1. Die Nasionale Minister van Onderwys het besluit dat daar weer vanjaar intensiewe monitering van al die eksamenprosesse van provinsiale onderwysdepartemente moet plaasvind. Dit sluit in onaangekondigde besoeke aan eksamensentrums om te verseker dat alle prosedures behoorlik uitgevoer word.
2. Verteenwoordigers van die volgende drie instansies sal die eksamenprosesse moniteer:

  • Die WKOD: Net soos in die verlede, sal kringbestuurders, lede van multifunksionele spanne of die Direktoraat: Kurrikulumontwikkeling kontroleer dat die prosesse korrek gehanteer word.

  • UMALUSI - Die Raad vir Kwaliteitsversekering in Algemene en Verdere Onderwys en Opleiding

  • Die Nasionale Departement van Onderwys
3. Die monitors van UMALUSI, lede van multifunksionele spanne en die Nasionale Departement van Onderwys is spesiaal vir die doel aangestel en sal nie noodwendig vergesel wees van WKOD-amptenare nie. Lede van multifunksionele spanne sal nie noodwendig net in hulle eie kringe monitor nie. Spanlede sal identifikasiedokumente in hulle besit hê en sal alle eksamenprosedures, byvoorbeeld die werklike skryf van die eksamen in die eksamenlokale, die toesighouding en die bewaring van vraestelle in kluise, kontroleer.
4. Geen persoon mag toegelaat word om sonder bevredigende identifikasie 'n eksamensentrum te betree nie. Indien daar enige twyfel oor 'n persoon se identiteit bestaan, moet die hoof van die inrigting onverwyld met die Direkteur: Kurrikulumontwikkeling me J Rault-Smith by 021 467 2622, die Direkteur: Eksamenadministrasie mnr AP Clausen by 021 467 2945, mnr TJ Magwaca by 021 467 2626 of mnr J Parbhoo by 021 467 2572 in verbinding tree.
5. Die WKOD ondersteun hierdie moniteringsproses en is oortuig daarvan dat die eksamenprosesse in sy skole met integriteit gehanteer word. Hoofde van die betrokke inrigtings word dus ernstig versoek om in alle opsigte met die monitors saam te werk.
6. Monitors is gevra om aan te meld by die kantoor van die hoof van die inrigting wanneer hulle kom en weer wanneer hulle vertrek. Hoofde van inrigtings is versoek om die moniteringsinstrument te onderteken en ook om te verseker dat die monitor die boek oor die daaglikse gebeure by die skool voltooi.
7. Aangeheg is die moniteringsinstrumente (Bylae A en Bylae B) wat deur monitors gebruik sal word wanneer hulle eksamensentrums besoek.


GETEKEN: J.P. RAULT-SMITH
HOOF: ONDERWYS
DATUM: 2006:09:19

Bylae A  (grootte: 55 KB)
Bylae B  (grootte: 36 KB)