1. Prinsipale van skole en bestuurders van volwasseneleersentrums word vriendelik versoek om die name en adresse van geskikte persone wat gewillig is om as hoofopsieners en hulpopsieners op te tree, op die bygaande Addendum A (druk op geel vorm), in te vul en onmiddellik aan die kringbestuurder voor te lê. Die kringbestuurder moet die aanstelling goedkeur en die finale lys voor/op 15 Junie 2005 aan die Departement besorg.
2. Die finale rooster vir die Senior Sertifikaat-eksamen en VBOO graad 12 van Oktober/November 2005 sal eersdaags aan skole versend word.
3. Die volgende baie belangrike aspekte moet asseblief in ag geneem word:
3.1 Die kringbestuurder moet ‘n persoonlike onderhoud met die persoon wat as hoofopsiener genomineer is, voer.
3.2 Die kringbestuurder moet homself/haarself vergewis van die bona fides van genomineerde persone veral ten opsigte van hul lees-, skryf-, gehoor- en gesigsfiksheid sowel as gesondheidstoestand.
3.3 Hy moet vasstel of die genomineerde bereid sal wees om ook as hoofopsiener op te tree by die Maart 2006 Senior Sertifikaat Aanvullingseksamen indien sy/haar dienste benodig mag word.
3.4 Dit moet baie duidelik onder die aandag van elke hoofopsiener gebring word dat indien hy/sy hom/haar verbind om ook gedurende Maart 2006 as hoofopsiener op te tree, hy/sy ten alle koste daarby moet hou.
3.5 Aansoekers/genomineerdes wat elders vir ‘n voltydse werk aansoek gedoen het moet verkieslik nie vir aanstelling oorweeg word nie.
3.6 Die hoofopsiener moet ingelig word dat hy/sy verplig is om die opleidingsessie vir opsieners by te woon. Hoofopsieners wat binne ‘n radius van 75 km van die skool/sentrum waar opleiding sal plaasvind woon sal vir die doeleindes van die opleidingsessie vir een addisionele sessie vergoed word en binne ‘n radius van meer as 75 km vir twee sessies. Hulpopsieners word nie vergoed vir bywoning van opleidingsessies nie.
3.7 Die hoofopsiener moet die prinsipaal by die ontvangs van elke besending vraestelle bystaan met die kontrolering daarvan. Ongeag die aantal besendings en die afstand wat afgelê moet word, sal hy/sy slegs vir een verdere sessie vergoed word vir sy/haar teenwoordigheid by die ontvangs en kontrolering van vraestelle.
3.8 Die hoofopsiener moet ook die Prinsipaal bystaan met die byhou van ‘n register wat geteken moet word deur die prinsipaal, vakhoof en hoofopsiener tydens die verwydering van vraestelle uit die kluis.
3.9 Waar prinsipale in 2004 ingestem het dat opsienersgelde in hul bankrekenings gedeponeer word, sal dieselfde prosedure in 2005 gevolg word.
4. NOMINASIE VAN HOOFOPSIENERS

Addendum B (druk op groen papier - Nominasie van hoofopsieners) moet deur die prinsipaal/sentrumbestuurder voltooi en onderteken word waarna ‘n afdruk onmiddellik aan die persoon wat as hoofopsiener genomineer is, oorhandig moet word. Dié nominasiebrief bevat belangrike instruksies. Tydens die onderhoud met die hoofopsiener moet die kringbestuurder, nadat hy homself/haarself vergewis het dat die hoofopsiener bevoegd is vir die taak, Addendum C (druk op pienk papier) aan hom/haar oorhandig vir voltooiing waarna die vorm ook deur die kringbestuurder onderteken moet word.

5. NOMINASIE VAN HULPOPSIENERS

Die prinsipaal/sentrumbestuurder moet verklaar dat die persoon/persone wat as hulpopsiener(s) benoem word, geskik is om in hierdie hoedanigheid op te tree, waarna die kringbestuurder die aanstelling van die persoon/persone wat benoem is, bekragtig. Addendum D (druk op blou papier) moet deur die hulpopsiener(s) voltooi en geparafeer word.

6. Na voltooiing moet Addendums A, B, C, D en E onverwyld deur die kringbestuurder aangestuur word om die Direktoraat: Eksamens nie later nie as 15 Junie 2005 te bereik. (VIR AANDAG: MNR. C. LOUW).

L.W.: Persone wie se aanstelling nie deur die kringbestuurder goedgekeur is nie, mag nie as opsiener optree nie. Opsieners mag onder geen omstandighede self plaasvervangers vir enige gedeelte van hul werk reël nie. Indien omstandighede verhoed dat ‘n hoofopsiener of hulpopsiener toesig oor ‘n eksamen kan hou, moet die prinsipaal/sentrumbestuurder in oorleg met die kringbestuurder die benoeming van ‘n plaasvervanger reël. Die Departement moet onverwyld dienooreenkomstig verwittig word. Plaasvervangers by skole se bankbesonderhede moet deurgestuur word (Addendum E).

