1. In ooreenstemming met Kurrikulumminuut 0091/2005 sal die formaat van die deurlopende-assesseringskomponent en die finale eksamen vir Ekonomie vanaf Januarie 2006 in ooreenstemming met die Nasionale Riglyne wees.
2. Die volgende aspekte word toegelig en moet saam met die Nasionale Assesseringsriglyne vir Ekonomie gelees word:
3. DIE FINALE SKRIFTELIKE EKSAMEN (Nasionale Assesseringsriglyne vir Ekonomie, bladsy 3)
3.1 Die puntetoekenning van 400 vir die Hoërgraad en 300 vir die Standaardgraad bly onveranderd. Die tydsduur van die vraestel bly ook drie uur. Dit is belangrik om daarop te let dat die volgorde van die tipe vrae wat in die verlede gestel is, as volg verander is:

Afdeling A (vir die Hoër- en Standaardgraad) bestaan nou nie net uit veelkeusevrae nie, maar sluit ’n verskeidenheid van kort feitevrae (bv. veelkeuse, waar of vals, kies die korrekte woord, ens.). Dit is belangrik om kennis te neem van die aantal items wat oor die verskillende modules gestel sal word.

Afdeling B vir die Standaardgraad behou dieselfde formaat as tevore. Die tipe vrae, wat nou op verskillende kognitiewe vlakke volgens ’n voorgeskrewe tabel gestel sal word, is egter gewysig.

Dit is belangrik om daarop te let dat die tipe vrae wat in Afdeling B en C in die Hoërgraadvraestel voorgekom het, verander het. Afdeling B sal nou die direkte vrae bevat, terwyl Afdeling C die indirekte (ongestruktureerde) “opsteltipe” vrae sal bevat.

3.2 Die sillabusdekking en -gewigte (verwys na bladsy 5) is ook gewysig. Onderwysers moet kennis neem van die verskillende kognitiewe vlakke waarvolgens die vraestelle opgestel sal word (paragraaf 4.4).

3.3 Met verwysing na die uitbreiding van die leerplanne (paragraaf 4.5, bladsy 7 tot 15) is subtiele veranderinge aangebring, wat noukeurig in werking gestel moet word.
4. DEURLOPENDE ASSESSERING (DASS)
4.1 Die DASS sal steeds 25% van die finale bevorderingspunt uitmaak. Die samestelling van die verskillende DASS-items is gewysig en onderwysers moet van die veranderinge kennis neem en hulle in werking stel.
4.1.1 Formele Voorbereidende Eksaminering: Die formele voorbereidende eksamen maak 20% van DASS uit vir die Hoërgraad en 15% vir die Standaardgraad.
4.1.2 Kontroletoetse (paragraaf 5.1.1): Twee kontroletoetse moet in DASS ingesluit word, naamlik die eerste kwartaal kontroletoets en die Junie-ekamen.

Die minimum puntetoekenning vir Hoërgraad is 130 punte en 100 punte vir Standaardgraad. Die samestelling van die toets en die standaard van die vrae moet soortgelyk wees aan die finale eksamenvraestel, naamlik Afdeling A, B en C (Hoërgraad) en Afdeling A en B (Standaardgraad).

Die Junie-eksamen moet dieselfde samestelling, tydstoewysing en puntetoekenning as die Voorbereidende/Septembereksamen hê soos bepaal in paragraaf 4 van die Nasionale Assesseringsriglyne. Dit dek egter net die werk wat tot op daardie stadium afgehandel is. Vir die opsteltipe afdeling (HG) word drie vrae gestel, waarvan die leerder twee moet beantwoord. Geen keuses vir die ander vrae (HG en SG) word toegelaat nie.

4.1.3 Ander vorme van assessering (Verwys na paragraaf 5.1.2)
  • Aanbieding of Gevallestudie

  • Dit word aanbeveel dat leerders ’n mondelinge aanbieding OF ’n gevallestudie doen wat 50 punte tel. Die aanbieding moet deur middel van ’n geskikte assesseringsmatriks (verwys na Oorgangsriglyne, bladsy 45) geassesseer word. Die gevallestudie kan deur middel van ’n kombinasie van ’n assesseringsmatriks en memorandum nagesien word.

  • Opdragte: Ten minste TWEE.

  • ’n Opdrag kan bestaan uit òf ’n vakvaardigheidsopdrag òf ’n huidige ekonomiese onderwerp òf ’n kombinasie van beide. Opdragte kan ook ’n gevallestudie wees en behoort grafieke en berekeninge in te sluit.

    Alle opdragte moet 50 punte tel en moet met ’n assesseringsmatriks, ’n memorandum of ’n kombinasie van beide nagesien word.

  • Navorsingsprojek: EEN navorsingsprojek wat 100 punte tel, omgeskakel na 20 punte vir HG en 15 punte vir SG.

  • Die projek moet slegs met behulp van ’n assesseringsmatriks nagesien word. (Onderwysers mag die een wat voorheen in die DASS-oorgangsriglyne, bladsy 38 – 40, verskyn het of enige ander geskikte asseseringsmatriks gebruik wat die voorgestelde kriteria toepas.)

Voorbeelde van geskikte aanbevole take met meegaande assesseringsmatrikse, sowel as ’n profielvorm vir elektroniese puntestate, is beskikbaar op die Ekonomie-webtuiste (Resources-bladsy) by  http://curriculum.wcape.school.za/site/28/res/view  en sal gedurende die eerste kwartaal van 2006 deur die OBOS-kurrikulumadviseurs met onderwysers bespreek word tydens die klusterstandaardvasstellingsvergaderings.

4.1.4 Dit word aanbeveel dat ’n soortgelyke DASS-program vir Graad 11 in 2006 geïmplementeer word.
4.1.5 Skedule vir die voltooiing van DASS take

Elke OBOS-kurrikulumadviseur sal per kluster ’n haalbare modereringskedule met die onderwysers beding om die vereiste DASS-items vir die jaar te kan voltooi en modereer.

5. Skoolhoofde word versoek om te verseker dat die inhoud van hierdie kurrikulumminuut onder die aandag van Ekonomie-vakhoofde en -onderwysers gebring word.


GETEKEN: J.P. RAULT-SMITH
HOOF: ONDERWYS
DATUM: 2006:02:13