| 1. |
Die Departement van Onderwys, in vennootskap met die Departement van Binnelandse Sake, die Onafhanklike Verkiesingskommissie (OVK), die Departement van Plaaslike Bestuur en Behuising, die Departement van Maatskaplike Dienste en Munisipaliteite, het 'n veldtog gesamentlik geloods om leerders van 16 jaar en ouer in staat te stel om vir ‘n groen strepieskode-identiteitsdokument (ID) aansoek te doen. |
| 2. |
Hierdie konsep is suksesvol van stapel gestuur by sekere skole in 2004 en sal uitgebrei word na alle skole in die provinsie gedurende 2005. Die belangrikheid daarvan om in besit van 'n ID te wees, kan nie oorbeklemtoon word nie. Dit is 'n bemagtigende dokument en 'n burgerskapsertifikaat wat leerders in staat sal stel om as kiesers te registreer. |
| 3. |
Weldoeners wat hierdie veldtog ondersteun het hulle daartoe verbind om bronne en finansies te voorsien, wat kan meebring dat dokumente teen 'n minimale koste of selfs gratis verskaf sal word. Leerders moet dus aangemoedig word om die beste gebruik van hierdie eenmalige geleentheid te maak. |
| 4. |
Die plaaslike kantoor van die OVK het die mandaat ontvang om prinsipale te kontak om sodoende die verlangde inligting aangaande die logistiek van die bekendstelling van die program by hulle skole te verkry. Skole sal gekontak word gedurende die eerste kwartaal van 2005. |
| 5. |
Die samewerking van die prinsipale en die opvoeders wat by hierdie uiters belangrike oefening betrokke is, sal hoog waardeer word. Bring asseblief die inhoud van hierdie minuut onder die aandag van alle betrokkenes. |
GETEKEN: N.S. MITI
HOOF: ONDERWYS
DATUM: 2005:02:15
|