1. Aansoeke word ingewag van persone wat in Desember 2005 wil optree as nasieners van vakke (lys aangeheg) wat gedurende die Oktober/November 2005-Senior Sertifikaat-eksamen geskryf is. Hierdie persone moet voldoen aan die kriteria in paragraaf 2 hieronder.

LW: BY `N SKOOL/INRIGTING WAT IN DIE SENIOR SERTIFIKAAT-EKSAMEN VAN DIE VORIGE JAAR `N SLAAGPERSENTASIE VAN MINDER AS 40% BEHAAL HET, MAG GEEN OPVOEDER WAT `N VAKSLAAGPERSENTASIE VAN MINDER AS 50% IN DIE SENIOR SERTIFIKAAT-EKSAMEN VAN DIE VORIGE JAAR BEHAAL HET, AANGESTEL WORD AS `N NASIENER VIR DIE SENIOR SERTIFIKAAT-EKSAMEN VAN DIE VOLGENDE JAAR NIE.

2. Algemene kriteria
2.1 Onderwysondervinding: Opvoeders wat die vak gedurende enige van die vorige drie jaar, byvoorbeeld 2005, 2004 en 2003 op graad 12-vlak onderrig het, kan aansoek doen.
2.2 Kwalifikasies: 'n Erkende driejarige na-Senior Sertifikaatkwalifikasie wat die vak waarvoor aansoek gedoen word op tweede- of derdejaarsvlak insluit, of ander toepaslike na-Senior Sertifikaat-kwalifikasies
2.3 Alle aansoekers moet in diens wees by skole of inrigtings wat kandidate vir die Wes-Kaap Senior Sertifikaat-eksamen voorberei.

