| 1. |
Dankie vir u insette en opoffering tot dusver om die Sentrale Onderwysbestuursinligtingstelsel (SOBIS) gevestig te kry. U bydrae word hoog op prys gestel. |
| 2. |
Die SOBIS sal ook, soos dit in die promosietoere aangedui is, data oor alle werkers bevat wat by die skool in diens is. Die vorms wat by hierdie minuut aangeheg is, moet gebruik word om data te versamel van al die staatsbesoldigde werknemers en werknemers wat deur die skoolbeheerliggaam (SBL) betaal word. Indien u skool van meer as 60 vorms voorsien is, moet u twee koeverte met die vorms ontvang. Die tweede plakker op die koevert sal aandui hoeveel koeverte u behoort te ontvang. |
| 3. |
Dieselfde vorm moet gebruik word om die data van al die personeel te verwerk. |
| 3.1 |
Voor op die vorm word ‘n duidelike onderskeid getref tussen staatsbesoldigde en SBL-betaalde werknemers. Maak asseblief seker dat die toepaslike blokkie gemerk is. |
| 3.2 |
Die voorblad sal die persoon se naam en die posisie waarin die persoon aangestel is, duidelik aandui, bv. prinsipaal, opvoeder, administratiewe klerk, opsigter, sekretaresse, tesourier, skoonmaker, bestuurder, sielkundige, skoolbesoekbeampte, tuinier, ens. |
| 3.3 |
Sekere gedeeltes van die vorm mag dalk slegs op sekere skoolwerknemers van toepassing wees. Maak asseblief seker dat al die toepaslike gedeeltes ingevul is vir die bepaalde werknemer. |
| 3.4 |
Alle opvoeders, administratiewe personeel, professionele personeel en hulppersoneel wat in diens van die skool is, moet die vorm invul. |
| 4. |
Prinsipale word versoek om ‘n vorm aan elke werknemer uit te deel en om ‘n getekende register by te hou van die uitreikings- en terugbesorgingsdatums. Die skoolwerknemers moet versoek word om hulle voltooide en getekende vorms binne sewe dae aan die prinsipaal terug te besorg. |
| 5. |
Die werknemer en die prinsipaal moet die voltooide vorm teken. |
| 6. |
Prinsipale word versoek om ‘n volledige personeellys aan die vorms te heg wat aan die diensverskaffer oorhandig moet word. Die aantal vorms wat oorhandig word, moet aangedui word. ‘n Voorbeeld van ‘n personeellys is aangeheg. |
| 7. |
Wanneer die voltooide vorms gereed is om afgehaal te word, moet die prinsipaal die streeksverteenwoordiger van die SOBIS-diensverskaffer, Deloitte en SAB&T-konsortium, skakel. Prinsipale word versoek om te verseker dat al die voltooide vorms teen 21 Oktober 2005 aan die diensverskaffer terugbesorg word. |
| 8. |
Die diensverskaffer sal die vorm elektronies verwerk en die elektroniese data aan die Wes-Kaap Onderwysdepartement verskaf. Die skooldata sal in 2006 deur middel van ‘n aanlynstelsel aan die skool beskikbaar gestel word. |
| 9. |
Indien u enige navrae in verband met die invul van die vorms het, skakel asseblief met u SOBIS-streeksverteenwoordiger, die SOBIS-tolvrye nommer 0800 204 800 of A Noordien by 467 2289. |
| 10. |
Ons bedank al die rolspelers by voorbaat vir hulle samewerking en hulp in die opstel van hierdie administratiewe stelsel. |
GETEKEN: P PRESENT
HOOF: ONDERWYS
DATUM: 2005:10:03
|