1. U word verwys na Eksamenminuut 0001/2005 in hierdie verband.
2. Die WKOD wil graag alle skole bedank vir hulle deelname aan die taal -en wiskundetoetse gedurende 2004. U word ook daaraan herinner dat hierdie toetse verpligtend is en sal deur alle graad 8-leerders geskryf moet word in die WKOD se openbare en onafhanklike gewone skole op die volgende datums:
2.1 Wiskundetoets: Donderdag, 2 Junie 2005 van 9:45 tot 11:00
2.2 Taaltoets: Woensdag, 15 Junie 2005 van 9:45 tot 11:00

Vir hierdie doel is inskrywingsvorms ingesluit wat voltooi moet word vir alle leerders van u skool. Indien addisionele vorms benodig word, staan dit u vry om die nodige kopië te maak. Die voltooide inskrywingsvorms tesame met bylae A (sentrumbesonderhede) moet hierdie kantoor bereik nie later as 18 Maart 2005. Slegs ingeskrewe leerders sal vraestelle ontvang, en slegs in die taal soos aangedui op die inskrywingsvorm. Die Direktoraat sal nie in ‘n posisie wees om skole van addisionele vraestelle te voorsien indien inskrywings foutiewelik is nie.
3. Prinsipale word versoek om te verseker dat die volgende probleme wat deur die Direktoraat Eksamens tydens die kontrolering van die antwoordblaaie vir die taal -en wiskundetoetse gedurende 2004 ondervind is, onder die aandag van die betrokke leerders gebring word:
3.1 Ink is gebruik i.p.v. potlood.
3.2 Die skakering van die ovale was dikwels nie donker genoeg nie as gevolg van die gebruik van die verkeerde soort potlood. ('n 2B- of 'n B-potlood moet gebruik word.)
3.3 Leerders se name en vanne is verkeerd geskakeer. (LW: Slegs die ooreen-stemmende ovaal onder elke letter van die alfabet van 'n leerder se naam moet geskakeer word, beginnende by die eerste ovaal aan die linkerkant van beide die van- en naamkolom.)
3.4 Name en vanne is in die verkeerde kolomme ingevul.
3.5 Die spelling van leerders se name op die antwoordblad het dikwels verskil van dié op die leerderregistrasievorms.
3.6 Geslag is nie in die ovaal geskakeer nie.
3.7 Skooljaar is nie in die ovaal geskakeer nie.
3.8 Taal is nie geskakeer nie.
3.9 Antwoordblaaie is nie korrek verpak nie. (LW: 'n Bondel bestaande uit 'n maksimum van vyftig blaaie of 'n bondel per klas, elk met sy eie ooreenstemmende leerderregistrasievorm, moet tussen twee stukke karton geplaas word, en nie in die vraestel nie.)
3.10 Adviesvorms rakende antwoordbladopgawes is nie saam met die antwoordblaaie teruggestuur nie.
3.11 Vraestelle is teruggestuur aan die Direktoraat teen groot onkoste vir die Departement. (Vraestelle moet nie aan die Departement teruggestuur word nie - en kan deur die leerarea onderwyser gebruik word as bron materiaal en vir kontrolering van die werklike vrae teenoor die uitslae behaal deur leerders.)
4. Skynet Koeriers sal die toetsdokumente in twee besendings by eksamensentrums aflewer. Die Wiskunde toetsdokumente vir die eksamen op 2 Junie 2005 wat die eerste besending sal wees, sal aan skole afgelewer word vanaf 24 - 26 Mei 2005. Die Tale toetsdokumente vir die eksamen op 15 Junie 2005 sal aan skole afgelewer word vanaf 6 - 8 Junie 2005. Die pakke sal bestaan uit die toets-dokumente, lotto-tipe antwoordblaaie, karton, rubberbandjies, strepieskode-antwoordterugstuurblaaie, ‘n oorsiglys en grys plastieksakke. Die oorsiglys moet voltooi word na ontvangs van die toetsdokumente en moet gefaks word aan die nommer wat verskaf word. (Vir enige navrae in die verband, skakel mnr. C. Berry by tel. 021 467 2265
5. Prinsipale moet seker maak dat hulle die korrekte aantal houers ontvang en vir die ontvangs daarvan op die afleweringsadvies teken. Die houers moet in die skool se kluis bewaar word en die prinsipaal is verantwoordelik vir die veilige bewaring van die sleutels. Geliewe daarop te let dat onder geen omstandighede mag eksamenvraestelle oopgemaak of bespreek word met leerders of dat dit verwyder word vanaf die skool voor die aanvang van die eksamen.
6. Die toetse moet slegs op die antwoordblaaie wat verskaf sal word, beantwoord word.Alle leerders moet hulle sitplekke inneem een uur voor die aanvang van die assessering. Hierdie tyd moet aangewend word vir die voltooiing van elke leerling se registrasiebesonderhede, nl. die naam, van, geboortedatum, taal, leerarea, skool, ens. Dit moet gedoen word op die ANTWOORDBLAD alleenlik.
7. Hierdie toetse moet onder formele eksamentoestande afgeneem word en die reëls wat vir die Senior Sertifikaat-eksamen geld, moet toegepas word, sonder dat eksterne opsieners aangestel word.
8. Die klasonderwyser moet die volgende prosedure volg voor die aanvang van die assessering en die tyd soos aangedui in Eksamenminuut 0001/2005 soos volg bestee: vanaf 9:00 tot 9:45 die voorbereiding vir toetse soos hieronder gemeld waarneem en die toetse vanaf 9:45 tot 11:00 laat afneem.
8.1 voorsien leerders van ‘n potlood en uitveër.
8.2 antwoordblaaie moet aan die leerlinge uitgedeel word.
8.3 verseker dat elke leerder sy/haar korrekte naam, van, geslag, taal, skool, toetsvlak, ens. invul.
8.4 sorg dat leerders die toets ontvang 15 minute voor die aanvang van die assessering.
8.5 die toets moet teen 11:00 voltooi wees en alle antwoordblaaie moet onmiddellik en in alfabetiese volgorde ingeneem word.
8.6 kontroleer dat die getal antwoordblaaie ooreenstem met die getal leerders wat die toets afgelê het.
8.7 kontroleer dat die leerders se name en toetsvlakke ingevul is.
8.8 voltooi die leerderregistrasievorm vir leerders wat die toets afgelê het in alfabetiese volgorde. Stuur die lys saam met die antwoordblad en die antwoordblad-terugsendingsadvies terug.
9. Die klasonderwyser moet seker maak dat die terugsendingsadvies vir antwoordblaaie en leerderregistrasievorms behoorlik en korrek voltooi is en bo-op die pak lotto-tipe antwoordblaaie is.

