1. U word verwys na Eksamenminuut 73/2003 gedateer 28 November 2003 waarin aangedui word dat aanlynregistrasie vir voltydse leerders vanaf 2005 verpligtend sal wees. Die instruksies om leerders aanlyn te registreer verskyn by bladsy 5 paragraaf 11 van hierdie minuut.
2. Die Eksamenstelsel maak huidiglik nie voorsiening vir die aanlynregistrasie van privaat- en deeltydse leerders (VBOO) nie en vir die doel word inskrywingsvorms ingesluit. U word vriendelik versoek om die ingeslote inskrywingsvorm ten opsigte van u skool/sentrum se privaat en deeltydse (VBOO) leeders waar toepaslik sowel as Bylae A en Bylae B vir die 2005 Senior Sertifikaat-eksamen
3. Die voltooide inskrywingsvorms tesame met die bylaes, moet asseblief hierdie kantoor nie later nie as 15 Maart 2005 bereik. U aandag word daarop gevestig dat aanlynregistrasies van leerders ook voltooi moet wees teen 15 Maart 2005.
4. Die Departement ondervind elke jaar probleme met die finalisering van die inskrywings vir die eksamen as gevolg van foute. Baie versoeke om vak- en graadveranderings word ook ná die finalisering van inskrywings sowel as gedurende die eksamen ontvang. U kan begryp dat hierdie aansoeke groot probleme veroorsaak met die prosessering van die uitslae en ‘n addisionele administratiewe las op die Direktoraat: Eksamens plaas. Verseker dus asseblief dat inskrywingsvorms in alle opsigte korrek voltooi word.

Geen vak- of graadveranderings sal dus vanjaar na finalisering van die inskrywings toegelaat word nie. U word verwys na Omsendbrief 013/2004 in die verband.

Tydens die November 2004 eksamen het tientalle leerders wederregtelik van vak/graad verander en is hul uitslae vir 14 dae teruggehou. Die Departement hou hom vanjaar die reg voor om die uitslae van sodanige leerders nietig te verklaar.

Ten einde van die probleme uit te skakel, word u versoek om asseblief na die volgende aspekte om te sien by registrasie van leerders:

(i)
Leerders van OLSO- en afrondingskole met minder as 6 vakke maar wat deurlopende assesseringspunte (DASS) opbou. REGISTREER AS VOLTYDS
Leerders wat nie by ‘n skool of sentrum klas loop nie. REGISTREER AS PRIVAAT
Leerders van afrondingskole en wat VBOO (ABET) klasse loop en nie DASS- punte opbou nie.REGISTREER AS DEELTYDS

(ii) Maak asseblief seker dat die korrekte vakkeuses vir elke leerder aangedui word. Leerders se vakke sal beperk word tot die skool/sentrum se kurrikulum aanbieding. By voltooiing van die inskrywingsvorms maak asseblief seker watter van die volgende vakke u skool/sentrum aanbied en dat leerders in hierdie opsig korrek ingeskryf word.

  • Houtwerk/Houtbewerking

  • Funksionele Natuur- en Skeikunde SG/Natuur- en Skeikunde HG of SG

  • Funksionele Wiskunde SG/Wiskunde HG of SG/Addisionele Wiskunde HG

  • Beeldhoukuns SG/Grafiese Kuns SG/Ontwerpkuns SG/Skilderkuns SG/Kuns HG of SG

  • Tik SG/Rekenaartik SG/Rekenaarstudie HG of SG

  • Biologie HG of SG/Fisiologie HG of SG

(iii) In gevalle waar leerders onderrig in kunsvakke by ‘n kunssentrum ontvang, moet ‘n skrywe van die kunssentrum waarin bevestig word watter vakke die leerders aanbied, die inskrywingvorms vergesel.
5. Die besonderhede van elke leerder se inskrywing sal op ‘n voorlopige skedule van inskrywing verskyn wat gedurende April 2005 aan u gestuur sal word. U sal by hierdie geleentheid finale noodsaaklike regstellings en/of wysigings aan die leerders se inskrywings kan doen sodat dit hierdie kantoor nie later nie as 30 April 2005 bereik. Neem asseblief kennis dat gemotiveerde aansoeke om graadveranderings onder aparte omslag gemaak moet word.
6. Let asseblief op die volgende:

Bestuurders van Gemeenskapsonderrigsentrums moet asseblief hulle leerders as "VBOO" registreer.

