1. AGTERGROND
1.1 Omsendbrief 0016/2003 oor die kurrikulumraamwerk vir volwassene basiese onderrig en opleiding (VBOO) vlak 1 tot 3 het betrekking.
1.2 VBOO-vlak 1-3 voorsien die grondslag vir volwasse leerders wat toegang wil verkry tot ‘n verpakte en gestruktureerde VBOO-vlak 4-kurrikulum (verwys na Omsendbrief 0015/2003) en ‘n eerste kwalifikasie op die Nasionale Kwalifikasieraamwerk (NKR).
1.3 Ten einde ‘n sterk fondament te lê, is dit belangrik dat die VBOO-kurrikulum beide die sosiale en ekonomiese realiteite van die volwasse leerder byreken.
1.4 Die drie VBOO-vlakke onder NKR 1 is tans ‘n struikelblok vir die volwasse leerder wat toegang wil verkry tot ‘n versnelde, gekontekstualiseerde leerbaan.
1.5 Die kurrikulumraamwerk, wat gegrond is op eenheidstandaarde, maak dit ook moeilik vir gemeenskapsleersentrums (GLS’e) om vaardigheidsgebaseerde opleiding op ‘n konstruktiewe wyse in hulle programme te integreer.
2. ‘N GEMODULARISEERDE KURRIKULUM
2.1 Die term module, soos wat dit hier gebruik word, verwys na ‘n enkele eenheid, volledig in sigself, wat dien as ‘n bousteen vir verdere eenhede. Die modulestelsel het ten doel om die VBOO-leerders te ondersteun om beide hulle langtermyn en korttermyn opvoedkundige, sosiale en ekonomiese doelwitte te bereik.
2.2 Die doel van modules is om erkenning te verleen aan vooraf leer (EVL) en om seker te maak dat die leerder voorsien is van geleenthede om VBOO-vlak 3-programme op verskeie punte aan te pak en/of te verlaat. Leerders (afhangende van hulle ervaring) hoef dus nie by die eerste module van elke vlak te begin nie.
2.3 Die voordeel aan die gebruik van ‘n modulestruktuur lê in die onmiddellikheid daarvan, d.w.s. dat elke module duidelike, onmiddellike, korttermyn uitkomste stel wat die leerder kan bereik. Terugvoer is ook meer direk, omdat elke module leerders sal laat weet
    • of hulle die nodige vaardighede en kennis opgedoen het wat die module ten doel het om te ontwikkel,

    • of hulle aan die kriteria voldoen het waarteen hulle geassesseer sal word,

    • of hulle meer tyd benodig om die vereistes van die vasgestelde uitkomste te bereik, en

    • of hulle voldoende bewys van bevoegdheid gelewer het.

2.4 Die voordeel vir GLS’e van die gebruik van ‘n gemodulariseerde kurrikulum wat korrek bestuur en gemonitor word, is dat dit die bepaling en nasporing van leerbane fasiliteer. Dit is dus van kardinale belang dat GLS’e ‘n duidelike begrip het van waar hulle leerders op die leerkontinuum is wanneer die plasingsprosedure afgehandel is. Bestuursinstrumente om bogenoemde te bereik, word tans ontwikkel.
3. DIE MODULêRE RAAMWERK
3.1 Die kernfunksie van die modulêre raamwerk is om die drie VBOO-vlakke te herformuleer as ‘n fase wat opvoeders met ‘n beeld voorsien van
    • waar die volwasse leerder op die leerkontinuum is, en

    • die tipe intervensie of addisionele geleenthede wat ‘n leerder benodig ten einde die volgende treë in die leerproses te gee.

