1. Die proses vir die toekenning van die Algemene Onderwys-en Opleidingsertifikaat (AOOS) is in sy finale ontwikkelingsfase. Ten einde ‘n AOOS in die toekoms te kan toeken, moet alle graad 9- leerders geregistreer en hulle uitslae op die WKOD- stelsel vasgelê word. Alle geregistreerde WKOD- inrigtings word dus versoek om hulle graad 9- leerders te registreer.
2. Dit is van kardinale belang dat skole hul inskrywingsvorms vroegtydig, voor die vasgestelde sluitingsdatum in dien, om sodoende onnodige administratiewe take en onkostes vir die Direktoraat: Eksamens uit te skakel. Prinsipale word derhalwe versoek om hul volle samewerking in hierdie verband te gee.
3. Geliewe daarop te let dat leerders outomaties geregistreer sal word vir Wiskundige Geletterdheid, Wiskunde en Wiskundige Wetenskap (WGWWW), Natuurwetenskappe (NW), Menslike en Sosiale Wetenskappe (MSW). Tegnologie (TEG), Lewensorientasie (LO), Kuns en Kultuur (KK), Ekonomiese en Bestuurswetenskappe (EB). Skole moet aandui watter tale die leerders aanbied t.o.v. die leerarea Taal, Geletterdheid en Kommunikasie (TGK).
4. Besonderhede moet in ink en in drukletters ingevul word.
5. Indien ‘n fout begaan word, moet dit noukeurig gekorrigeer word.
6. Inskrywingsvorms moet streng alfabeties gerangskik word.
7. Prinsipale moet verseker dat ‘n inskrywingsvorm ingevul word vir elke leerder. Vorms moet ook ingevul word ten opsigte van afwesige leerders.
8. Prinsipale moet daarop let dat hulle verantwoordelik is vir die akkuraatheid van die inligting op die inskrywingsvorms en dat hierdie vorms onder geen omstandighede deur die leerders self ingevul mag word nie. Die leerders moet kontroleer of hulle gegewens korrek is.
9. Kontroleer asseblief die korrektheid van die volgende gegewens wat op die inskrywingsvorms voltooi is.

  • Sertifikaat-taal - Dui die toepaslike kode aan (A - Afrikaans, E - English, X - IsiXhosa, Z - IsiZulu).

  • Skryftekens in naam - (is daar enige aksent- en/of skryftekens in die leerder se van (ne) en/of voornaam(e), bv. ê of ë?). dui “J” (Ja) of “N” (Nee) aan in spesiale indikator blok.

  • Gestremd - Dui die toepaslike kode aan (neem kennis dat die volgende kodes verskillende stoornisse voorstel : R - Doof, S- Blind).
10. Ras:

Die aanduiding van ras word deur die Departement van Nasionale Onderwys verlang vir statistiese doeleindes. Die Departement is terdeë bewus van die sensitiwiteit rondom die aanduiding van ras op enige vorm. Dit is egter vir die Departement van Nasionale Onderwys belangrik om die vordering wat in die onderwys sedert 1994 gemaak is te ontleed ten einde tekortkominge wat geïdentifiseer mag word aan te spreek. Prinsipale en leerders word derhalwe versoek om hul samewerking in hierdie verband te gee.
11. Ondertekening van inskrywingsvorms:
11.1 Nadat die prinsipaal die inskrywingsvorm voltooi het, moet hy of sy, sowel as die leerder in die ruimte hiervoor onderaan die vorm sertifiseer dat die besonderhede volledig en korrek is.
11.2 Die inskrywingsvorm van die leerder wat nie beskikbaar is nie as gevolg van siekte of ander onvermydelike omstandighede moet deur die prinsipaal onderteken word. Die prinsipaal moet egter langs sy of haar handtekening aandui dat die leerder afwesig was.
12. Die aangehegte registrasievorm moet deur alle skole voltooi word en teruggestuur word aan mnr L. L. Van Gensen, Wes- Kaap Onderwysdepartement, Direktoraat: Eksamens, Privaatsak X9114, Kaapstad, 8000 teen nie later nie as Vrydag, 18 Maart 2005.


GETEKEN: A.P. CLAUSEN
HOOF: ONDERWYS
DATUM: 2005:02:09

Registrasievorm  (grootte: 36 KB)