LW: TEN EINDE TE VERSEKER DAT DIE FUNKSIONERING VAN DIE SKOOL/ INRIGTING NIE NADELIG DEUR DIE AFWESIGHEID VAN OPVOEDERS GERAAK WORD NIE, SAL NIE MEER NIE AS 30% VAN DIE OPVOEDERS BY `N BETROKKE SKOOL/INRIGTING AS NASIENERS AANGESTEL WORD NIE. DIE FINALE BESLUIT OOR WATTER OPVOEDERS AS NASIENERS AANGESTEL KAN WORD, BERUS BY DIE WKOD.
2.4 Die WKOD ondersteun die Wet op Diensbillikheid en aanstelling as nasiener sal in ooreenstemming wees met die Departement se Diensbillikheidsplan. Dit is dus noodsaaklik dat aansoekers hulle ras en geslag op die aansoekvorm moet aandui.
2.5 Aansoekers wat aangedui het dat hulle van voorneme is om te bedank of af te tree en hulle diens by die WKOD teen 30 September 2005 te beëindig, sal nie vir aanstelling oorweeg word nie.
2.6 SKOOLHOOFDE
2.6.1 Skoolhoofde mag, met inagneming van die volgende aspekte, aansoek doen om as nasieners aangestel te word:
(a) Dit is nie wenslik vir skoolhoofde om aan die einde van `n jaar van die skool af weg te wees nie.
(b) Skoolhoofde is juis aan die einde van `n jaar wat `n besondere besige tyd is, vir die bestuur van hulle skole verantwoordelik.
2.6.2 Die keuring van skoolhoofde as nasieners sal derhalwe, onder andere, aan die volgende voorwaardes onderworpe wees:
(a) Na die verstryking van die keerdatum vir die indiening van aansoekvorms, sal al die skoolhoofde se aansoeke aan die OBOS-direkteure vir aanbeveling voorgelê word.
(b) `n Primêre oorweging sal wees of `n skool tydens die nasienperiode optimaal sal kan funksioneer in die afwesigheid van die skoolhoof.
(c) Gevestigde strukture moet in plek wees vir ‘n persoon wat as skoolhoof waarneem.
(d) Die skool moet in staat wees om sonder die hoof se kundigheid en leiding te kan funksioneer.
2.7 ‘n Aansoeker moet ‘n afsonderlike aansoekvorm voltooi vir elke vraestel waarvoor hy of sy aansoek doen.
2.8 Gewaarmerkte afskrifte van hoogste kwalifikasies wat aandui watter vakke die aansoeker bestudeer het, moet elke aansoekvorm vergesel.
2.9 Aansoekvorms wat nie deur gewaarmerkte afskrifte van uitslae vergesel word nie, sal nie oorweeg word nie.
2.10 Geen uitsonderings sal in hierdie verband gemaak word nie, en geen korrespondensie sal met aansoekers daaroor gevoer word nie.
2.11 Interne moderatore van die WKOD wat oorweeg wil word as nasieners van Senior Sertifikaat-skrifte, moet ook daarvoor aansoek doen.
3. Aansoek om as nasiener op te tree
3.1 Aansoeke moet ingedien word op die aangehegte voorgeskrewe aansoekvorm, wat ook verkrygbaar is by 
HOOF: ONDERWYS 
WKOD DIREKTORAAT: EKSAMENS
KAMER 4-13
GRAND CENTRALTOWERS
LAER PARLEMENTSTRAAT
KAAPSTAD
8001
Webtuiste http://wced.wcape.school.za/circulars/index_circmins.html
3.2 Alle navrae, hetsy per telefoon of skriftelik, moet gerig word aan die Direktoraat: Eksamens en NIE direk aan eksaminatore nie. Kontak mnr M Cameron by tel. 021 467 2964, mnr N. Riddles by tel. 021 467 2992 of Me B Calvert by tel. 021 467 2994 of, faks 021 461 5628 of stuur 'n e-pos aan: Michael Cameron by mgcameron@pgwc.gov.za, Brownwyn Calvert by bcalvert@pgwc.gov.za of Norman Riddles by nriddles@pgwc.gov.za
3.3 Afskrifte mag van die aangehegte vorm gemaak word. Behoorlik voltooide aansoekvorms moet die Direktoraat: Eksamens teen nie later nie as 10 Junie 2005 bereik. Aansoeke mag onder geen omstandighede direk aan eksaminatore gestuur word nie. Aansoeke wat na die sluitingsdatum ontvang word, sal nie oorweeg word nie.
3.4 Alle aansoekvorms moet deur die prinsipaal (in die geval van opvoeders) of direkteur of gedelegeerde persoon (in die geval van prinsipale, senior kurrikulumbeplanners, hoofkurrikulumbeplanners en kurrikulumadviseurs) onderteken word.
3.5 Aansoeke op ongetekende vorms sal nie oorweeg word nie. Die onus rus op aansoekers om te verseker dat die korrek voltooide aansoekvorm die kantoor voor of op die sluitingsdatum bereik.
3.6 Aansoekers moet asseblief hul ete-voorkeure op hulle aansoekvorms aandui en daarop let dat die departement geen ete-voorkeurveranderinge tydens die nasienperiode sal toelaat nie.
4. Reëlings vir die nasientydperk
4.1 Alle nasienwerk word verrig by `n sentrale sentrum in of naby Kaapstad, soos deur die Departement bepaal.
4.2 Die nasien van eksamenskrifte sal om 07:30 op ongeveer Dinsdag 29 November 2005 `n aanvang neem en om 18:00 op ongeveer Woensdag 7 Desember 2005 ten einde loop. Die presiese datums sal later aangekondig word.
4.3 Daar sal van nasieners verwag word om skrifte vir minstens 8 uur per dag na te sien. Dit sluit middagetes en teetye uit. Die nasiensentrum sal gedurende die nasienperiode daagliks van 06:00 tot 22:00 toeganklik wees.
4.4 Die nasientarief vir elke vraestel sal so spoedig moontlik bekend gemaak word. Elke moderator, eksaminator en nasiener wat skrifte nasien en/of modereer, sal ooreenkomstig die Inkomstebelastingwet belas word.
4.5 Dit is noodsaaklik dat prinsipale, OBOS-direkteure, kringbestuurders en Kurrikulumadviseurs die inhoud van hierdie eksamenminuut onder die aandag van alle opvoeders, insluitend diegene wat met verlof is, bring. Hierdie Direktoraat aanvaar geen verantwoordelikheid daarvoor as opvoeders nie oor die inhoud van hierdie eksamenminuut ingelig word nie.
5. Aangesien die nasien van Senior Sertifikaat-eksamenvraestelle vir opvoeders `n uiters waardevolle en lonende ondervinding is, poog die WKOD om te verseker dat nasienpanele elke jaar nuwe nasieners insluit. Verder is diensbillikheid ook `n baie belangrike oorweging. Alle opvoeders wat kwalifiseer om na te sien, word daarom sterk aangemoedig word om aansoek te doen. Prinsipale en kurrikulumadviseurs word versoek om bevoegde onderwysers aan te moedig om aansoek te doen.
6. Prinsipale moet ontvangs van hierdie eksamenminuut erken op die aangehegte vorm wat hierdie kantoor voor 20 Mei 2005 moet bereik.


GETEKEN: L.C. ARENDSE
HOOF: ONDERWYS
DATUM: 2004:05:10

Lys van vakke  (grootte: 17 KB)
Aansoekvorm  (grootte: 22 KB)
Ontvangserkenning  (grootte: 18 KB)