3.2 Die fases binne VBOO vlak 1-3, wat elk sy eie doelwitte het, kan soos volg opgesom word:
    • VBOO-vlak 1: Leer om te lees, skryf en te bereken

    • VBOO-vlak 2: Lees, skryf en bereken om te leer

    • VBOO-vlak 3: Leer om te leer en berei voor om te spesialiseer

3.3 Die modulêre raamwerk erken die verskille onder leerders wat ‘n bepaalde VBOO-vlak aanpak, en maak voorsiening vir verskillende leerders om die leerkontinuum op verskeie plekke weer binne te kom. Met inagneming van bogenoemde, bestaan elke VBOO-vlak uit 5 modules en drie verskillende leerstadiums (ontluikend, intermediêr en gevorderd).
3.4 Bylae A voorsien ‘n diagram wat die modulêre raamwerk uitbeeld.
4. DIE MODULêRE STRUKTUUR
4.1 Elke module bevat twee afdelings, geletterdheid en syferkundigheid, elk met sy eie bepaalde uitkomste, geïntegreer deur die leerkonteks.
4.2 In VBOO-vlak 3 is ‘n addisionele leerafdeling bygevoeg om leerders voor te berei op die instelling van die kern- en gekose leerareas in VBOO-vlak 4.
4.3 Die addisionele afdeling bevat die volgende:
    • Wetenskap en Tegnologie, wat die eenheidstandaarde van Natuurwetenskap en Tegnologie integreer

    • Lewens- en Sosiale Vaardighede, wat die eenheidstandaarde van Menslike en Sosiale Wetenskappe en Lewensoriëntering integreer

    • Ekonomiese en Entrepreneursvaardighede, wat die eenheidstandaarde van Ekonomiese en Bestuurswetenskappe, Menslike en Sosiale Wetenskappe en Kuns en Kultuur integreer.

4.4 Voorbeelde van die verskillende modules is ontwikkel ten einde opvoeders te help. Die voorbeelde sal vroeg in 2006 versprei word by alle GLS’e. Elke voorbeeld sal inligting voorsien oor die volgende:
4.4.1 Die spesifieke uitkomste (SU’s) en assesseringskriteria (AK)
Die SU’s en AK wat in hierdie module onder die loep sal kom
4.4.2 Basislynassessering
Vooraf leer wat die leerders moet hê wanneer hulle die module aanpak, hulle leerbehoeftes en verskillende hindernisse tot leer
4.4.3 Konteks
Opvoeders word voorsien van die geleentheid om hulle lesplanne te ontwikkel deur die verskillende kontekste en behoeftes van die leerders in berekening te bring
4.4.4 Vaardighede, kennis, gesindhede en waardes (VKGW’s)
Die VKGW’s wat in die module bevorder moet word
4.4.5 Onderrigmetodes
Voorgestelde strategieë vir die onderrig van volwassenes
4.4.6 Leer- en assesseringstrategieë
Voorgestelde klas- en assesseringstrategieë
4.4.7 Uitgebreide geleenthede
Voorgestelde addisionele geleenthede vir leerders om hulle begrip te verbreed en te verdiep en om hulle vaardighede te verbeter
4.4.8 Hulpbronne
Voorgestelde bronne om die module te ondersteun
4.4.9 Vermoëtaak
Voorgestelde assesseringsaktiwiteite wat bewys van die leerder se vermoë in die module sal verskaf (die vermoëtaak moet in die leerderportefeulje ingesluit word).
4.5 Bylae B voorsien opvoeders van die voorgestelde modulêre profielvorm.
5. DIE BEKENDSTELLING IN 2006
5.1 Die gestruktureerde VBOO-vlak 1-3-pakket sal in 2006 bekendgestel word in alle sentrums wat VBOO-vlak 1-3 aanbied.
5.2 Die betrokke opvoeders en sentrumbestuurders sal opgelei word van Januarie 2006 in die nuwe modulêre raamwerk. ‘n Kurrikulumminuut sal aan alle sentrums gestuur word om hulle in kennis te stel van die datums en opleidingslokale.
6. ONDERSTEUNING
6.1 Die VBOO-kurrikulumadviseurs in die OBOS’e sal beskikbaar wees om advies aan sentrumbestuurders en opvoeders te voorsien.
6.2 Die VBOO-kurrikulumadviseur sal, waar nodig, addisionele ondersteuning verkry van óf die betrokke kurrikulumkundige of die Senior Kurrikulumbeplanner: VBOO-kurrikulum.
6.3 Sentrums kan ook toegang verkry tot meer inligting op die VBOO-kurrikulumwebtuiste by http://curriculum.wcape.school.za/site/24/page/view/


GETEKEN: JP RAULT-SMITH
HOOF: ONDERWYS
DATUM: 2005:10:27

Bylae A & B  (grootte: 21 KB)