Let asseblief daarop dat die antwoordblaaie elektronies geprosesseer moet word en dat dit saam met die meegaande dokumente baie versigtig hanteer moet word.

(9.1) Antwoordblaaie moet alfabeties opgemaak word, in ooreenstemming met die leerderregistrasievorm vir elke klaskamer of saal.
(9.2) ‘n Maksimum van vyftig (50) bladsye moet saamgebind word (elkeen met sy eie leerderregistrasievorm).
(9.3) Al die dokumente moet tussen die twee stukke karton gebind word om te verhinder dat hulle vou of beskadig.
(9.4) Die saamgebinde antwoordblaaie, (saam met die terugsendingsadvies vir antwoordskrifte met die leerderregistrasievorm heel bo), moet in die grys plastieksakke geplaas word en terugversend word aan die Direktoraat Eksamens, vir aandag mnr. E. van Breda.

Die koerier moet die pakke afhaal binne twee dae na voltooiing van die laaste toets.

Indien pakke Wiskunde en Taaltoetse teen Maandag 20 Junie 2005 nog nie afgehaal is nie, moet die direktoraat onmiddellik ingelig word by telefoonnommer 021 467 2960/1.
10. Let asseblief daarop dat intensiewe monitering sal plaasvind. Dit sluit in onaangekondigde besoeke aan skole deur die Nasionale Departement, kringbestuurders en lede van die Direktoraat Kurrikulumontwikkeling om te verseker dat alle voorskrifte nagekom word.
11. Hierdie toetse vorm nie deel van die vorderingspunt vir graad 8 leerders nie, en daar word nie van leerders verwag om spesifieke inhoud aan te leer nie, aangesien vaardighede en konsepte op ‘n vlak wat pas by graad 8 getoets word.
12. Let ook daarop dat daar nie van onderwysers verwag word om hulle leerders se antwoordblaaie na te sien nie. Die antwoordblaaie sal aangestuur word aan die toetssentrum in Australië wat die nasienwerk sal doen en die uitslae van leerders sal verskaf. Die uitslae sal gelewer word saam met ‘n gedetailleerde individuele en skoolontleding, sowel as ‘n aanduiding van hoe u in verhouding tot ander lande presteer het. Elke leerder sal ‘n sertifikaat ontvang en daarom is dit noodsaaklik dat u sal seker maak dat die naam, spelling en toetsvlak absoluut korrek ingevul is.
13. Prinsipale/onderwysers word versoek om te verseker dat die toetse op die geskeduleerde datums geskryf word en dat die gekodeerde terugsendingsadvies vir antwoordskrifte geteken is.
14. Let ook daarop dat dieselfde prosedure gevolg moet word op 15 Junie 2005.


GETEKEN: A.P. CLAUSEN
HOOF: ONDERWYS
DATUM: 2005:02:21

Inskrywingsvorm  (grootte: 32 KB)
Sentrumbesonderhede  (grootte: 7 KB)