1. Die verlofvoorskrifte soos vervat in Omsendbrief 231 van 2003 bepaal dat `n Staatsdienspersoneellid verbonde aan `n onderwysinrigting geregtig is op 27 werksdae se jaarlikse verlof per jaar. Ten minste 22 van hierdie dae moet gedurende skoolvakansies geneem word en die oorblywende 5 dae kan gedurende die skoolkwartaal geneem word.
2. Hoofde van opvoedkundige inrigtings word versoek om verlofvorms ten opsigte van elke tydperk van jaarlikse verlof wat deur Staatsdienspersoneel geneem word gereeld in te dien, ongeag of die verlof binne of buite die skoolvakansie geneem is. Dit sal verseker dat die Wes-Kaap Onderwysdepartement ‘n rekord het van die persoon se verlofsituasie, d.w.s. hoeveel dae se verlof gedurende die huidige siklus geneem is en hoeveel dae as deel van die verlofgratifikasie, insluitende opgehoopte verlof indien daar is, uitbetaal kan word wanneer die personeellid die diens verlaat.
3. Hoofde van onderwysinrigtings word weer eens gewys op die noodsaaklikheid van die uiters akkurate rekordhouding en bestuur van verlof sodat wanneer `n persoon om welke rede ookal die diens verlaat, daar ook uit die skool se rekords bepaal kan word hoeveel dae se verlof so `n persoon reeds in die huidige siklus geneem het en hoeveel dae nog tot sy of haar krediet staan.
4. Hoofde van inrigtings word ook versoek om `n volledige verlofstaat van verlof wat in die huidige siklus geneem is, saam met die ander bedankings-/uittreedokumente in te dien wanneer daar aan Hoofkantoor kennis gegee word van die bedanking of aftrede van ‘n Staatsdienspersoneellid, sodat `n finale verlofgratifikasie vinnig bereken kan word ooreenkomstig die rekords van die inrigting en van Hoofkantoor.
5. U samewerking in hierdie verband sal op prys gestel word.


GETEKEN: G.J. ELLIOTT
HOOF: ONDERWYS
DATUM: 2005:09:12