1. Die nasionale Departement van Onderwys sal in 2007 volledige eksamens vir graad 11-leerders afneem, d.w.s. al die eksamenvraestelle vir hierdie groep leerders sal op nasionale vlak opgestel word. Die vraestelle vir die letterkunde-afdeling van die amptelike tale vir graad 11-leerders sal egter deur die onderskeie provinsiale onderwysdepartemente opgestel word.
2. Die Wes-Kaap Onderwysdepartement (WKOD) nooi hiermee persone uit om aansoek te doen om die poste van eksaminators en interne moderators wat letterkundevraestelle vir graad 11-leerders vir 2007 moet opstel vir die aangehegte lys tale (BYLAE A).
3. Aansoeke word ingewag van vakkundiges en opvoeders wat beskik oor 'n erkende 3-jaar postmatriekkwalifikasie, wat die betrokke taal op derdejaarsvlak moet insluit, en wat ten minste drie jaar se onderwyservaring op Senior Sertifikaatvlak binne die afgelope vyf jaar verkry het. Omvangryke kennis van en ondervinding in onderwysprogramme en assesseringspraktyke aan VOO-skole, ondervinding in die opstel en/of nasien van vraestelle vir die Senior Sertifikaat-eksamen en kennis van die Nasionale Kurrikulumverklarings sal sterk aanbevelings wees.
4. Aansoeke op die aangehegte aansoekvorm (BYLAE B) moet vergesel word van gewaarmerkte afskrifte van die aansoeker se kwalifikasiesertifikate, uitslagverslae waarop aangedui word watter vakke geslaag is en 'n kort brief van die aansoeker waarin daar aangedui word waarom die WKOD hom of haar behoort te oorweeg. Alle aansoeke moet teen 29 September 2006 by een van die volgende adresse ingehandig word: pre>Posadres: Direkteur: Eksamens Vir aandag: Mnr G Poole (4de Vloer) Wes-Kaap Onderwysdepartement Privaatsak X9114 KAAPSTAD 8000
Aflewerings per hand: Direkteur: Eksamens Vir aandag: Mnr G Poole (4de Vloer) Wes-Kaap Onderwysdepartement Grand Central Towers Laer-Parlementstraat KAAPSTAD
5. Alle suksesvolle aansoekers sal vir 'n tydperk van een jaar aangestel word en moet bereid wees om onder druk te werk aangesien hierdie vraestelle gemodereer en by die WKOD ingedien moet word voor 30 Maart 2007.
6. Bring asseblief die inhoud van hierdie minuut onder die aandag van alle betrokke onderwysers.


GETEKEN: J.P. RAULT-SMITH
HOOF: ONDERWYS
DATUM: 2006:09:14

Bylae A  (grootte: 7 KB)
Bylae B  (grootte: 6 KB)