VOOR DIE EKSAMEN
1. ’n Stiffie met die briefhoofde en woordverwerkingsvraag sal ongeveer 14 dae voor die eksamen aan skole voorsien word. Die inligting op hierdie stiffie is almal as LEES-ALLEEN *.RTF lêers gestoor. Die Rekenaartikopvoeder moet onmiddellik ’n rugsteunkopie van hierdie stiffie maak en kyk of die lêers oopmaak. (Verdere inligting sal saam met die stiffie verskaf word.). Stoor die oorspronklike in die kluis.
2. Dit is die Rekenaartikopvoeder se taak om hierdie inligting voor die eksamen óf op die netwerk te stoor, óf op rekenaars se hardeskywe óf om ’n stiffie vir elke leerder voor te berei. LEERDERS MAG ONDER GEEN OMSTANDIGHEDE TOEGANG TOT HIERDIE LÊERS VOOR DIE EKSAMEN HÊ NIE. Hierdie proses moet onder die toesig van die hoofopsiener geskied. Stoor die lêers as die tipe lêer wat leerders gedurende hul kursus gebruik het, maar hou die LEES-ALLEEN-opsie aan.
3. Die skole moet self aan elke leerder 2 stiffies verskaf waarop alle antwoorde gestoor moet word. Vraag 1 moet op ‘n aparte stiffie gestoor word en aan die opsiener oorhandig word voordat met die res van die vraestel begin word. Aan die einde van die eksamen word die tweede stiffie ingehandig. Die stiffies moet soos volg gemerk word:

  • die skool se eksamensentrumnommer (nie die skool se naam nie)

  • die leerder se eksamennommer

  • die werkstasienommer

OF, waar skole nie gebruik maak van stiffies nie, kan hulle hul leerders se werk op ’n CD instuur.

LW: Al die stiffies van die eksamensentrum moet in ‘n koevert geplaas word en saam met die gedrukte antwoorde aan die Departement versend word.
4. Skole is ook verantwoordelik om geskikte papier vir hul drukkers te verskaf. Die drukstukke moet binne-in die omslag wat verskaf word, geplaas word en aan die Departement versend word. Let asseblief daarna op dat slegs een uitdruk per vraag in die omslag geplaas mag word. Drukstukke wat nie gemerk moet word nie, moet apart aan die opsiener na afloop van die eksamen ingehandig word. Hierdie drukstukke moet na afloop van die eksamen vernietig word. Geen leerder mag enige drukstukke uit die eksamenlokaal verwyder nie.


DIE EKSAMEN

5. Prinsipale/sentrumbestuurders en hoofopsieners se aandag word daarop gevestig dat die Rekenaartikvraestel een verpligte noukeurigheidstoets bevat. Die tydsbeperking vir die noukeurigheidstoets in Rekenaartik is 10 minute.
6. Die volgende addisionele reëlings in verband met die afneem van die Rekenaartik-eksamen moet noulettend nagekom word.
6.1 Die voorskrifte aan opsieners bepaal dat leerders 25 minute voor die aanvang van die eksamen tot die eksamenlokaal toegelaat moet word. Leerders vir Rekenaartik moet, egter, ‘n verdere 10 minute vroeër tot die eksamenlokaal toegelaat word sodat hulle op hul rekenaars kan oefen en dit vir die eksamen gereed kan kry. Leerders moet egter ongeveer 25 minute voor die aanvang van die eksamen met hierdie bedrywighede ophou.
6.2 Die eerste gedeelte van die vraestel bestaan uit ’n snel-noukeurigheidstoets van 10 minute. Leerders moet 15 minute gegun word om die instruksies van die vraestel deur te lees en hulle vir die snel-noukeurigheidstoets gereed te maak.
6.3 Onmiddellik nadat die snel-noukeurigheidstoets afgeneem is, moet hierdie antwoorde gedruk word en deur die opsiener by die laaste woord op elke bladsy geparafeer word. Slegs een uitdruk per leerder word toegelaat met die snel-noukeurigheidstoets. Nadat die opsiener homself vergewis het dat alle leerders hulle snel-noukeurigheidstoets gedruk het, sal die res van die vraestel afgehandel word (twee uur en vyftig minute). Na afloop van die twee uur en vyftig minute het leerders nog 30 minute om drukwerk te doen. Gedurende hierdie dertig minute mag daar geen redigering aan antwoorde wees nie.

