1. Die volgende logistieke reëlings is goedgekeur om te verseker dat die 2005-skool jaar ordelik ten einde loop.
2. Die Nasionale Minister van Onderwys het aangekondig dat die 2005-Senior Sertifikaat-eksamenuitslae vir alle provinsies op Donderdag, 29 Desember 2005 bekendgemaak sal word.
3. Om te verseker dat die Wes-Kaap Onderwysdepartement die resultate gereed het teen daardie datum, moet die nasien van die eksamenskrifte op Donderdag, 1 Desember 2005 ‘n aanvang neem.
4. Die vierde kwartaal eindig op Vrydag, 2 Desember 2005 vir leerders en op Dinsdag, 6 Desember 2005 vir opvoeders (Minuut no LS/28/2004).
5. Aangesien die laaste skooldag vir almal van graad R tot graad 11 Vrydag, 2 Desember is, moet die interne jaareindassessering as volg verloop:
5.1 Graad R tot 7

Graad R tot 7-opvoeders mag hulle dokumentasie vir Deurlopende Assessering (DASS) sowel as hulle vorderingskedules in die laaste week van November 2005 voltooi, aangesien hierdie leerders nie eksamen hoef te skryf nie.
5.2 Graad 8

Toetse wat intern geskryf word as deel van die DASS in graad 8 moet gedurende die normale skoolure geskryf word tussen Donderdag, 3 November 2005 en Dinsdag, 22 November 2005.
5.3 Graad 9

Die Algemene Take vir Assessering (AAT’s) moet gedurende die normale skoolure gedoen word en afgehandel wees teen Maandag, 21 November 2005. (Minuut No: CD/66/2005)
5.4 Graad 10 en 11

By sekondêre skole mag eksamens geskryf word oor ‘n maksimumtydperk van 14 dae. Die interne eksamens vir graad 10 en 11 moet geskryf word tussen Donderdag, 3 November 2005 en Dinsdag, 22 November 2005. Dit is om te verseker dat die nodige prosedures afgehandel is en dat die dokumentasie betyds gereed is vir voltooiing van die moderering en bevordering deur die multifunksionele span van die OBOS, d.w.s. teen Maandag, 5 Desember 2005. Alle eksamenroosters moet aan die betrokke OBOS-direkteur voorgelê word vir die finale goedkeuring.
6. Eksamenreëlings vir graad 12-leerders
6.1 Die Senior Sertifikaat-eksamen begin op Maandag, 10 Oktober 2005 en eindig op Woensdag, 23 November 2005 (Omsendbrief no 0049/2005)
6.2 Die laaste dag van skoolbywoning vir graad 12-leerders voor die aanvang van die Senior Sertifikaat-eksamen is Woensdag, 5 Oktober 2005. Dit moet beklemtoon word dat kandidate onder die gesag van die skool bly totdat die eksamen op Woensdag, 23 November 2005 eindig.
6.3 Let asseblief daarop dat die einddatum van die eksamen verleng kan word indien daar enige probleme gedurende die eksamen voorkom. Kandidate sal onder gesag van die skool bly tot die verlengde finale datum.
7. DASS-prosedures
7.1 Leerderprofiele en -portefeuljes vir moderering en bevordering moet vir OBOS-multifunksionele spanne beskikbaar wees teen die einde van die skooljaar.
7.2 Bewyse van assessering en die rekord daarvan is bepalende faktore wanneer besluite oor leerderbevordering aan die einde van die skooljaar geneem moet word.
7.3 Al die betrokkenes moet die belangrikheid van geverifieerde, bygewerkte en volgehoue profiele en portefeuljes besef, aangesien dit die leerder se vordering deur die jaar weerspieël.
7.4 Alle graad 12-DASS-punte moet gemodereer word en na die OBOS aangestuur word om dit teen nie later nie as Woensdag, 26 Oktober 2005 te bereik.
8. Leerderveiligheid aan die einde van die jaar
8.1 Die veiligheid van elke leerder is altyd van die grootste belang. Skole word versoek om veiligheidsmaatreëls as prioriteit met al die personeellede te bespreek wanneer die beplanning vir die einde van die jaar gedoen word.
8.2 Ouers van leerders en lede van die beheerliggaam moet skriftelik in kennis gestel word van die reëlings vir die einde van die jaar, asook van die skool se veiligheidsplanne vir die leerders.
8.3 Ouers van leerders moet skriftelik in kennis gestel word van enige veranderings aan die reëlings asook van gevalle waar hulle kinders nie die reëlings waarop ooreengekom is, handhaaf nie.
8.4 Die rolle, verantwoordelikhede, besluite, reëls en moontlike gevolge daarvan indien daar nie beplan word vir leerderveiligheid nie moet aan alle opvoeders, leerders en ander rolspelers verduidelik word.
8.5 Diensverskaffers aan die gemeenskap, bv. verkeersbeamptes, munisipale polisie, verskaffers van skoolvervoer en taxibestuurders moet ingelig word aangaande die skool se planne vir die einde van die jaar sodat hulle, indien nodig, van hulp kan wees.
8.6 Riglyne moet verskaf word vir funksies aan die einde van die jaar en alle aspekte van veiligheid en verantwoordelikheid moet onder die aandag van alle leerders gebring word.
8.7 Alle leerders van graad R tot graad 11 is onder verpligting om die skool by te woon tot op die laaste dag vir leerders, naamlik Vrydag, 2 Desember 2005, soos op die skoolkalender aangedui.
8.8 Elke skool is daarvoor verantwoordelik om die skoolprogram vir die tydperk na die eksamen tot op die laaste skooldag so te beplan dat die leerders konstruktief betrokke is. Daar word voorgestel dat hierdie program die volgende aktiwiteite, onder andere, kan insluit:

  • leerderhersiening en terugvoer oor die eksamens

  • voortgesette onderrigondersteuning vir leerders wat leerstoornisse ervaar
  • die voortsetting van die skool se sportprogram
  • die voortsetting van die kunste en kultuur-program
  • ‘n lewensvaardighedeprogram, bv. beroepsinligting, skadudiens, gassprekers, markdag, persoonlike bemagtigingsessies
  • ‘n skoolverrykingsprogram bv. ‘n vasvra vir elke graad, debatte, pret en plesier, gemeenskapsdiens
  • veldwerktoere en ander opvoedkundige uitstappies


GETEKEN: DR SHEPHERD
HOOF: ONDERWYS
DATUM: 2005:09:22