1. Met die instelling van die nuwe uitkomsgebaseerde kurrikulum in Januarie 2006 in graad 10, het dit nodig geword om te besin oor die manier waarop ons vraestelle opstel. Dit is belangrik om te erken dat onderrig met die oog op uitkomste 'n invloed sal hê op onderrig- en leerstyl en op assesseringspraktyke. In die toekoms sal eksamens die leerdergesentreerde benadering moet versterk, wat die kern van die NKV is.
2. In die NKV sal daar nie meer aparte eksamenvraestelle vir Hoër- en Standaardgraad wees nie. 'n Enkele vraestel moet opgestel word wat differensiasie in die vraestel voorsien. Differensiasie sal verseker dat die eksamenvrae toeganklik is vir alle leerders en dat die vraestel voorsiening maak vir 'n reeks vermoëns en vir leerderprestasie.
3. Die VOO NKV-handleiding by die Opstel van Eksamenvraestelle sal onderwysers help om hulle eie toepaslike eksamenvraestelle op te stel en insig gee oor hoe die eksterne eksamens opgestel sal word. Die handleiding stel stappe voor wat gevolg kan word by die opstel van die eksamenvraestelle. Dit voorsien idees vir verskillende soorte en vorme vrae om verskillende leerstyle, veelvuldige intelligensies, verskillende kognitiewe vlakke en verskillende moeilikheidsgrade te akkommodeer. Dit voorsien ook 'n kontrolelys vir die eerste modereringsvlak, d.w.s. interne, skoolgebaseerde moderering, wat by alle skole toegepas moet word.
4. Prinsipale moet asseblief seker maak dat 'n afskrif van die handleiding, wat aan alle skole gestuur sal word, aan alle onderwysers op die personeel beskikbaar gestel word.
5. Indien onderwysers bykomende ondersteuning nodig het, moet hulle met die betrokke kurrikulumadviseur by hulle OBOS skakel.


GETEKEN: J.P. RAULT-SMITH
HOOF: ONDERWYS
DATUM: 2006:11:29


Die dokumente, waarna verwys word in die Minuut, is aan skole gestuur.