1. Die verbetering van Grondslagfase-leerders se geletterdheids- en syferkundigheidsvlakke is 'n groot prioriteit en staan sentraal tot die WKOD se Geletterdheid-en-syferkundigheidstrategie.
2. In 2005/2006 het die Direktoraat: Kurrikulumontwikkeling intensiewe 3-dag kursusse oor Vroeë Geletterdheid en Vroeë Syferkundigheid vir graad R-onderwysers aangebied ten einde hulle en hulle skole te ondersteun om ontluikende geletterdheids- en syferkundigheidskennis, -vaardighede, -gesindhede en -waardes in graad R-leerders te ontwikkel. Die aanvraag na die kursusse en die positiewe terugvoer het daartoe gelei dat hulle weer van 26 tot 28 Spetember 2006 aangebied word.
3. Die kursusse het ten doel om
  • 'n bewustheid en begrip te bevorder van die belangrikheid van ontwikkelingsgepaste sygferkundigheids- en geletterdheidsonderwyservaring vir verdere sukses in hierdie areas.

  • die onderwysers se vermoë om vroeëgeletterdheids- en -syferkundigheidskennis, -vaardighede, -gesindhede en -waardes aan graad R-leerders te onderrig sodat leerders voorbereid is op die kurrikulum van graad 1 – 3.

4. Aan die einde van hierdie kursusse sal deelnemers in staat wees om die volgende te doen:
  • Begryp die konsep van ontluikende geletterdheid/syferkundigheid

  • Ondersoek alle uitkomsgebaseerde assesseringstandaarde vir graad R in die Tale-/Wiskunde-leerarea, met spesifieke verwysing na ontluikende geletterdheids-/syferkundigheidsontwikkeling in 'n nieformele onderrig-en-leerprogram wat op speel en aktiewe leer gegrond is

  • Beskryf hoe die integrasie van onderrig en leer oor 3 leerprogramme heen die ontwikkeling van ontluikende geletterdheid/syferkundigheid ondersteun

  • Ontwerp geïntegreerde graad R-onderrig- en -leeraktiwiteite wat gegrond is op die NKV en wat ontluikende geletterdheids- en syferkundigheidskennis, -vaardighede, -waardes en -gesindhede ontwikkel

  • Inkorporeer geletterdheids-/syferkundigheidsbeplanning in die daaglikse program van 'n nieformele omgewing wat speel, ontdekking en aktiewe leer ondersteun

  • Identifiseer algemene leerstoornisse wat ‘n uitwerking het op die ontwikkeling van ontluikende geletterdheid/syferkundigheid

  • Beskryf ten minste 3 daaglikse kernaktiwiteite wat op ‘n daaglikse rooster/program vir graad 3 vereis word, wat noodsaaklik is vir die bevordering van geletterdheids-/syferkundigheidsontwikkeling

5. Vroeëgeletterdheidskursusse sal in al 7 OBOS'e aangebied word, maar Vroeësyferkundigheidskursusse sal slegs in 5 OBOS'e aangebied word. Besonderhede van die Vroeëgeletterdheidskursusse word in Bylae A gegee en besonderhede vir die Vroeësyferkundigheidskursusse is in Bylae B.
6. Graad R-onderwysers wat tans in WKOD-geregistreerde klasse onderrig, kan die kursusse bywoon wat in hulle OBOS'e aangebied word. Deelname aan 'n kursus is egter vrywillig en registrasies per kursus sal beperk word tot 'n maksimum van slegs 32 onderwysers.
7. OBOS'e kan na goeddunke óf 'n algemene uitnodiging aan hulle skole rig, óf dié skole nooi wat aan die OBOS se voorafbepaalde kriteria voldoen, bv. afstand vanaf die lokaal en blootstelling aan ander opleidingskursusse. OBOS'e sal skole binnekort skakel en alle ingevulde registrasies moet aan die OBOS teruggestuur word voor of op 8 September 2006.
8. Wanneer 'n onderwyser aanvaar en geregistreer is vir 'n kursus, sal hy of sy verplig wees om dit by te woon. Indien hy of sy versuim om dit te doen, kan die onnodige uitgawes van die skool verhaal word. Enige navrae met betrekking tot registrasie en kursusaangeleenthede moet gerig word aan die betrokke OBOS-koördineerder soos aangedui in Bylae A en B.
9. Onderwysers wie se registrasies goedgekeur is, kan vir hulle vervoerkoste eis. Die volgende eenmalige subsidie sal betaal word, mits die WKOD 'n korrek ingevulde eisvorm by die lokaal ontvang.
  • 20 tot 50 km in geheel oor die 3 dae: R75-00

  • 51 tot 75 km in geheel oor die 3 dae: R85-00

  • 76 tot 100 km in geheel oor die 3 dae: R95-00

  • +100 km in geheel oor die 3 dae: R100-00

10. Onderwysers word versoek om seker te maak dat hulle ingevulde eisvorms, met al die inligting daarop korrek en gewaarmerk, voor die einde van die kursus ingedien word by die lokaalbestuurder. Die volgende inligting word vereis vir die verwerking van vervoereise:
  • Persal-nommer (indien van toepassing)

  • ID-nommer

  • Reisafstand in kilometer van u huis na die lokaal

  • Bankbesonderhede van alle werknemers van skoolbeheerliggame, ingedien om die toepaslike vorm en gestempel deur die betrokke bank

Laat en foutiewe eisvorms sal nie aanvaar word nie.

11. Ligte verversings sal gedurende die oggend en tydens middagete bedien word.
12. Die Direktoraat: Kurrikulumontwikkeling verwelkom hierdie geleentheid om graad R-onderwysers te ondersteun in die belangrike rol wat hulle speel in die ontwikkeling van 'n sterk grondslag vir geletterdheid en syferkundigheid in ons jongste leerders.


GETEKEN: J.P. RAULT-SMITH
HOOF: ONDERWYS
DATUM: 2006:08:15

Bylae A: Vroeëgeletterdheidskursusse  (grootte: 19 KB)
Bylae B: Vroeësyferdkundigheidskursusse  (grootte: 19 KB)