1. Die Direktoraat Personeelbestuur (Staatsdienspersoneel) ontvang `n toenemende aantal versoeke om die aanbieding van inligtingsessies oor die onderskeie diensvoorwaardes van personeel en dit wil voorkom asof daar, veral ten opsigte van verlof, `n gebrek aan inligting is.
2. Aangesien die versoeke egter op `n ad hoc-basis en dikwels op baie kort kennisgewing ontvang word, sal versoeke om inligtingsessies vanaf 1 Januarie 2005 ingevolge die volgende riglyne gehanteer word.
2.1 Waar enigsins moontlik moet die gehoor bestaan uit 'n groep prinsipale of personeel van 'n spesifieke kring of 'n aantal kringe, ens. en dit, en of daar vakbondverteenwoordiging gaan wees, moet in die versoek aangedui word. Die Personeelkantoor beskik nie oor die kapasiteit om voortdurend individuele skole te besoek nie.
2.2 Die spesifieke behoefte moet aangedui word, met ander woorde, of `n sessie byvoorbeeld oor verlof of pensioene of behuisingsvoordele of `n kombinasie van diensvoorwaardes moet handel.
2.3 Die bepaalde plek waar en tyd van die aanbieding moet aangedui word.
2.4 Vir beplanningsdoeleindes moet versoeke skriftelik en ten minste `n maand voor die beoogde datum van die aanbieding aan die Personeelkantoor gerig word.
3. Hoofde van onderwysinrigtings en personeel verbonde aan OBOS`e word vriendelik versoek om hulle samewerking in hierdie verband te verleen.


GETEKEN: W.T. WILKINSON
HOOF: ONDERWYS
DATUM: 2005:01:17