7. In gewone omstandighede moet geen persoon vir aanstelling as hoof-/ hulpopsiener aanvaar word indien hy/sy:
(a) onder die ouderdom van 25 jaar is nie;
(b) enige familieverwantskap het met ‘n leerder wat die eksamen aflê of ‘n onderwyser(es) wat by die skool onderwys gee of van ‘n onderwyser(es) wat leerders vir die eksamen voorberei;
(c) in enige hoedanigheid dien in die personeel van die skool/sentrum of ‘n koshuisinrigting waarin leerders van die betrokke skool tuisgaan; en
(d) die eggenoot of eggenote of enige ander familieverwant van die hoofopsiener is.
8. Hoofopsieners moet oor ‘n akademiese kwalifikasie beskik van ten minste Graad 12 en hulpopsieners oor ten minste Graad 10. Indien nie moet ‘n motivering voorgelê word.
9. Indien daar meer as 30 leerders by een sitting is, is die Departement bereid om vir so ‘n sitting een hulpopsiener vir elke addisionele 30 leerders of gedeelte daarvan aan te stel, of een hulpopsiener vir elke kamer waarin daar leerders gehuisves word op voorwaarde dat alle lokale tot volle kapasiteit benut word alvorens ‘n ekstra lokaal gebruik word. By sittings waar daar slegs ‘n klein getal leerders is (tot ‘n minimum van twee) sal die dienste van een hulpopsiener benodig word. In hierdie geval sal die hoofopsiener nie normale opsienersdiens verrig nie, behalwe om ‘n hulpopsiener wat ‘n leerder moet vergesel wat toegelaat is om die lokaal weens ‘n dringende behoefte te verlaat, af te los. Waar praktiese en teoretiese eksamens by dieselfde eksamensessie afgeneem word, moet van die dienste van ‘n hulpopsiener gebruik gemaak word. Indien twee of meer hulpopsieners gebruik word waar daar twee of meer eksamenlokale gelyktydig benut word, sal die hoofopsiener nie normale opsienersdiens verrig nie.

VOORBEELD:

Getal
leerders
Getal
hoofopsieners
Getal
hulpopsieners
211
3011
3112

INDIEN DAAR VAN ADDISIONELE HULPOPSIENERS GEBRUIK GEMAAK WORD, MOET DIE DIREKTORAAT: EKSAMENS IN KENNIS GESTEL WORD. (VERWYS NA TABEL)

L.W.: VANWEË DIE SPESIALE BEHOEFTES VAN OLSO-LEERDERS IS DIE DEPARTEMENT BEREID OM AFWYKINGS VAN PARAGRAWE 7 EN 8 TOE TE LAAT, MAAR SLEGS BY ONTVANGS VAN GEMOTIVEERDE VOORLEGGINGS WAARIN DIE BESONDERE SPESIALE BEHOEFTES DUIDELIK GESPESIFISEER WORD.

10. Waar die leerders almal vroulik is, behoort die hoofopsiener en al die hulpopsieners dames te wees. Waar beide manlike en vroulike leerders by een sentrum eksamen skryf en die hoofopsiener ‘n man is, moet ten minste een van die hulpopsieners ‘n dame wees, of as die hoofopsiener ‘n dame is, moet ten minste een van die hulpopsieners ‘n man wees.

Die opsiener word aangestel met die uitdruklike veronderstelling dat hy/sy gedurende ‘n eksamen sy/haar volle aandag aan toesighouding sal gee en ander werk van watter aard ookal (bv. Lees, skryf, brei, ens.) is nie toelaatbaar terwyl hulle toesig hou as opsiener by die afneem van enige eksamen nie.

DIE OPSIENER MAG HOEGENAAMD ONDER GEEN OMSTANDIGHEDE DIE EKSAMENLOKAAL TYDENS DIE AFNEEM VAN ‘N EKSAMEN VERLAAT EN LEERDERS SONDER TOESIG LAAT NIE.

11(a) Die Departement stel opsieners aan en besoldig hulle ooreenkomstig die neergelegde departementele voorskrifte. Onafhanklike skole en kolleges is verantwoordelik vir die vergoeding van hul opsieners. Alhoewel hul opsieners nie deur die Departement besoldig word nie, moet hoofde van onafhanklike skole, hoofde van Kolleges en Gevangenisse asseblief daarop let dat dit verpligtend is om die aannamevorms (Addendums C en D) te voltooi en aan die Departement te besorg.

Hoofopsieners van onafhanklike skole en kolleges moet hul opsienerseisvorms aan die prinsipaal oorhandig wie self vir hul vergoeding sal reël. Personeel in diens van gevangenisse of nywerheidskole wie as opsieners vir die Senior Sertifikaat-eksamen optree ontvang geen addisionele besoldiging nie. Indien opsieners nie in diens van die gevangenis is nie, moet die Departement skriftelik in kennis gestel word.

