1. Die Wes-Kaap Onderwysdepartement (WKOD) het sy allernuutste Inbelsentrum op 13 April 2004 geloods. Die sentrum het gedurende die afgelope jaar ‘n belangrike diens aan etlike duisende persone gelewer.
2. Ons wil graag prinsipale en personeel daaraan herinner dat die inbelsentrum ontwerp is om bepaald te fokus op aangeleenthede wat oor personeel en finansies handel. Die nommer is 0861-92-33-22.
3. In die lig van die groot aanvraag na hierdie diens met betrekking tot personeel- en finansieskwessies, versoek ons prinsipale en personeel aan ons inrigtings om navrae aan die inbelsentrum te beperk tot hierdie kwessies. Navrae in verband met ander aangeleenthede moet steeds aan die betrokke direktorate, gerig word. Dit sal voorkom dat die inbelsentrum onnodig met navrae oorlaai word.
4. Ons herinner kliënte dat die WKOD se webtuiste inligting verskaf oor baie van die navrae wat deur die inbelsentrum hanteer word. Die adres van die webtuiste is http://wced.wcape.gov.za. Dienste op die webtuiste sluit onder andere in

  • ‘n fasiliteit vir die naspoor van indiensnemingsprosesse;

  • ‘n databasis van onderwysers wat poste soek;

  • vakaturelyste, soos wat hulle gepubliseer word;

  • omsendbriewe en minute; en

  • bladsye wat spesifiek aan arbeidsverhoudings en menslike hulpbronontwikkeling aandag gee.
5. U aandag word ook daarop gevestig dat

  • van ons personeel in die Direktorate Personeel en Finansies se telefoonnommers na die inbelsentrum herlei is en dus nie meer direk geskakel kan word nie. (In dringende gevalle kan die Adjunkdirekteure en Direkteure direk geskakel word.)

  • u ook deur middel van e-pos met amptenare kan kommunikeer (verwys na Omsendbrief 165/2003 vir e-posadresse).
6. Die webtuiste sal voortdurend uitgebrei word om die werk van die Inbelsentrum en die Instapsentrum by ons Hoofkantoor in Kaapstad te komplementeer.
7. Die Inbelsentrum komplementeer ook die werk van verwante, telefoongebaseerde dienste wat deur die WKOD aangebied word. Hierdie dienste sluit die volgende in:

  • Die WKOD se Werknemerswelstandprogram, wat ‘n tolvrye beradingsdiens bied aan personeel wat konfidensiële advies benodig oor lewensbestuursaangeleenthede soos stres, depressie, verhoudingsprobleme, siekte, skuld en misbruik van middele (telefoon 0800-2044-81)

  • Die WKOD se Veiligeskole-inbelsentrum, wat ‘n skakelpunt bied vir leerders wat met mishandeling te kampe het en vir skole wat misdaad en ander insidente wil aanmeld wat skoolveiligheid en -sekuriteit kan bedreig (telefoon 0800-45-46-47)
8. Bring asseblief die inhoud van hierdie minuut onder die aandag van u personeel.


GETEKEN: A.M. ATTWELL
HOOF: ONDERWYS
DATUM: 2005:05:31