1. Die Geïntegreerde Gehaltebeheerstelsel (GGBS) vir skoolgebaseerde opvoeders word tans geïmplementeer en skole waar die grondvlak-evaluerings reeds ‘n aanvang geneem het, of selfs afgehandel is, word daarvoor bedank. Grondvlak-evaluerings van alle Wes-Kaap Onderwysdepartement (WKOD)-opvoeders verbonde aan alle inrigtings MOET teen die einde van die eerste kwartaal van 2005 afgehandel wees. Let daarop dat elke skool so gou doenlik die oorsiglys waarop sy vorderingsvlak aangedui word, by die betrokke kringbestuurder moet indien. Hierdie statistieke sal die WKOD in staat stel om kringe te identifiseer wat in lyn is met die Bestuursplan, soos uiteengesit in MHO-minuut 062/2004.
2. Die prinsipaal, in samewerking met die personeelontwikkelingspan, is primêr verantwoordelik vir die volgende:
2.1 Implementering en monitering van die GGBS ingevolge RAVO-resolusie 8/2003, waardeur die integrasie van bestaande gehaltebeheerprogramme in onderwys verseker word
2.2 Implementering en monitering van die GGBS in ooreenstemming met die Bestuursplan, soos uiteengesit in MHO-minuut 062/2004
2.3 Versekering dat elke opvoeder sy of haar persoonlike groeiplan (PGP) met behulp van sy of haar ontwikkelingsondersteuningsgroep (OOG) geformuleer het
2.4 Saamstel van die skoolverbeteringsplan (SVP), gebaseer op die voltooide instrumente en die ooreengekome graderings, sowel as die PGP’s van elke opvoeder. (Die skool en die OBOS is gesamentlik aanspreeklik vir die versekering dat Indiensonderwys-en-opleidings (IDOO)-programme volgens die behoeftes van opvoeders geïmplementeer word.)
2.5 Oorlegpleging met die betrokke kringbestuurder aangaande moontlike implementeringsprobleme
3. Let daarop dat ALLE WKOD-opvoeders binne die omvang van die GGBS val en hulle dus MOET onderwerp aan 'n assessering, die grondvlak-evaluering waarvan teen die einde van Maart 2005 voltooi moet wees.
4. Sodra die grondvlak-evaluering voltooi is en opvoeders hulle ontwikkelings- en ondersteuningsbehoeftes aangedui het, sal die eerste siklus (kwartaal 2) van die ontwikkeling (ondersteuning en mentorskap) deur die OOG ‘n aanvang neem. In die meeste gevalle sal ontwikkeling en ondersteuning van opvoeders op skoolvlak voorsien word. Die OBOS sal egter toepaslike opleiding verskaf in gevalle waar die GGBS-proses 'n opleidingsbehoefte as algemeen dwarsdeur die hele OBOS-distrik geïdentifiseer het.
5. Alle IDOO-programme, asook ondersteunings- en ontwikkelingstrategieë, sal behoeftegedrewe in ooreenstemming met die Menslikehulpbronstrategie van die WKOD wees. Indien u meer inligting benodig, moet asseblief nie huiwer om met u kringbestuurder of die GKBS-koördineerder by u plaaslike OBOS in verbinding te tree nie.


GETEKEN: L.J. ROSE
HOOF: ONDERWYS
DATUM: 2005:01:25