1. Die Wes-Kaap Onderwysdepartement (WKOD) ontvang talle navrae met betrekking tot die toepassing van die personeelvoorsieningskale (PVS) vir die toekenning van Staatsdienspersoneelposte aan openbare gewone skole. Die huidige PVS wat op openbare gewone skole van toepassing is, is in Omsendbrief 0017/2000 van 3 September 2000 uiteengesit, en moet dus tesame met hierdie omsendbrief gelees word. Geriefshalwe word die PVS ook hierby aangeheg. Om meer duidelikheid oor die toepassing van die PVS te verskaf, soos dit tydens die promosietoere van die Hoofdirektoraat: Menslike Hulpbronbestuur uiteengesit is, word die volgende inligting ter toeligting verstrek:
1.1 Die huidige postevoorsiening aan skole is gebaseer op die 1999-leerdergetalle van individuele skole. Die WKOD se finansiële posisie laat egter nie toe dat die goedgekeurde PVS ten volle befonds kan word nie en die huidige mandaat in hierdie opsig is dat goedgekeurde poste tot ‘n maksimum van 2 administrasieklerke, 1 algemene voorman en 4 algemene assistente gevul mag word. Geriefshalwe word na hierdie mandaat verwys as die 2:1:4-mandaat.
1.2 Daar is wel skole wat die 2:1:4-mandaat oorskry. Die betrokke skole was egter bereid om botalliges in vakante poste op hul goedgekeurde diensstate te absorbeer. Sommige skole het sedert 1999 ‘n volle personeelkomplement gehad wat oor die jare in stand gebly het.
1.3 Sedert 1999 was daar om ‘n verskeidenheid redes óf ‘n toename óf ‘n afname in leerdergetalle van individuele skole, alhoewel daar nie groot wisseling in die totale aantal leerders in die stelsel is nie. Waar daar ‘n afname in die leerdergetal is, word die status quo ten opsigte van die postevoorsiening behou tot tyd en wyl die PVS en/of die Staatsdienspersoneeldiensstate hersien kan word. Let daarop dat die afskaffing van poste botalligheid tot gevolg sal hê en gevolglik ook ‘n ongunstige uitwerking op die moraal van personeel sal uitoefen.
1.4 Waar leerdergetalle egter sodanig toegeneem het dat ‘n skool in ‘n volgende kategorie van die PVS ressorteer, word bykomende poste slegs toegeken indien die toename 30% bokant die minimum van die volgende hoër interval van die PVS is, byvoorbeeld:

By ‘n skool met ‘n leerdertal van 420 is die volgende poste ooreenkomstig die interval 401 tot 700 toegeken::

1 X administrasieklerk
1 x algemene voorman
1 x algemene assistent (skoonmaker)

Indien die leerdergetal van sodanige skool tot 801 gestyg het en hierdie getal vir 2 agtereenvolgende jare gehandhaaf is, beteken dit dat die skool ‘n abnormale groei ervaar het aangesien die groei meer as 30% binne die volgende hoër interval (701 tot 1000) is. Die groei van 30% word soos volg bepaal:

  • Verskil tussen maksimum en minimum van hoër interval: 1000 - 701 = 299

  • 30% van 299 = 90 (afgerond)
  • 701 + 90 = 791 (gehandhaafde leerdergetal vir 2 jaar)

Dieselfde formule word konsekwent ten opsigte van alle ander intervalle toegepas.

2. Dit moet egter beklemtoon word dat, nieteenstaande paragraaf 1.4, die skepping van poste addisionele finansiële uitgawes meebring. Daar mag dus op ‘n gegewe tydstip nie fondse wees om aan diensstaatuitbreidings te kan bestee nie, en die versoek sal dus moet oorstaan totdat fondse beskikbaar raak. Indien dit die geval sou wees, sal die betrokke inrigtings van die posisie ingelig word.


GETEKEN: GJ ELLIOTT
HOOF: ONDERWYS
DATUM: 2005:12:21

Personeelvoorsieningskale  (grootte: 10 KB)