1. Paragraaf 9 van An Interim Policy Framework for the Assessment and Promotion of Learners in Grade 9 (Staatskoerant No. 25699, gedateer 7 November 2003) bepaal dat skoolgebaseerde deurlopende assessering (DASS) 75% van die finale uitslag van graad 9-leerders sal uitmaak en dat die gemeenskaplike taak vir assessering (GTA) 25% van die finale uitslag sal uitmaak.
2. Skole word hiermee in kennis gestel dat die GTA in 2006 sal bestaan uit ‘n enkele afdeling wat grootliks ooreenstem met die oorspronklike Afdeling A van die GTA. Die oogmerk is dat leerders die materiaal en die nodige hulpbronne ten volle sal gebruik. Die GTA kan dus nie beskou word as ‘n “finale eksamen” nie.
3. Die GTA’s word tans gemodereer en sal teen die einde van die tweede kwartaal aan die provinsiale onderwysdepartemente gestuur word om gedruk te word. Skole sal dus gedurende die derde kwartaal afskrifte van die GTA’s ontvang.
4. Skole moet hulle eie roosters opstel vir die afhandeling van die GTA’s gedurende die loop van die vierde kwartaal. Afskrifte van die rooster moet aan die kringbestuurder vir bestuursdoeleindes gestuur word en aan die hoofkurrikulumadviseur met die oog op monitering en moderering.
5. Skole word herinner dat daar 3 fases van moderering is: 
Eerste kwartaal:           Standaardstelling
Tweede en derde kwartale:  Ontwikkeling en ondersteuning
Vierde kwartaal:           Finale moderering
6. Ten einde te verseker dat onderrig en leer in graad 9 tot aan die einde van die kwartaal voortduur, kan skole portefeuljes met een onafgehandelde taak indien vir moderering. Besonderhede van die taak wat nog afgehandel moet word, moet egter by die onderwyser se portefeulje ingesluit word, met ‘n aanduiding van die datum waarop die taak afgehandel sal word. Kurrikulumadviseurs kan die finale taak modereer en sal, waar van toepassing, dienooreenkomstig reëlings met die skole tref.
7. Prinsipale word vriendelik versoek om alle onderwysers wat graad 9-leerders onderrig van die inhoud van hierdie minuut in kennis te stel.


GETEKEN: T.C. SMIT
HOOF: ONDERWYS
DATUM: 2006:04:26

Government Gazette No. 25699  (grootte: 515 KB)