Prinsipale/sentrumbestuurders moet daarop let dat dit ongeveer 4 uur neem om een eksamensessie af te handel.
6.4 Leerders word toegelaat om meer as een uitdruk van die res van die antwoorde te maak. Sulke uitdrukke moet onmiddellik aan die leerder teruggegee word. Geen leerder mag opstaan om ’n drukstuk by ’n drukker te gaan haal nie.
6.5 ’n Ervare Rekenaartik-opvoeder, wat nie noodwendig die betrokke leerders se opvoeder hoef te wees nie, moet die volle duur van die eksamen in Rekenaartik in die eksamenlokaal teenwoordig wees sodat hy/sy die nodige instruksies aan die leerders kan gee wanneer om te begin tik en wanneer om op te hou. Hy/Sy mag hulp verleen aan leerders wat probleme ondervind met hul rekenaars. (Aan sulke leerders moet addisionele tyd, gelykstaande aan die tyd wat hulle weens faktore buite hul beheer verloor het, toegestaan word). Die opvoeder moet hom/haar egter streng bepaal by die reëls en instruksies wat op die snel-noukeurigheidstoets van toepassing is. Geen ekstra tyd sal toegelaat word vir werk wat verlore geraak het omdat ‘n leerder nie sy/haar werk gestoor het nie.
6.6 Hoofopsieners en leerders se aandag word daarop gevestig dat dit noodsaaklik is dat leerders sorg dra dat hul volle eksamennommers op elke bladsy van alle drukstukke aangebring word.
7. Na afloop van die Rekenaartik-eksamen moet opsieners, met behulp van die prinsipaal, die bladsye van die snel-noukeurigheidstoets binne-in die omslag van elke leerder se antwoordstel plaas. Dit kan nie oorbeklemtoon word nie dat hierdie taak met die uiterste versigtigheid uitgevoer moet word ten einde te verseker dat die korrekte snel-noukeurigheidstoetsbladsye in elke antwoordstel geplaas word.
8. Dit word sterk aanbeveel dat een van die toesighouers rekenaargeletterd moet wees.
9. TWEE persone moet te alle tye in die lokaal teenwoordig wees indien daar 10 of minder leerders is. Vir elke addisionele 10 leerders moet ’n ekstra toesighouer in die lokaal teenwoordig wees. Hierdie reëling is veral belangrik gedurende die laaste halfuur wanneer leerders net drukwerk mag doen en geen redigering aan hul antwoorde nie. Dit word aanbeveel dat die Rekenaartikopvoeder verantwoordelik sal wees om die drukstukke aan leerders terug te besorg.
10. Prinsipale/sentrumbestuurders moet toesien dat rekenaars en drukkers wat vir hierdie eksamen gebruik gaan word, in goeie werkende toestand is.
11. In die geval van ’n kragonderbreking gedurende die Rekenaartik-eksamen moet die volgende prosedure gevolg word:
11.1 Leerders moet in die lokaal bly tot die kragtoevoer herstel word. Leerders mag nie met mekaar praat terwyl hulle wag dat die kragtoevoer herstel word nie. Die tyd wat tydens die kragonderbreking verloor is, moet as addisionele eksamentyd toegelaat word.
11.2 INDIEN DIE KRAGTOEVOER NA ’N HALFUUR NOG NIE HERSTEL IS NIE, MOET DIE EKSAMEN SESSIE AFGELAS WORD EN SAL HERSKEDULEER WORD OP ’N DATUM SOOS OOREENGEKOM TUSSEN DIE DEPARTEMENT EN DIE BETROKKE SKOOL(E).
11.3 Die Direktoraat:Eksamens moet onverwyld van die kragonderbreking in kennis gestel word.
11.4 Die werk wat die leerders alreeds getik het, moet aan die Direktoraat: Eksamens gestuur word.
11.5 In gevalle waar daar twee tiksessies gedurende ’n eksamen voorkom, geld bogenoemde reëlings vir beide sessies.
11.6 Om ’n kragonderbreking te help voorkom, behoort prinsipale/sentrumbestuurders reëlings te tref dat elektriese toerusting (bv. In Metaalwerk-, Houtwerk- en Huishoudkunde lokale) nie gebruik word vir die tydsduur van die Rekenaartik-eksamen nie.
11.7 Indien ’n kragonderbreking gedurende die eerste sessie voorkom en die eksamen van die eerste sessie afgelas word, moet prinsipale/sentrumbestuurders die nodige reëlings tref om te verseker dat daar voor die aanvang van die tweede sessie hoegenaamd geen kontak tussen leerders van die eerste en dié van die tweede sessie is nie.
11.8 Sodra ’n kragonderbreking voorkom, moet die prinsipaal/sentrumbestuurder onmiddellik die plaaslike owerhede daarvan in kennis stel en ook, indien moontlik, verneem hoe lank die kragonderbreking sal duur.
11.9 Alle elektriese apparate, bedrading, verlengingskoorde, muurproppe en muursokke by die skool moet nagegaan word ten einde te verseker dat dit in ’n goeie werkende toestand is. Dit sal verhoed dat kragonderbrekings deur defekte elektriese toerusting en installasies veroorsaak word.

Skoolhoofde word dringend versoek om voorkomende maatreëls in plek te stel om kragonder- brekings te elimineer.


GETEKEN: A.P. CLAUSEN
HOOF: ONDERWYS
DATUM: 2005:09:12