1. DELEGERING VAN GESAG OM WERKNEMERS TE SKORS
1.1 In sekere gevalle betreffende beweerde wangedrag kan die Hoof van die Departement ingevolge wetgewing en kollektiewe ooreenkomste 'n werknemer skors of verplaas na 'n ander pos as voorsorgmaatreël indien die Hoof van die Departement van mening is dat dit moontlik gevaarlik kan wees om die werknemer by die werkplek te hou. Die werknemer kan bv. verdink word van aanranding, seksuele teistering of molestering. Die risiko mag ook bestaan dat die werknemer met die getuienis mag peuter of getuies kan intimideer.
1.2 Met inagneming van bogenoemde, mag die Hoof van die Departement ‘n werknemer skors of na ‘n ander pos oorplaas met volle betaling vir ‘n maksimumperiode van drie maande. Let daarop dat so ‘n skorsing nie beteken dat die werknemer se diens beëindig is nie. Hy of sy is effektief op gedwonge betaalde verlof, in afwagting op die verhoor.
1.3 Indien 'n werknemer geskors of verplaas word, moet die werkgewer alles moontlik doen om die dissiplinêre verhoor af te handel binne 1 maand vanaf die skorsing of verplasing. Die voorsittende beampte mag op enige verdere uitstel besluit.
1.4 Om skorsings meer effektief en doeltreffend te hanteer, het die Hoof van die Departement die gesag om ‘n werknemer te skors na die Direkteur: Arbeidsverhoudinge gedelegeer.
1.5 Indien die prosedures m.b.t. die geskorste werknemer nie binne 90 dae afgehandel is nie, moet die werkgewer die voorsittende beampte versoek om redes te verskaf vir die vertraging en om opdrag te gee vir die spoedige afhandeling daarvan.
1.6 Die Direktoraat: Arbeidsverhoudinge sal bewerings van wangedrag op 'n ad hoc-basis evalueer. Die OBOS of 'n direkteur kan ook 'n gemotiveerde versoek indien om die skorsing of verplasing van enige werknemer. Na 'n aanvanklike ondersoek en evaluering van al die getuienis, sal die Direkteur: Arbeidsverhoudinge 'n finale besluit neem en die betrokke OBOS of Direkteur aangaande die uitslag inlig.
1.7 Reëlings vir die aflwering van die finale kennisgewing van skorsing aan die werknemer sal met die betrokke bestuurder getref word om te verseker dat die finale besluit behoorlik oorgedra word en dat bewys bekom word van die tyd waarop die werknemer die brief ontvang het. 'n Afskrif van die brief, geteken deur die geskorste werknemer om ontvangs te erken, moet gestuur word of gefaks word aan die Direkteur: Arbeidsverhoudinge.
2. PROSEDURE VIR DIE AANSTELLING VAN PLAASVERVANGERS

Die volgende is van toepassing op die aanstelling van plaasvervangers vir geskorste werknemers.
2.1 Die normale prosedure vir die versoek en toekening van plaasvervangers vir opvoeders bly van krag. Die versoek moet gerig word alleenlik indien die permanente bekleër vir meer as 10 werksdae uit sy of haar pos afwesig sal wees. In die geval van staatsdienspersoneel sal aansoeke om die aanstelling van plaasvervangers op meriete oorweeg word.
2.2 Aansoeke om die aanstelling van die plaasvervanger, vergesel van 'n afskrif van die skorsingsbrief, moet gestuur word aan die betrokke Direktoraat: Personeelbestuur (Opvoeders of Staatsdiens), via die normale kommunikasiekanale.
2.3 Die aanstelling van 'n plaasvervanger sal deur die betrokke Personeeldirektoraat op ‘n ad hoc-basis oorweeg word.
2.4 Alle betrokke persone sal ingelig word aangaande die uitkoms van die dissiplinêre verhoor en of enige skorsing wat as 'n voorsorgmaatreël getref is, herroep is.
3. NAVRAE

Navrae kan gerig word aan die Direktoraat: Arbeidsverhoudinge by telefoon 021 467 2846.

Bring asseblief die inhoud van hierdie omsendbrief onder die aandag van alle belanghebbendes.



GETEKEN: J.H. HURTER
HOOF: ONDERWYS
DATUM: 2005:01:05