne te soek nie. Die rondskuif van 'n onderwyser, buiten in buitengewone omstandighede, is onaanvaarbaar.

Ondersteuning vir hierdie medium- tot langtermynbeplanning kan verkry word van kurrikulumadviseurs en kringbestuurders.