1. Omsendbrief 0066/2005 van November 2005 en Kurrikulumontwikkelingminuut DCD/0013/2006 van Februarie 2006 en DCD/0033/2006 van Maart 2006 verwys na die oriënteringskursusse in die NKV wat vir onderwysers van graad 8 en 9 gehou gaan word.
2. Baie onderwysers het van 10 - 14 Julie 2006 kursusse bygewoon, maar, soos voorheen aangedui, sal al die kursusse in elk van die agt leerareas ook in September 2006 aangebied word. Hierdie kursusse is gemik op dié graad 8- en 9-onderwysers wat 'n tweede leerarea aanbied.
3. Skole het in April onderwysers vir die Julie- en September-kursusse geregistreer. Prinsipale word versoek om die registrasie van die onderwysers vir die September-opleiding te bevestig deur die aangehegte lys in te vul en in te handig. Let asseblief daarop dat onderwysers die lys moet teken.
4. 'n Aantal onderwysers wat vir die Julie-kursusse geregistreer het, het dit nie bygewoon nie. Dit het op onnodige uitgawes vir die WKOD uitgeloop omdat materiaal vir hierdie onderwysers gedruk is, geskikte lokale gehuur is, maaltye voorberei is, ens. Daar is aangedui dat onderwysers wat geregistreer het maar nie die kursus bywoon nie, die koste van die opleiding sou moes betaal. Aangesien opleiding egter vir September beplan word, word 'n geleentheid nou aan dié onderwysers gebied wat vir Julie geregistreer het maar nie die kursus bygewoon het nie, om na die September-kursus oorgeplaas te word. Let daarop dat geen verdere geleenthede geskep kan word vir onderwysers om wel die kursus by te woon nie. Onderwysers wat na September wil oorskakel word vriendelik versoek om hulle name op die aangehegte registrasievorm in te vul.
5. In die lig van die huidige kommer dat graad 10-leerders nie behoorlik voorberei is op graad 10 nie, word onderwysers wat nog nie die kursus bygewoon het nie ten sterkste aangeraai om dit wel by te woon. Die oriëntering sal vanaf 26 tot 29 September 2006 plaasvind.
6. Prinsipale word versoek om die aangehegte registrasievorm (Bylae A) in te vul en om dit teen 18 Augustus 2006 aan hulle OBOS te faks of e-pos. Gebruik asseblief die volgende onderwerpopskrif indien u 'n e-pos stuur: Graad 8 en 9 NKV oriëntering. Bylae A: Gr 8 & 9 September 2006.
7. Navrae oor die opleidingskursusse kan gerig word aan die hoofkurrikulumadviseur by die betrokke OBOS of aan mnr Jerome Gordon by Hoofkantoor by telefoonno. 021 467 2566 of by e-posadres jegordon@pgwc.gov.za
8. Bylae C bevat die skakelbesonderhede van die OBOS'e.
9. Die aangehegte Bylae B voorsien 'n lys van lokale vir die graad 8 & 9 NKV-oriënteringskursusse per OBOS.
10. Prinsipale word aan die volgende herinner:

  • Die programme word aangepas by die behoeftes van graad 8- en 9-onderwysers wanneer die NKV in 2007 in graad 8 en 9 geïmplementeer word.

  • Daar sal slegs vir onderwysers wat deur middel van voorafregistrasie hulle bewoning bevestig het, voorsiening gemaak word m.b.t. kursusmateriaal en verversings.

  • Let asseblief daarop dat alle werkswinkels daagliks om 08:00 sal begin en om 16:00 sal klaarmaak, buiten op Vrydag, wanneer die werkswinkel om 12:00 sal afsluit.

  • Ligte verversings sal voorsien word.

  • Vervoereise vir WKOD-betaalde opvoeders moet by die werkswinkel ingevul word.

  • Deelnemers word versoek om die dokumente wat in paragraaf 12 aangedui word, asook 'n pen en papier saam te bring.
11. Bywoningsertifikate sal mettertyd aan onderwysers uitgereik word wat

  • bewys van hulle Persal-nommers (WKOD-werknemers) of hulle ID-nommers (SBL-werknemers) voorsien deur 'n fotostaat van 'n salarisstrokie of ID-dokument in te handig; en

  • vir die volle duur van die kursus teenwoordig is en die bywoningsregister daagliks onderteken.
12. Ten einde die maksimum voordeel uit die werkswinkel te put, word onderwysers dringend versoek om die volgende dokumente voor die werkswinkel te bestudeer:

  • Die Overview of the Revised National Curriculum Statement (Beleid)

  • Die Leerareaverklaring (Beleid) vir die leerprogram wat hulle sal ontwikkel

  • Die Onderwysersgids by die Ontwikkeling van Leerprogramme vir die leerprogramme wat hulle sal ontwikkel.

Onderwysers moet hierdie dokumente na die September-kursusse saambring.
13. Die OBOS'e sal skole in kennis stel na watter lokale hulle onderwysers moet gaan.
14. U ondersteuning sal waardeer word.


GETEKEN: J.P. RAULT-SMITH
HOOF: ONDERWYS
DATUM: 2006:08:03

Bylae A  (grootte: 22 KB)
Bylae B  (grootte: 21 KB)
Bylae C  (grootte: 13 KB)