1. Die voorlopige skedule van inskrywings ten opsigte van Voltydse en/of VBOO leerders wat by u skool/sentrum geregistreer is vir die 2005 Senior Sertifikaat-eksamen, word hierby ingesluit vir kontrolering asseblief  [Hierdie dokument is aan skole gestuur en is nie aangeheg nie]. Hierdie drukstuk dui die besonderhede van elke leerder se inskrywing aan. Indien daar leerders verkeerdelik geregistreer is tydens die oppons van informasie of weggelaat is, moet dit in rooi op die drukstuk aangedui word.
1. Hierdie Eksamenminuut moet saam met Omsendbrief 13/2004 gedateer 2004.03.05 gelees word en word die volgende weereens beklemtoon.
(a) U aandag word daarop gevestig dat die keerdatum vir aansoeke om graadverandering wat uitsonderlike omstandighede behels, reeds op 30 April 2005 verstryk.
(b) Leerders wat ongemagtig van vak- of graad verander sal geen uitslag in die betrokke vak ontvang nie. Die prosedure wat in die verlede gevolg is om die uitslae van hierdie leerders vir 14 dae terug te hou, is gestaak. Hulle sal wel toegelaat word om in te skryf vir die vak/graad van hulle keuse tydens die Februarie/Maart aanvullende eksamen van die volgende jaar.
3. Die korrektheid van die volgende besonderhede ten opsigte van elke leerder moet gekontroleer word teenoor die skool/sentrum se rekords en die gegewens soos deur die leerder bevestig.
3.1 Persoonlike besonderhede: Identiteitsnommer, geboortedatum, geslag, spelling van die naam/name en van, adres, telefoonnommer, taalvoorkeur op sertifikaat, taalmedium asook die kandidaat se immigrantstatus, waar van toepassing. Waar skole die ID nommer aangebring het op die inskrywingsvorm en dit ontbreek op die skedules, moet ‘n afskrif van die ID dokument aangeheg word.

LW: SERTIFIKATE WORD SLEGS IN ENGELS, AFRIKAANS/ENGELS OF ISIXHOSA/ENGELS GEDRUK

3.2 Sorg moet gedra word dat die letter "M" in die "MT"-kolom verskyn vir leerders wie aansoek gedoen het of vrygestel is van die vereiste om ‘n amptelike Tweede Taal te slaag of aan te bied. Indien ‘n leerder se immigrantstatus nie aangedui is nie, moet die verwysingsnommer en die datum van die Departementele goedkeuringsbrief vir taalvrystelling in die kolom aangebring word. Bring asseblief die R-doof- en S-blind-aanduidings in die "MT" kolom aan ten opsigte van sodanige leerders.
3.3 Kontroleer die korrektheid van alle vakke en grade. Enige vak of graadveranderings (slegs ponsfoute) moet aangedui word by wyse van deurstreping van die betrokke vak(ke) of graad/grade of albei. Die korrekte vak(ke) en/of graad/grade moet netjies onder die bewoording "Number of subjects" ingeskryf word. Alle veranderinge moet slegs in rooi uitgewys word.
3.4 Die nommer onder die opskrif "for Head Office use only", "Previous exam number" en die "Entry number" op die drukstuk moet geïgnoreer word. Dit is alleenlik vir Departementele gebruik.
3.5 Elke leerder se inskrywing op die drukstuk toon aan of die leerder ‘n Senior Sertifikaatkursus met of sonder matrikulasie-endossement aanbied.
  • Indien ‘n leerder ‘n kursus aanbied vir ‘n Senior Sertifikaat sonder matrikulasie- endossement sal sy/haar rekord "SC" aandui.

  • Indien ‘n leerder se vakkeuse dié vir ‘n Senior Sertifikaat met matrikulasie-endossement is, sal sy/haar rekord "SC/M" toon.

  • Indien ‘n leerder nie die korrekte vakkeuse aanbied vir matrikulasie-endossement nie, sal die ontbrekende vereiste(s) deur ‘n "error report" aangedui word.

LW: ALLE INSKRYWINGS WORD AAN DIE MATRIKULASIE-ENDOSSEMENT-VEREISTES GETOETS.

4. Die besonderhede wat op die drukstuk verskyn, sal by die verwerking van die uitslae, druk van sertifikate, ens. aangewend word. Dit is dus gebiedend noodsaaklik dat elke leerder se rekord in hierdie stadium noukeurig gekontroleer word om foute by die verwerking van die eksamenuitslae uit te skakel.
5. Indien daar geen foute op die drukstuk voorkom nie, moet prinsipale/ sentrumbestuurders steeds skriftelik bevestig dat die besonderhede op die skedule in alle opsigte korrek is.
6. In gevalle waar die prinsipaal/sentrumbestuurder beswaar het dat ‘n leerder die eksamen aflê, moet hy sodanige besware volledig per brief aan die Departement voorlê. U aandag word ook gevestig op omsendbrief 0026/2000 gedateer 18 Februarie 2000.
7. Prinsipale/Sentrumbestuurders word versoek om die nodige reëlings te tref met Skynet koerierdiens (tel. no. 021 531 9191 of selno. 083 273 1997) om die gewysigde skedules af te haal ten einde die Departement nie later nie as 18 Mei 2005 by die volgende adres te bereik: Vir aandag Mnr. F. Jacobs: WKOD Kamer 515A Vyfde Vloer, Grand Central Towers, Laer Parlementstraat, Kaapstad.
8. OBOS Direkteure en Kringbestuurders word asseblief versoek om toe te sien dat daar gehou word by die datum vir inhandiging van korreksies.
9. U samewerking word op prys gestel.


GETEKEN: A.P. CLAUSEN
HOOF: ONDERWYS
DATUM: 2005:04:07

Aansoekvorm  (grootte: 8 KB)