| 1. |
Prinsipale/hoofde/bestuurders word versoek om alle aansoeke om eksamenkonsessies (bykomende tyd of enige ander alternatiewe of aangepaste wyse van eksaminering) ten opsigte van kandidate vir die Senior Sertifikaat-eksamen, ooreenkomstig die riglyne vervat in Bylae A van Eksamen-omsendminuut 0015/99 van 3 September 1999, teen nie later nie as 30 Junie 2005 by die Departement in te dien. Indien u skool/kollege/sentrum nie in besit is van hierdie beleidsdokument nie, kan dit vanaf die Direktoraat: Eksamens verkry word.
|
| 2. |
‘n Volledige professionele verslag (nie ouer nie as drie jaar) van ‘n medikus, paramedikus of sielkundige, en ander stawende bewyse (toetsresultate, eksamenuitslae, ens.), moet Bylae B (voorgeskrewe aansoekvorm) vergesel.
|
| 3. |
In gevalle waar aansoek gedoen word om die swak spelvermoë of ‘n handskrifprobleem onder die aandag van die eksaminator te bring, moet werklike voorbeelde van sy of haar skriftelike werk (waaruit die probleem duidelik blyk) ook ingedien word.
|
| 4. |
‘n Duidelike uiteensetting van die leerder se probleem, soos dit in die klaskamer waargeneem word, moet gegee word. As die probleem ernstig is, moet toegewings wat vantevore in die leerder se skoolloopbaan gemaak is, (byvoorbeeld ekstra tyd, speltoegewings, ens.) aangedui word. Daar moet spesifiek na die aard van die konsessies – byvoorbeeld aantal minute per uur ekstra tyd – verwys word.
|
| 5. |
Aansoeke om bykomende eksamen skryftyd wat na 30 Junie 2005 weens onvoorsiene omstandighede soos arm- of vingerfrakture ontstaan, moet ook op die voorgeskrewe vorm ingedien word. As die dringendheid van die situasie dit egter vereis, kan aansoek per telefoon gedoen word, waarna die nodige vorms en mediese of ander stawende dokumente per pos of faks ingedien moet word. In hierdie verband kan daar met mnre. J.C.Albertyn en H.A.J Coetzee by telefoon 021 467 2011 en 021 467 2921 in verbinding getree word.
|
| 6. |
Die Departement se beslissing rakende 'n aansoek om bykomende skryftyd, sowel as ander aanpassings, sal aan die prinsipaal/hoof/bestuurder gestuur word en is, tensy anders gemeld, geldig vir die November- en die Februarie/Maart-aanvullende eksamen. Die prinsipaal/hoof/bestuurder moet die betrokke opsiener en die leerder skriftelik van die besluit in kennis stel.
|
| 7. |
Let asseblief daarop dat toestemming vir bykomende tyd vir alle interne eksamens tot en met die September graad 12-eksamen, slegs deur die betrokke kringbestuurder verleen mag word. Skole/kolleges/sentrums moet verslag hou van sodanige toegewings.
|
| 8. |
Alle aansoeke moet deur die prinsipaal/hoof/bestuurder aanbeveel en onderteken word.
|
| 9. |
Bring asseblief die inhoud van hierdie eksamenminuut onder die aandag van alle betrokkenes. |
GETEKEN: L.C. ARENDSE
HOOF: ONDERWYS
DATUM: 2005:05:24
|