1. Graad 9-assesseringstake vir Wiskunde
1.1 Die Wiskunde-kurrikulumadviseurs by die OBOS'e sal by ‘n klustervergadering gedurende hierdie kwartaal (tweede kwartaal) ‘n afskrif van elk van 2 boeke met voorbeelde van graad 9-assesseringstake uitdeel aan ‘n Wiskunde-onderwyser van elke skool met graad 9-klasse.
1.2 Hierdie boeke het ten doel om onderwysers van graad 9-wiskunde te help om standaarde te stel en om aan hulle voorbeelde te gee van die verskillende assesseringvorms wat deur die Nasionale Protokol oor Assessering vereis word.
1.3 Die voorbeelde is van onderwysers verkry gedurende die verifikasieproses in 2005 en is gedruk soos wat hulle van die skole ontvang is. Onderwysers wat hierdie assesseringstake in hulle klasse wil gebruik, moet dit dus nagaan vir foute.
1.4 Indien u skool nie die boeke teen die einde van die tweede kwartaal ontvang het nie, skakel asseblief met die Wiskunde-kurrikulumadviseur by u OBOS.
1.5 Kurrikulumadviseurs beoog om gedurende 2006 meer voorbeelde van onderwysers te ontvang, sodat nog ‘n boek in 2007 gedruk kan word. Assesseringstake wat elektronies ingedien word, sal op die kurrikulumwebblad geplaas word: http://curriculum.wcape.school.za onder Mathematics (GET) in 2007.
1.6 Die WKOD bedank die onderwysers wat assesseringstake in 2005 ingehandig het.
2. CD met Wiskundevoorbeelde ter toeligting
2.1 Gedurende die NKV-oriënteringskursus vir graad 8 en 9 van 10 tot 14 Julie sal ‘n Wiskunde-onderwyser van elke skool ‘n CD ontvang waarvoor die onderwyser moet teken.
2.2 Die CD gee voorbeelde ter toeligting vir elk van die NKV Wiskunde-assesseringstandaarde van graad R tot 9 om onderwysers te help met die interpretasie van die Assesseringstandaarde.
2.3 Onderwysers word daarop gewys dat hierdie voorbeelde ter toeligting slegs ‘n riglyn is en dat die CD nie die handboek vervang nie. Indien ‘n onderwyser slegs die voorbeelde op die CD sou bespreek, sal die leerders nie die kurrikulum deeglik genoeg gedek het nie.

Die WKOD hoop dat hierdie materiaal onderwysers sal help met die implementering van die NKV in 2007.



GETEKEN: T. SMIT
HOOF: ONDERWYS
DATUM: 2006:05:05