1. Skole of klusters skole word weer eens aangemoedig om gedurende September van hierdie jaar programme en geleenthede oor MIV en VIGS aan te bied.
2. Die noodsaaklikheid daarvan om ‘n gesonde lewenstyl te bevorder en om skole en gemeenskappe te skep wat omgee vir diegene wat aan VIGS ly en daardeur beïnvloed word, is deur beide die Provinsiale Minister van Onderwys, Cameron Dugmore, en Premier Rasool beklemtoon.
3. Ten einde bogenoemde te ondersteun, word skole, opvoeders en leerders aangemoedig om nie net gedurende September op MIV- en VIGS-programme te fokus nie, maar om ook programme en geleenthede dwarsdeur die jaar aan te bied, wat sal uitloop op die Wêrelddag vir VIGS op 1 Desember 2005.
4. Skole, klusters skole en ouergemeenskappe moet poog om die volgende te doen:

  • Groter bewusmaking van die groei in die voorkoms van MIV en VIGS in ons gemeenskappe en die voorsiening van korrekte inligting ten einde die verspreiding en inpak daarvan te bekamp

  • Voorsiening van ‘n geleentheid vir opvoeders en leerders om die interpersoonlike vaardighede te ontwikkel wat noodsaaklik is om MIV en VIGS te hanteer – byvoorbeeld kommunikasie, besluitneming, selfgelding en portuurleierskap

  • Gee aandag aan diskriminasie en skep ‘n deernisvolle skoolomgewing wat ondersteunend teenoor almal is

  • Kweek gesindhede en waardes wat sal help om die verspreiding van MIV en VIGS te bekamp

  • Moedig verantwoordelike gedrag onder leerders, opvoeders en ouers aan ten einde die verspreiding van MIV en VIGS te voorkom.

  • Ontwikkel ‘n aksieplan vir die bestuur van MIV en VIGS in skole.
5. Skole en klusters skole kan hierdie doelwitte bereik deur kreatiewe programme (sien onderstaande lys) vir leerders, ouers en opvoeders aan te bied. Sulke programme hoef nie noodwendig tot kurrikulumgebaseerde aktiwiteite beperk te word nie. Die aanbieding van buite-kurrikulêre programme, word ook aangemoedig.
6. Die volgende aktiwiteite kan deur skole of klusters skole vir die VIGS-maand vir Skole oorweeg word:

  • Lied- en drama- aanbiedinge

  • Plakkaatkompetisies

  • Skep van ‘n skoolkalender met motiverende boodskappe

  • Uitstalling van plakkate in plaaslike winkelsentrums

  • Motiverende sprekers van die OBOS, plaaslike gesondheidsklinieke, NRO’s, ens.

  • Uitstalling van die VIGS-beleid vir Skole en/of die skool se Aksieplan in die skool se voorportaal

  • Skakeling met ondersteuningsdienste en hulpbronne in die skoolgemeenskap

  • Vestiging van ‘n raadgewende gesondheidsraad

  • Afneem van ‘n gemeenskapsmeningspeiling om gesindhede van die jeug teenoor MIV en VIGS, tienerswangerskap, dwelms, ens. te bepaal

  • Programme om positiewe en gesonde lewenstyle aan te moedig

  • Kwiltmakery

  • Maak van legkaarte as geskenke vir minderbevoorregte kinders

  • Maak van VIGS-linte

  • Gemeenskapsuitreikprogramme na minderbevoorregte kinders, families en gemeenskappe.
7. Indien u hulp met die organisasie van ‘n geleentheid of ‘n program benodig, skakel gerus met die MIV-en-VIGS-koördineerder by u skool of die volgende MIV- en -VIGS koördineerders by die OBOS’e: 
Metropool-Sentraal:      Lynne Herrmann   Tel. 021 659 4300
Metropool-Suid:          David Stephens   Tel. 021 370 2072
Metropool-Noord:         Labeqa Abrahams  Tel. 021 938 3065
Metropool-Oos:           Esmé Kleinveldt  Tel. 021 900 7024
Weskus & Wynland:        Janine Kearns    Tel. 021 860 1200
Breederivier & Overberg: Alister Adonis   Tel. 023 348 4687
Suid-Kaap & Karoo:       Lionel Pedro     Tel. 044 874 3130
8. U entoesiastiese deelname aan programme gedurende VIGS-maand vir Skole sal hoog op prys gestel word.


GETEKEN: M.J. THERON
HOOF: ONDERWYS
DATUM: 2005:08:03