11(b) Administratiewe personeel en onderwysers wat reeds ‘n salaris van die Departement ontvang en as opsieners optree, word nie deur die Departement vir opsienerswerk vergoed nie. Huidig is die tariewe R76,60 per sessie aan hoofopsieners en R51,05 per sessie aan hulpopsieners. (Die tariewe is onderhewig aan verandering)
11(c) ONDER GEEN OMSTANDIGHEDE SAL REISKOSTE AAN OPSIENERS BETAAL WORD NIE. (Prinsipale/sentrumbestuurders word dus aangemoedig om opsieners aan te stel wat deel vorm van die onmiddellike gemeenskap wat die skool/sentrum bedien).

L.W.: DIE REGULASIES (IRP10) MET BETREKKING TOT DIE AFTREKKING VAN WERKNEMERSBELASTING BEPAAL DAT SALARISSE VAN PERSONE WAT DEELTYDS IN DIENS IS, ONDERWORPE IS AAN ‘N AFTREKKING VAN 25% BELASTING. DIE DEPARTEMENT SAL GEVOLGLIK DIE AFTREKKING VAN 25% WERKNEMERSBELASTING TEN OPSIGTE VAN ALLE OPSIENERS MOET TOEPAS. DIE INDIENING VAN DIE SERTIFIKAAT VIR AANWYSINGS VAN WERKNEMERSBELASTINGAFTREKKING (IRP3) GELD DERHALWE NIE MEER NIE. OPSIENERS WAT KWALIFISEER OM KWYTSKELDING OF GEDEELTELIKE KWYTSKELDING VAN WERKNEMERSBELASTING MOET DUS NA ONTVANGS VAN HUL IRP5 SERTIFIKAAT (BESONDERHEDE VAN WERKNEMERSBELASTING AFTREKKING VANAF DIE DEPARTEMENT) DIT TESAME MET DIE VOORGESKREWE VORM IB 12.S BY HUL PLAASLIKE BELASTING KANTOOR INDIEN. IRP 5 sertifikate word gewoontlik gedurende Mei/Junie van die jaar wat volg op die opsienerswerk, aan die opsieners se huise of posadresse versend.

VOORBEELD:

Titel Aantal SessiesTariefBrutoBelastingNett Bedrag
hoofopsiener12R76.60R919.20R229.80R689.40
hulpopsiener12R51.05R612.60R153.15R459.45
11(d) Ten einde die uitbetaling van opsienerseise te bespoedig is dit nodig dat elke hoof- en hulpopsiener hul identiteitsnommer op die aannamevorm aanbring sowel as ‘n afdruk van die ID-dokument en huweliksertifikaat (waar van toepassing) by die aannamevorms aanheg.
11(e) Addendum E moet deur die genomineerdes van skole wat nie met die betaling van opsieners behulpsaam kan wees nie, voltooi word. Na voltooiing moet die vorm deur die betrokke bank gesertifiseer word as korrek en die bankrekening aktief verklaar word.
12. AKKOMMODASIE

Ten minste ‘n maand voordat die eksamen begin, moet die hoofopsiener in oorleg met die prinsipaal/sentrumbestuurder seker maak dat voldoende geskikte akkommodasie beskikbaar is vir al die leerders wat vir die eksamen ingeskryf het. Leerders moet geplaas word met voldoende ruimte tussen hulle om die moontlikheid van enige onreëlmatige gedrag uit te skakel. Die skoolsaal en/of die aantal klaskamers wat nodig sal wees, moet so benut word om ‘n spasie van 150 cm aan weerskante en 120 cm voor en agter elke skoolbank, lessenaar of tafel waarby ‘n leerder plaasneem, te verseker. (Die kringbestuurder moet besoeke aan die eksamensentra in sy kring bring om vas te stel of aan hierdie voorskrif voldoen is.)

DIT IS DIE PLIG VAN ELKE HOOFOPSIENER OM HOM/HAAR TE GAAN VERGEWIS VAN DIE GESKIKTHEID VAN DIE EKSAMEN AKKOMMODASIE VOOR DIE EKSAMEN AMPTELIK BEGIN.

13. Prinsipale/sentrumbestuurders word versoek om in oorleg met die kringbestuurder toe te sien dat bevredigende reëlings vir die afneem van die eksamen getref word en dit van so ‘n aard is dat die leerders nie gedurende eksamensessies gesteur sal word nie.
14. Kringbestuurders is verantwoordelik vir die aanstelling van alle opsieners by ‘n betrokke skool/sentrum, d.w.s. vir voltydse, VBOO Graad 12 sowel as privaatleerders (waar van toepassing).
15. ‘n AFSKRIF VAN HIERDIE EKSAMENMINUUT MOET OORHANDIG WORD AAN DIE HOOFOPSIENER SOWEL AS DIE HULPOPSIENERS.


GETEKEN: L.C. ARENDSE
HOOF: ONDERWYS
DATUM: 2005:05:26

Bylae A  (grootte: 6 KB)
Bylae B  (grootte: 7 KB)
Bylae C  (grootte: 7 KB)
Bylae D  (grootte: 7 KB)
Bylae E  (grootte: 24 KB)