Besonderhede moet met ink en in drukskrif ingeskryf word.

Indien ‘n fout begaan word, moet dit sorgvuldig reggestel word.
6.1 DIE VOLGENDE INSTRUKSIES MOET NOUKEURIG BESTUDEER WORD VOOR VOLTOOIING VAN REGISTRASIE:
6.1.1 Prinsipale en Sentrumbestuurders sowel as Hoofde van Kolleges moet verseker dat elke voltydse een deeltydse leeder wat die Senior Sertifikaat-eksamen wil aflê ingeskryf word. DIT GELD OOK TEN OPSIGTE VAN AFWESIGES ONGEAG OF DAAR ONSEKERHEID BESTAAN OF DIE LEERDER DIE EKSAMEN GAAN AFLê AL DAN NIE.
6.1.2 Prinsipale/Sentrumbestuurders moet daarop let dat hulle verantwoordelik is vir die korrektheid van die inligting op die inskrywingsvorms en dat leerders onder geen omstandighede hul eie inskrywings mag behartig nie. Van leerders word verwag om die korrektheid van die inskrywing te kontroleer.
6.1.3 U moet veral let op die korrektheid van die volgende inligting:
Eksamenvraesteltaal
Sertifikaattaal
Status van leerders - voltyds,deeltyds of privaat
Immigrant - Dui ‘n "Y" (JA) aan indien die leerder Departementele goedkeuring ontvang het of aansoek gedoen het om as ‘n immigrant leerder geregistreer te word. Merk die veld met ‘n "N" (NEE) as die leerder nie as ‘n immigrant geklassifiseer is nie.
Skryftekens in naam - (is daar enige aksent en/of skryftekens in die leerder se van en/of voorname ,bv ê,ë of é ? ) Dui aan "JA/NEE"
Ras - Word deur die Nasionale Onderwysdepartement verlang vir statistiese doeleindes. Die Departement is terdeë bewus van die sensitiwiteit rondom die aanduiding van ras op enige vorm. Dit is egter vir die Departement van Nasionale Opvoeding belangrik om die vordering wat in die onderwys sedert 1994 gemaak is te ontleed ten einde tekortkominge wat geïdentifiseer mag word aan te spreek. Prinsipale en leerders word derhalwe versoek om hul samewerking in hierdie verband te gee.
Huistaal - Dui die toepaslike kode aan
LSOB - Dui die toepaslike kode aan
6.1.4 Vakkeuse vir die November 2004 Senior Sertifikaat-eksamen:

Slegs vakke met vakkodes op die inskrywingsvorm word deur hierdie Departement aangebied. Prinsipale, Sentrumbestuurders van Gemeenskaponderrigsentrums en Hoofde van Kolleges word versoek om die vakkeuses korrek teenoor in die HG of SG kolom te merk.
6.1.5 Om vir matrikulasie-endossement in aanmerking te kom, moet ‘n leerder se keuse van ses vakke minstens een vak uit elk van vier verskillende groepe insluit. Minstens drie vakke moet op die Hoër Graad aangebied word. Een hiervan moet ‘n amptelike Eerste Taal Hoër Graad wees. Die oorblywende twee moet gekies word uit twee van die Groepe B,C,D,E en F. (Buiten die genoemde drie Hoër Graad vakke moet die amptelike Tweede Taal ook op die Hoër Graad aangebied word.)
6.1.6 Die Departement is bereid om ‘n leerder wat sewe en meer vakke neem toe te laat om in November 2005 te skryf, mits die addisionele vak(ke) nie met enige van sy ander vakke op die eksamenrooster bots nie. Indien daar enige botsings op die rooster voorkom as gevolg van die vakkeuses, mag die leerder dit in die daaropvolgende Aanvullingseksamen (Feb/Maart) afskryf. (L.W. leerders moet reeds in die November-eksamen vir die betrokke vak geregistreer wees.)
6.1.7 Die punte van die twee amptelike tale en vier vakke waarin die leerder die beste presteer het, sal vir groottotaaldoeleindes in berekening gebring word.
6.1.8 Sorg moet gedra word dat die van, voorname en geboortedatum en of ID nommer van elke leerder absoluut korrek is omrede hierdie name op die sertifikate van leerders sal verskyn.
7. Adres

Elke leerder se uitslagadvies sal na die adres wat deur die leerder op die vorm aangedui is, versend word. Dit is soms nodig om leerders gedurende die Desember vakansie te kontak of met hulle te korrespondeer. DIT WORD DUS VERKIES DAT HULLE HUISADRES EN NIE DIÉ VAN DIE SKOOL/SENTRUM, INGEVUL WORD.
7.1 Nadat die prinsipaal/sentrumbestuurder of sy/haar gedelegeerde die vorm ingevul het, moet die leerder en die prinsipaal/sentrumbestuurder die inligting as korrek en volledig sertifiseer.
7.2 In gevalle waar ‘n leerder (VBOO) weens siekte of ander onvermydelike omstandighede nie beskikbaar is nie, moet die inskrywingsvorm slegs deur die prinsipaal/sentrumbestuurder onderteken word. Die prinsipaal/sentrumbestuurder moet egter langsaan sy handtekening aandui dat die leerder afwesig was.
8. OPSOMMINGSBLAD VAN IMMIGRANTE- BYLAE B

Die opsommingsblad moet ten opsigte van ALLE leerders wat deur die Departement as immigrante geregistreeer is en wat vrygestel is van die verpligting om ‘n tweede amptelike taal aan te bied of te slaag, voltooi word. Indien ‘n skool geen immigrantleerders het nie, moet ‘n nulopgawe ingedien word.
9. Prinsipale/sentrumbestuurders moet verseker dat alle registrasies van leerders voltooi is teen 15 Maart 2005.
10. Kringbestuurders/VBOO Beplanners word versoek om toe te sien dat die skole/sentrums onder hulle toesig die inskrywingsvorms teen die keerdatums indien.

11. STAPPE OM TE VOLG VIR AANLYN REGISTRASIE

Ten einde voordeelte trek uit die aanlyn registrasie van leerders vir die 2005 Senior Sertifikaat-eksamen, is dit nodig om te let op die volgende aspekte van die stelsel.
11.1 Die skool se rekenaarstelsel moet oor 'n inskakeling (telefoon) fasiliteit beskik, gekoppel na die Internet met "Explorer 5" of hoër.
11.2 Om koste te bespaar maak die program voorsiening om afgelaai te word en registrasie dus van lyn gedoen kan word.
11.3Meer as een rekenaar kan geprogrammeer word om as lêerbediener (server) te dien sodoende kan tyd bespaar word deur meer persone (onderwysers) betrokke te maak met die registrasie van Graad 12 leerders.
11.4 Toegang tot die proses van registrasie is as volg:
11.4.1 Voer die volgende adres in http//wced.wcape.gov.za op die Internet Explore. Kliek op "At your service" of "Administrators". Kliek dan op "Registration: 2005 Senior Certificate Learners". Voer die skool se EMIS nommer en wagwoordkode. Skakel die inbelsentrum by 0861923322 as u nie weet wat die skool se emisnr. of pinkode is nie.
11.4.2 Kliek op "instructions", rol af en maak 'n skerm kopie om as verwysing deur die proses gebruik te word.
11.4.2 Indien u enige probleme in hierdie verband ondervind geliew die volgende beamptes te kontak: Mnre. L. Morfert - 021 467 2915, G. Plaatjies - 021 467 2911 en Mev. Laguma - 021 467 2913.


GETEKEN: A.P. CLAUSEN
HOOF: ONDERWYS
DATUM: 2004:02:02

Inskrywingsvorm  (grootte: 25 KB)
Bylae A: Senior Sertifikaatsentrum inligting  (grootte: 6 KB)
Bylae B: Lys van immigrante  (grootte: 6 KB)
VBOO-sentrum inligting  (grootte: 5 KB)
Taalvrystelling vir immigrante  (grootte: 11 KB)